“ໄຮຣຳ ເພຈ໌ ແລະ ການເປີດເຜີຍ,” ເລື່ອງຄຳສອນ ແລະ ພັນທະສັນຍາ (2024)
“ໄຮຣຳ ເພຈ໌ ແລະ ການເປີດເຜີຍ,” ເລື່ອງຄຳສອນ ແລະ ພັນທະສັນຍາ
ເດືອນກັນຍາ 1830
ໄຮຣຳ ເພຈ໌ ແລະ ການເປີດເຜີຍ
ໄພ່ພົນຮຽນຮູ້ວ່າ ພຣະເຈົ້ານຳພາສາດສະໜາຈັກຂອງພຣະອົງແນວໃດ
ໄຮຣຳ ເພຈ໌ ເປັນເພື່ອນຂອງໂຈເຊັບ ສະມິດ ແລະ ອໍລີເວີ ຄາວເດີຣີ. ເພິ່ນຍັງເປັນພະຍານຄົນໜຶ່ງໃນຈຳນວນພະຍານແປດຄົນ ເຖິງແຜ່ນຈາລຶກຄຳນຳອີກ. ໄຮຣຳໄດ້ມີຫີນກ້ອນໜຶ່ງ, ແລະ ເພິ່ນເຊື່ອວ່າ ພຣະເຈົ້າກຳລັງໃຊ້ມັນເພື່ອໃຫ້ຂ່າວສານແກ່ເພິ່ນ, ຫລື ໃຫ້ການເປີດເຜີຍ, ສຳລັບສາດສະໜາຈັກ. ອໍລີເວີ ແລະ ໄພ່ພົນຄົນອື່ນໆໄດ້ເຊື່ອວ່າ ການເປີດເຜີຍຂອງໄຮຣຳໄດ້ມາຈາກພຣະເຈົ້າ.
ຄຳສອນ ແລະ ພັນທະສັນຍາ 28, ຫົວຂໍ້ພາກ; Saints, 1:97
ການເປີດເຜີຍຂອງໄຮຣຳຟັງຄືວ່າເປັນເໝືອນພຣະຄຳພີ. ແຕ່ມັນແຕກຕ່າງຈາກສິ່ງທີ່ພຣະຄຣິສຕະທຳຄຳພີສິດສອນ. ມັນຍັງແຕກຕ່າງຈາກສິ່ງທີ່ພຣະຜູ້ເປັນເຈົ້າໄດ້ບອກສາດສະດາໂຈເຊັບນຳອີກ. ໂຈເຊັບບໍ່ແນ່ໃຈວ່າຈະເຮັດແນວໃດ.
Saints, 1:97
ໂຈເຊັບບໍ່ໄດ້ນອນເກືອບທັງຄືນ ທູນຂໍຄວາມຊ່ວຍເຫລືອຈາກພຣະເຈົ້າ. ເພິ່ນກັງວົນຢ້ານວ່າຈະເຮັດສິ່ງທີ່ຜິດ ແລະ ເຮັດໃຫ້ໝູ່ເພື່ອນຂອງເພິ່ນເສຍໃຈ.
Saints, 1:97
ໂຈເຊັບຢາກໃຫ້ຜູ້ຄົນສະແຫວງຫາການເປີດເຜີຍສຳລັບຊີວິດຂອງເຂົາເຈົ້າເອງ. ແຕ່ມັນຈະເປັນເລື່ອງທີ່ສັບສົນຖ້າຫາກວ່າທຸກຄົນໄດ້ພະຍາຍາມທີ່ຈະໄດ້ຮັບການເປີດເຜີຍສຳລັບຕະຫລອດທັງສາດສະໜາຈັກ.
Saints, 1:97
ໃນທີ່ສຸດ, ພຣະຜູ້ເປັນເຈົ້າກໍໄດ້ມອບການເປີດເຜີຍໃຫ້ແກ່ໂຈເຊັບ ເພື່ອແບ່ງປັນກັບອໍລີເວີ. ພຣະຜູ້ເປັນເຈົ້າໄດ້ກ່າວວ່າ ພຽງແຕ່ສາດສະດາເທົ່ານັ້ນທີ່ສາມາດໄດ້ຮັບການເປີດເຜີຍ ແລະ ພຣະບັນຍັດສຳລັບຕະຫລອດທັງສາດສະໜາຈັກ. ພຣະອົງໄດ້ກ່າວວ່າ ອໍລີເວີຄວນສິດສອນສິ່ງນີ້ໃຫ້ແກ່ໄຮຣຳ.
ຄຳສອນ ແລະ ພັນທະສັນຍາ 28:2, 6–13
ພຣະຜູ້ເປັນເຈົ້າປະສົງໃຫ້ໄຮຣຳເຂົ້າໃຈວ່າ ເພິ່ນສາມາດໄດ້ຮັບການເປີດເຜີຍສຳລັບຊີວິດຂອງເພິ່ນເອງ. ແຕ່ການເປີດເຜີຍສຳລັບສາດສະໜາຈັກຈະມາສູ່ສາດສະດາຂອງພຣະຜູ້ເປັນເຈົ້າ. ໄຮຣຳໄດ້ຮັບຟັງອໍລີເວີ ແລະ ໄດ້ກັບໃຈ. ບັດນີ້ໄພ່ພົນໄດ້ເຂົ້າໃຈດີຂຶ້ນວ່າ ພຣະຜູ້ເປັນເຈົ້ານຳພາສາດສະໜາຈັກຂອງພຣະອົງແນວໃດ.
Saints, 1:98