“ແມຣີ ແລະ ຄາໂຣລາຍ ໂຣນລິນສ໌,” ເລື່ອງຄຳສອນ ແລະ ພັນທະສັນຍາ (2024)
“ແມຣີ ແລະ ຄາໂຣລາຍ ໂຣນລິນສ໌,” ເລື່ອງຄຳສອນ ແລະ ພັນທະສັນຍາ
ເດືອນພະຈິກ 1830–ເດືອນ ກໍລະກົດ 1831
ແມຣີ ແລະ ຄາໂຣລາຍ ໂຣນລິນສ໌
ຄວາມຮັກອັນແຮງກ້າຕໍ່ພຣະຄຳພີ
ແມຣີ ໂຣນລິນສ໌ ມີອາຍຸໄດ້ 12 ປີຕອນຜູ້ສອນສາດສະໜາໄດ້ມາຢ້ຽມຢາມເມືອງເຄີດແລນ, ລັດໂອໄຮໂອ ເປັນເທື່ອທຳອິດ. ນາງໄດ້ຍິນເຂົາເຈົ້າເວົ້າເຖິງພຣະຄຳພີມໍມອນ. ໃນເວລານັ້ນ, ມີພຣະຄຳພີນີ້ພຽງເຫລັ້ມດຽວໃນເມືອງເຄີດແລນ, ແລະ ຜູ້ນຳຂອງສາດສະໜາຈັກຊື່ ໄອຊິກ ມໍລີ ມີພຣະຄຳພີເຫລັ້ມນີ້.
ແມຣີໄດ້ໄປບ້ານຂອງບຣາເດີ ມໍລີ ແລະ ຂໍເບິ່ງພຣະຄຳພີນັ້ນ. ບຣາເດີ ມໍລີ ໄດ້ໃຫ້ລາວຈັບມັນ. ແມຣີໄດ້ຖາມວ່າ ນາງຂໍເອົາມັນເມືອບ້ານໄດ້ຫລືບໍ່.
ບຣາເດີ ມໍລີ ບໍ່ຢາກເອົາປຶ້ມພຣະຄຳພີຂອງລາວໃຫ້ແມຣີຢືມ. ລາວຫາກໍອ່ານມັນໜ້ອຍດຽວ. ແມຣີໄດ້ອ້ອນວອນກັບບຣາເດີ ມໍລີ ຂໍຢືມພຣະຄຳພີນັ້ນ.
ບຣາເດີ ມໍລີ ໄດ້ຕົກລົງ. ລາວເວົ້າວ່າແມຣີສາມາດເອົາພຣະຄຳພີນັ້ນເມືອບ້ານໄດ້ ຖ້າຫາກນາງຈະເອົາມັນມາຄືນໃນມື້ອື່ນເຊົ້າ. ແມຣີປະຕິບັດຕໍ່ພຣະຄຳພີນັ້ນຄືກັບວ່າເປັນຊັບສົມບັດອັນລ້ຳຄ່າ. ນາງໄດ້ອ່ານມັນເກືອບທັງຄືນ.
ເມື່ອແມຣີມອບພຣະຄຳພີຄືນໃຫ້, ບຣາເດີ ມໍລີ ປະຫລາດໃຈທີ່ນາງໄດ້ອ່ານຫລາຍຂະໜາດນັ້ນ. “ນາງເອີຍ,” ລາວໄດ້ເວົ້າ, “ເອົາໜັງສືເຫລັ້ມນີ້ກັບໄປບ້ານ ແລ້ວອ່ານໃຫ້ຈົບ. ຂ້ອຍລໍໄດ້.”
ແມຣີເປັນຄົນທຳອິດໃນເມືອງເຄີດແລນທີ່ໄດ້ອ່ານພຣະຄຳພີມໍມອນຈົບທັງເຫລັ້ມ. ບໍ່ດົນຫລັງຈາກນາງໄດ້ອ່ານຈົບ, ນາງໄດ້ພົບກັບໂຈເຊັບ ສະມິດ. ເມື່ອເພິ່ນພົບວ່າແມຣີຮັກພຣະຄຳພີມໍມອນຫລາຍຂະໜາດໃດ, ເພິ່ນໄດ້ບອກວ່າ ນາງສາມາດເອົາປຶ້ມຂອງບຣາເດີ ມໍລີ ໄດ້. ເພິ່ນໄດ້ມອບເຫລັ້ມໃໝ່ໃຫ້ບຣາເດີ ມໍລີ.
ຕໍ່ມາໃນປີນັ້ນ, ແມຣີ ແລະ ຄອບຄົວຂອງນາງໄດ້ຍ້າຍໄປຢູ່ເມືອງອິນດີເພັນເດັນສ໌, ລັດມີເຊີຣີ. ນາງຕື່ນເຕັ້ນທີ່ຈະໄດ້ເບິ່ງຜູ້ນຳຂອງສາດສະໜາຈັກເລີ່ມຮວບຮວມໜັງສືເຫລັ້ມໃໝ່ທີ່ເອີ້ນວ່າ ປຶ້ມພຣະບັນຍັດ. ໜັງສືເຫລັ້ມນີ້ມີການເປີດເຜີຍຫລາຍຢ່າງທີ່ພຣະເຢຊູຄຣິດໄດ້ປະທານໃຫ້ແກ່ໂຈເຊັບ ສະມິດ.
