“ການແຕ່ງງານ ແລະ ຄອບຄົວນິລັນດອນ,” ເລື່ອງຄຳສອນ ແລະ ພັນທະສັນຍາ (2024)
“ການແຕ່ງງານ ແລະ ຄອບຄົວນິລັນດອນ,” ເລື່ອງຄຳສອນ ແລະ ພັນທະສັນຍາ
1843–1846
ການແຕ່ງງານ ແລະ ຄອບຄົວນິລັນດອນ
ຜະນຶກໂດຍອຳນາດຂອງພຣະເຢຊູຄຣິດ
ເມື່ອເອມມາ ແລະ ໂຈເຊັບໄດ້ແຕ່ງງານກັນ, ພວກເພິ່ນເຊື່ອວ່າການແຕ່ງງານຂອງພວກເພິ່ນຈະສິ້ນສຸດລົງເມື່ອພວກເພິ່ນເສຍຊີວິດໄປ. ການແຕ່ງງານທຸກຄັ້ງໄດ້ເປັນມາແບບນີ້. ແຕ່ແລ້ວພຣະຜູ້ເປັນເຈົ້າໄດ້ບອກໂຈເຊັບວ່າການແຕ່ງງານ ແລະ ຄອບຄົວສາມາດຍືນຍົງຕະຫລອດໄປ.
Saints, 1:413
ພຣະຜູ້ເປັນເຈົ້າໄດ້ສິດສອນໂຈເຊັບກ່ຽວກັບການແຕ່ງງານນິລັນດອນ. ຜ່ານທາງອຳນາດຂອງຖານະປະໂລຫິດ, ຊາຍ ແລະ ຍິງສາມາດເຮັດພັນທະສັນຍາກັບພຣະຜູ້ເປັນເຈົ້າ. ຖ້າວ່າເຂົາເຈົ້າຮັກສາພັນທະສັນຍາຂອງເຂົາເຈົ້າ, ພຣະຜູ້ເປັນເຈົ້າສັນຍາວ່າການແຕ່ງງານຂອງເຂົາເຈົ້າຈະຍືນຍົງຕະຫລອດໄປ. ນີ້ເອີ້ນວ່າການຖືກຜະນຶກເຂົ້າກັນ. ເວລາບໍ່ດົນຕໍ່ມາ, ເອມມາ ແລະ ໂຈເຊັບໄດ້ຖືກຜະນຶກເຂົ້າກັນຊົ່ວນິລັນດອນ.
ຄຳສອນ ແລະ ພັນທະສັນຍາ 132:7, 19–24; Saints, 1:413, 432–33, 481–82, 492, 502–3
ໂຈເຊັບຍັງໄດ້ຮຽນຮູ້ອີກວ່າເມື່ອຊາຍ ແລະ ຍິງ ຖືກຜະນຶກເຂົ້າກັນ, ລູກໆຂອງເຂົາເຈົ້າກໍຈະຖືກຜະນຶກເຂົ້າກັບເຂົາເຈົ້າ. ຍ້ອນອຳນາດຂອງພຣະເຢຊູຄຣິດ, ຄອບຄົວຂອງເຂົາເຈົ້າຈະຍືນຍົງຕະຫລອດໄປ. ເມື່ອໂຈເຊັບໄດ້ບອກໄພ່ພົນກ່ຽວກັບພອນນີ້, ເຂົາເຈົ້າຮູ້ສຶກດີໃຈຫລາຍ! ເຂົາເຈົ້າອົດໃຈລໍຖ້າບໍ່ໄຫວທີ່ຈະໄດ້ຖືກຜະນືກເຂົ້າກັນ.
ຄຳສອນ ແລະ ພັນທະສັນຍາ 131:2; 132:6–7; Saints, 1:492–93, 580
ຕໍ່ມາພຣະຜູ້ເປັນເຈົ້າໄດ້ສິດສອນວ່າ ການຜະນຶກເຂົ້າກັນຄວນຖືກປະຕິບັດຢູ່ໃນພຣະວິຫານ. ໄພ່ພົນໄດ້ເຮັດວຽກໜັກໃຫ້ສຳເລັດການສ້າງພຣະວິຫານນາວູ ເພື່ອວ່າເຂົາເຈົ້າຈະສາມາດຖືກຜະນຶກເຂົ້າກັນ. ເມື່ອພຣະວິຫານສຳເລັດແລ້ວ, ຫລາຍຄອບຄົວກໍໄດ້ຖືກຜະນຶກເຂົ້າກັນ. ເຂົາເຈົ້າຍັງໄດ້ຖືກຜະນຶກເຂົ້າກັບສະມາຊິກໃນຄອບຄົວຜູ້ທີ່ເສຍຊີວິດໄປແລ້ວນຳອີກ. ເຂົາເຈົ້າຮູ້ສຶກກະຕັນຍູສຳລັບພອນນີ້!
Saints, 1:579–80