ໂຈ​ເຊັບ ແລະ ໄຮ​ຣຳ​ມອບ​ຊີ​ວິດ​ຂອງ​ພວກ​ເພິ່ນ​ເພື່ອ​ພຣະ​ກິດ​ຕິ​ຄຸນ

ໂຈ​ເຊັບ ສະ​ມິດ ເປັນ​ກັງ​ວົນ. ຈະ​ເກີດ​ຫຍັງ​ຂຶ້ນ​ກັບ​ສາດ​ສະ​ໜາ​ຈັກ​ຖ້າ​ວ່າ​ເພິ່ນ​ເສຍ​ຊີ​ວິດ​ໄປ? ເພິ່ນ​ຕ້ອງ​ການ​ແນ່​ໃຈ​ວ່າ​ວຽກ​ງານ​ຂອງ​ພຣະ​ຜູ້​ເປັນ​ເຈົ້າ​ຈະ​ດຳ​ເນີນ​ຕໍ່​ໄປ. ສະ​ນັ້ນ​ເພິ່ນ​ຈຶ່ງ​ເຕົ້າ​ໂຮມ​ອັກ​ຄະ​ສາ​ວົກ ແລະ ໄດ້​ມອບ​ຂໍ​ກະ​ແຈ​ຂອງ​ຖາ​ນະ​ປະ​ໂລ​ຫິດ​ທີ່​ພຣະ​ເຢ​ຊູ​ຄຣິດ​ໄດ້​ມອບ​ໃຫ້​ເພິ່ນ​ໃຫ້​ກັບ​ພວກ​ເພິ່ນ. ນີ້​ໝາຍ​ຄວາມ​ວ່າ​ອັກ​ຄະ​ສາ​ວົກ​ສາ​ມາດ​ນຳ​ພາ​ສາດ​ສະ​ໜາ​ຈັກ​ຂອງ​ພຣະ​ຜູ້​ເປັນ​ເຈົ້າ ແລະ ເຮັດ​ວຽກ​ງານ​ຂອງ​ພຣະ​ອົງ​ໄດ້. ສິ່ງ​ນີ້​ໄດ້​ຊ່ວຍ​ເຮັດ​ໃຫ້​ໂຈ​ເຊັບ​ຮູ້​ສຶກ​ດີ​ຂຶ້ນ​ກວ່າ​ເກົ່າ.

Saints, 1:519–20

ແຕ່​ວ່າ​ມີ​ຜູ້​ຄົນ​ຈຳ​ນວນ​ຫລາຍ​ທີ່​ໃຈ​ຮ້າຍ​ໃຫ້​ກັບ​ໂຈ​ເຊັບ. ບາງ​ຄົນ​ຢາກ​ຂ້າ​ເພິ່ນ. ພວກ​ເຂົາ​ບໍ່​ມັກ​ສິ່ງ​ທີ່​ເພິ່ນ​ກຳ​ລັງ​ສິດ​ສອນ. ພວກ​ເຂົາ​ຂຽນ​ກ່ຽວ​ກັບ​ເພິ່ນ​ໃນ​ໜັງ​ສື​ພິມ​ເພື່ອ​ເຮັດ​ໃຫ້​ຫລາຍ​ຄົນ​ຕື່ມ​ອີກ​ໃຈ​ຮ້າຍ​ໃຫ້​ກັບ​ໂຈ​ເຊັບ ແລະ ສາດ​ສະ​ໜາ​ຈັກ. ບາງ​ຄົນ​ໃນ​ພວກ​ເຂົາ​ຍັງ​ຢາກ​ທີ່​ຈະ​ໂຈມ​ຕີ​ເມືອງ​ນາ​ວູ.

Saints, 1:526–28, 530–32, 533–34

ໂຈ​ເຊັບ ແລະ ຜູ້​ນຳ​ຄົນ​ອື່ນໆ​ໃນ​ເມືອງ​ນາ​ວູ​ໄດ້​ທຳ​ລາຍ​ໂຮງ​ພິິມ​ເພື່ອ​ຢຸດ​ຢັ້ງ​ຄວາມ​ກຽດ​ຊັງ​ບໍ່​ໃຫ້​ແຜ່​ລາມ​ອອກ​ໄປ. ເຫດ​ການ​ນີ້​ໄດ້​ເຮັດ​ໃຫ້​ຜູ້​ຄົນ​ເພີ່ມ​ທະ​ວີ​ຄວາມ​ໃຈ​ຮ້າຍ​ຕື່ມ​ອີກ. ເຈົ້າ​ລັດ​ໄດ້​ບອກ​ໃຫ້​ໂຈ​ເຊັບ​ໄປ​ທີ່​ເມືອງ​ຄາດ​ເທດ ເພື່ອ​ໃຫ້​ຜູ້​ພິ​ພາກ​ສາ​ຕັດ​ສິນ​ວ່າ​ເພິ່ນ​ໄດ້​ກະ​ທຳ​ຜິດ​ກົດ​ໝາຍ​ຫລື​ບໍ່. ໂຈ​ເຊັບ​ຮູ້​ແລ້ວ​ວ່າ​ຖ້າ​ເພິ່ນ​ໄປ​ທີ່​ຄາດ​ເທດ, ຜູ້​ຄົນ​ຈະ​ຂ້າ​ເພິ່ນ.

