“ໂຈເຊັບ ແລະ ຊິດນີຮຽນຮູ້ກ່ຽວກັບສະຫວັນ,” ເລື່ອງຄຳສອນ ແລະ ພັນທະສັນຍາ (2024)
“ໂຈເຊັບ ແລະ ຊິດນີຮຽນຮູ້ກ່ຽວກັບສະຫວັນ,” ເລື່ອງຄຳສອນ ແລະ ພັນທະສັນຍາ
ເດືອນກຸມພາ 1832
ໂຈເຊັບ ແລະ ຊິດນີຮຽນຮູ້ກ່ຽວກັບສະຫວັນ
ພາບນິມິດກ່ຽວກັບພອນຂອງພຣະເຈົ້າສຳລັບລູກໆຂອງພຣະອົງ
ມື້ໜຶ່ງ,ໂຈເຊັບ ສະມິດ ແລະ ຊິດນີ ຣິກດອນ ກຳລັງອ່ານພຣະຄຣິສຕະທຳຄຳພີ. ພວກເພິ່ນໄດ້ອ່ານກ່ຽວກັບສິ່ງທີ່ເກີດຂຶ້ນກັບຜູ້ຄົນຫລັງຈາກທີ່ພວກເຂົາຕາຍໄປແລ້ວ. ໂຈເຊັບ ແລະ ຊິດນີໄດ້ຄິດກ່ຽວກັບສິ່ງທີ່ພວກເພິ່ນອ່ານ, ແລະ ພວກເພິ່ນຕ້ອງການຮຽນຮູ້ເພີ່ມເຕີມ.
ຄຳສອນ ແລະ ພັນທະສັນຍາ 76:11–18
ພຣະຜູ້ເປັນເຈົ້າໄດ້ປະທານພາບນິມິດທີ່ໜ້າອັດສະຈັນໃຫ້ແກ່ພວກເພິ່ນ. ພວກເພິ່ນໄດ້ເຫັນພຣະບິດາເທິງສະຫວັນ ແລະ ພຣະເຢຊູຄຣິດທີ່ຖືກອ້ອມຮອບດ້ວຍເຫລົ່າທູດ. ພວກເພິ່ນໄດ້ຍິນສຽງກ່າວວ່າ ພຣະເຢຊູເປັນພຣະບຸດຂອງພຣະເຈົ້າ. ສຽງນັ້ນກ່າວວ່າພຣະເຢຊູໄດ້ສິ້ນພຣະຊົນເພື່ອເຮົາ ແລະ ແລ້ວໄດ້ຟື້ນຄືນພຣະຊົນ—ພຣະອົງໄດ້ກັບຄືນມາມີຊີວິດອີກ. ເນື່ອງຈາກພຣະອົງໄດ້ເຮັດເຊັ່ນນັ້ນ, ເຮົາຈະຟື້ນຄືນຊີວິດເຊັ່ນກັນ.
ຄຳສອນ ແລະ ພັນທະສັນຍາ 76:19–24, 39–43
ໂຈເຊັບ ແລະ ຊິດນີໄດ້ຮຽນຮູ້ວ່າ ຫລັງຈາກເຮົາຟື້ນຄືນຊີວິດແລ້ວ, ເຮົາຈະອາໄສຢູ່ໃນໜຶ່ງໃນສາມສະຖານທີ່ໃນສະຫວັນ, ຊຶ່ງເອີ້ນວ່າ ອານາຈັກ. ຜູ້ຄົນທີ່ບໍ່ໄດ້ຮັບເອົາພຣະກິດຕິຄຸນຂອງພຣະເຢຊູຄຣິດ ຈະໄປສູ່ອານາຈັກຊັ້ນຕ່ຳ. ພຣະຜູ້ເປັນເຈົ້າໄດ້ປຽບທຽບອານາຈັກນີ້ໃສ່ກັບແສງຂອງດວງດາວ.