ຄຳສອນ ແລະ ພັນທະສັນຍາ 67; 70:1–4; Saints, 1:178
ແຕ່ບາງຄົນຢູ່ໃນເມືອງອິນດີເພັນເດັນສ໌ ບໍ່ມັກສາດສະໜາຈັກ. ພວກເຂົາຕ້ອງການໃຫ້ໄພ່ພົນໜີໄປ. ມື້ໜຶ່ງ, ພວກຜູ້ຊາຍທີ່ຄຽດແຄ້ນໄດ້ບຸກເຂົ້າໄປໃນອາຄານ ບ່ອນທີ່ປຶ້ມພຣະບັນຍັດກຳລັງຖືກພິມ. ພວກເຂົາໄດ້ໂຍນຈັກພິມລົງທາງປ່ອງຢ້ຽມ ແລະ ກະຈັດກະຈາຍໜ້າພຣະບັນຍັດລົງໃນຖະໜົນ.
Saints, 1:177–78
ແມຣີ ແລະ ນ້ອງສາວຂອງນາງ, ຄາໂຣລາຍ, ກຳລັງເຝົ້າເບິ່ງຢູ່ຫລັງຮົ້ວ. ແມຣີໄດ້ບອກຄາໂຣລາຍວ່າ ນາງຕ້ອງໄປເອົາໜ້າເຫລົ່ານັ້ນກ່ອນທີ່ມັນຈະຖືກທຳລາຍ. ຄາໂຣລາຍຢ້ານກົວພວກຜູ້ຊາຍທີ່ຄຽດແຄ້ນ. “ພວກເຂົາຊິຂ້າພວກເຮົາ,” ນາງໄດ້ເວົ້າ. ແຕ່ແມຣີ ແລະ ຄາໂຣລາຍຮູ້ວ່າ ໜ້າເຫລົ່ານັ້ນມີພຣະຄຳຂອງພຣະເຈົ້າຢູ່ໃນນັ້ນ.
Saints, 1:178
ສອງເອື້ອຍນ້ອງໄດ້ລໍຖ້າຈົນກວ່າພວກຜູ້ຊາຍບໍ່ໄດ້ສັງເກດ. ແລ້ວພວກເຂົາໄດ້ແລ່ນເຂົ້າໄປທີ່ຖະໜົນ ແລະ ຫອບເອົາເຈ້ຍໃຫ້ໄດ້ຫລາຍທີ່ສຸດເທົ່າທີ່ຈະສາມາດເຮັດໄດ້. ຂະນະທີ່ພວກເຂົາຮີບອອກໜີ, ມີຜູ້ຊາຍບາງຄົນເຫັນພວກເຂົາ ແລະ ຮ້ອງບອກໃຫ້ພວກເຂົາຢຸດ. ແມຣີ ແລະ ຄາໂຣລາຍໄດ້ຫອບເຈ້ຍໄວ້ຢ່າງແໜ້ນ ແລະ ແລ່ນໄວທີ່ສຸດເທົ່າທີ່ພວກເຂົາຈະສາມາດເຮັດໄດ້ ເຂົ້າໄປໃນທົ່ງສາລີທີ່ຢູ່ໃກ້ໆ.
Saints, 1:178–79
ຜູ້ຊາຍສອງຄົນໄດ້ໄລ່ຕາມສອງເອື້ອຍນ້ອງເຂົ້າໄປໃນທົ່ງສາລີ. ຕົ້ນສາລີສູງຫລາຍ, ແມຣີ ແລະ ຄາໂຣລາຍບໍ່ຮູ້ວ່າພວກເຂົາກຳລັງຈະໄປທາງໃດ. ພວກເຂົາໄດ້ໝູບຢູ່ກັບພື້ນ ແລະ ນອນເຕັງເຈ້ຍເຫລົ່ານັ້ນໄວ້. ພວກເຂົາໄດ້ຟັງຢ່າງງຽບໆ ຂະນະທີ່ຜູ້ຊາຍສອງຄົນກຳລັງຍ່າງຜ່ານທົ່ງສາລີ ເພື່ອຊອກຫາພວກເຂົາ.
Saints, 1:179
ບໍ່ດົນພວກຜູ້ຊາຍກໍຍອມແພ້. ແມຣີ ແລະ ຄາໂຣລາຍປອດໄພແລ້ວ. ພວກເຂົາໄດ້ເກັບເຈ້ຍການເປີດເຜີຍຂອງພຣະຜູ້ເປັນເຈົ້າໄວ້ສຳລັບປຶ້ມພຣະບັນຍັດ. ປະຈຸບັນນີ້ ການເປີດເຜີຍເຫລົ່ານັ້ນມີຢູ່ໃນພຣະຄຳພີຄຳສອນ ແລະ ພັນທະສັນຍາ.
Saints, 1:179