ຄຳສອນ ແລະ ພັນທະສັນຍາ 76:81–86
ໂຈເຊັບ ແລະ ຊິດນີກໍໄດ້ຮຽນຮູ້ກ່ຽວກັບອານາຈັກໜຶ່ງອີກ ຊຶ່ງເອີ້ນວ່າ ອານາຈັກຊັ້ນກາງ. ອານາຈັກນີ້ແມ່ນສຳລັບຜູ້ຄົນທີ່ດຳລົງຊີວິດທີ່ດີ ແຕ່ບໍ່ເຊື່ອຟັງພຣະກິດຕິຄຸນຂອງພຣະເຢຊູຄຣິດ. ພວກເຂົາບໍ່ມີສັດທາທີ່ເຂັ້ມແຂງໃນພຣະອົງ. ພຣະຜູ້ເປັນເຈົ້າໄດ້ປຽບທຽບອານາຈັກນີ້ໃສ່ກັບຄວາມສະຫວ່າງຂອງດວງເດືອນ.
ຄຳສອນ ແລະ ພັນທະສັນຍາ 76:71–80
ອານາຈັກສູງສຸດແມ່ນອານາຈັກຊັ້ນສູງ. ຜູ້ຄົນໃນອານາຈັກນີ້ໄດ້ເຮັດພັນທະສັນຍາ, ຫລື ຄຳສັນຍາ, ກັບພຣະເຈົ້າ ແລະ ຮັກສາພັນທະສັນຍາຂອງພວກເຂົາ. ພວກເຂົາໄດ້ກັບໃຈ ແລະ ຕິດຕາມພຣະເຢຊູຄຣິດ. ພວກເຂົາຢູ່ກັບພຣະບິດາເທິງສະຫວັນ ແລະ ພຣະເຢຊູຕະຫລອດໄປ ແລະ ກາຍເປັນເໝືອນດັ່ງພວກພຣະອົງ. ພຣະຜູ້ເປັນເຈົ້າໄດ້ປຽບທຽບອານາຈັກນີ້ໃສ່ກັບຄວາມສະຫວ່າງຂອງດວງຕາເວັນ.
ຄຳສອນ ແລະ ພັນທະສັນຍາ 76:50–70
ພຣະຜູ້ເປັນເຈົ້າໄດ້ບອກໂຈເຊັບ ແລະ ຊິດນີບໍ່ໃຫ້ແບ່ງປັນທຸກສິ່ງທີ່ພວກເພິ່ນໄດ້ເຫັນຢູ່ໃນພາບນິມິດຂອງພວກເພິ່ນ. ແຕ່ພຣະອົງຢາກໃຫ້ພວກເພິ່ນຂຽນກ່ຽວກັບບາງສິ່ງ ແລະ ແບ່ງປັນມັນກັບຄົນອື່ນ. ສະມາຊິກຂອງສາດສະໜາຈັກຫລາຍຄົນຮູ້ສຶກຕື່ນເຕັ້ນທີ່ຈະບອກຜູ້ຄົນກ່ຽວກັບພາບນິມິດນັ້ນ.
ຄຳສອນ ແລະ ພັນທະສັນຍາ 76:113–119; Saints, 1:149–50
ບາງຄົນບໍ່ມັກພາບນິມິດນັ້ນ. ມັນແຕກຕ່າງຈາກສິ່ງທີ່ພວກເຂົາເຊື່ອ. ແຕ່ໄພ່ພົນສ່ວນໃຫຍ່ຮູ້ສຶກຂອບຄຸນທີ່ໄດ້ຮູ້ກ່ຽວກັບການເປີດເຜີຍນີ້. ມັນໄດ້ສະແດງໃຫ້ພວກເຂົາເຫັນວ່າ ພຣະບິດາເທິງສະຫວັນຮັກລູກໆຂອງພຣະອົງ ແລະ ຈັດກຽມທາງໄວ້ໃຫ້ພວກເຂົາກັບຄືນໄປຫາພຣະອົງ.
Saints, 1:149–50