ຄຳ​ສອນ ແລະ ພັນ​ທະ​ສັນ​ຍາ 135:4; Saints, 1:533–37, 539–41

ແຕ່​ໂຈ​ເຊັບ​ກໍ​ຍັງ​ຢາກ​ໃຫ້​ໄພ່​ພົນ​ປອດ​ໄພ. ຖ້າ​ວ່າ​ເພິ່ນ​ໄປ​ທີ່​ເມືອງ​ຄາດ​ເທດ​ແລ້ວ, ບາງ​ທີ​ຄົນ​ພວກ​ນັ້ນ​ຈະ​ປ່ອຍ​ໄພ່​ພົນ​ທີ່​ເມືອງ​ນາ​ວູ​ໄປ. ໂຈ​ເຊັບ​ໄດ້​ຕັດ​ສິນ​ໃຈ​ທີ່​ຈະ​ໄປ. ເພິ່ນ​ໄດ້​ໃຫ້​ພອນ​ແກ່​ເອມ​ມາ ແລະ ລູກໆ​ຂອງ​ເພິ່ນ, ຈູບ​ລາ​ພວກ​ເຂົາ, ແລະ ເດີນ​ທາງ​ໄປ​ທີ່​ເມືອງ​ຄາດ​ເທດ.

Saints, 1:542–44

ໄຮ​ຣຳ ອ້າຍ​ຂອງ​ເພິ່ນ​ໄດ້​ໄປ​ກັບ​ເພິ່ນ. ຈອນ ເທ​ເລີ, ວິວ​ເລີດ ຣິ​ເຈີດສ໌ ແລະ ໝູ່​ເພື່ອນ​ຄົນ​ອື່ນໆ​ອີກ​ກໍ​ເດີນ​ທາງ​ໄປ​ດ້ວຍ. ຂະ​ນະ​ທີ່​ພວກ​ເພິ່ນ​ເດີນ​ທາງ​ອອກ​ໄປ, ໂຈ​ເຊັບ​ໄດ້​ຢຸດ​ມ້າ​ຂອງ​ເພິ່ນ ແລະ ແນມ​ເບິ່ງ​ກັບ​ຄືນ​ໄປ​ເມືອງ​ນາ​ວູ. “ສະ​ຖານ​ທີ່​ແຫ່ງ​ນີ້​ແມ່ນ​ບ່ອນ​ທີ່​ໜ້າ​ຢູ່​ທີ່​ສຸດ ແລະ ຜູ້​ຄົນ​ກໍ​ເປັນ​ຄົນ​ດີ​ທີ່​ສຸດ​ພາຍ​ໃຕ້​ສະ​ຫວັນ,” ເພິ່ນ​ໄດ້​ກ່າວ.

Saints, 1:543–45

ເມື່ອ​ພວກ​ເພິ່ນ​ໄດ້​ໄປ​ຮອດ​ເມືອງ​ຄາດ​ເທດ, ພວກ​ເພິ່ນ​ກໍ​ຖືກ​ຈັບ​ຂັງ​ຄຸກ. ໃນ​ຂະ​ນະ​ທີ່​ພວກ​ເພິ່ນ​ຢູ່​ໃນ​ຄຸກ, ໄຮ​ຣຳ​ໄດ້​ອ່ານ​ພຣະ​ຄຳ​ພີ​ມໍ​ມອນ​ໃຫ້​ພວກ​ເພິ່ນ​ຟັງ. ໂຈ​ເຊັບ​ໄດ້​ບອກ​ກັບ​ຄົນ​ຍາມ​ຄຸກ​ວ່າ ພຣະ​ຄຳ​ພີ​ມໍ​ມອນ​ເປັນ​ຄວາມ​ຈິງ.

Saints, 1:546

ເພື່ອ​ປອບ​ໂຍນ​ໝູ່​ເພື່ອນ​ຂອງ​ເພິ່ນ, ຈອນ ເທ ເລີ ໄດ້​ຮ້ອງ​ເພງ​ສວດ​ກ່ຽວ​ກັບ​ພຣະ​ເຢ​ຊູ. ມັນ​ມ່ວນ​ອອນ​ຊອນ​ຫລາຍ, ແລະ ໄຮ​ຣຳ​ໄດ້​ຂໍ​ໃຫ້​ເພິ່ນ​ຮ້ອງ​ເພງ​ນັ້ນ​ອີກ​ຄັ້ງ.

Saints, 1:549

ເວ​ລາ​ຕໍ່​ມາ​ຂອງ​ມື້​ນັ້ນ, ກຸ່ມ​ພວກ​ຜູ້​ຊາຍ​ທີ່​ຄຽດ​ແຄ້ນ​ໄດ້​ຖື​ປືນ ບຸກ​ເຂົ້າ​ໄປ​ໃນ​ຄຸກ. ພວກ​ເຂົາ​ໄດ້​ພັງ​ປະ​ຕູ​ເຂົ້າ​ໄປ ແລະ ເລີ່ມ​ຍິງ​ປືນ​ເຂົ້າ​ໃສ່​ໃນ​ຫ້ອງ​ທີ່​ໂຈ​ເຊັບ ແລະ ໝູ່​ເພື່ອນ​ຂອງ​ເພິ່ນ​ຢູ່​ທີ່​ນັ້ນ. ຈອນ ເທ​ເລີ ໄດ້​ຮັບ​ບາດ​ເຈັບ​ໜັກ. ໄຮ​ຣຳ ແລະ ໂຈ​ເຊັບ​ຖືກ​ຂ້າ​ຕາຍ.

ຄຳ​ສອນ ແລະ ພັນ​ທະ​ສັນ​ຍາ 135:1–2; Saints, 1:550–52

ໄພ່​ພົນ​ຮູ້​ສຶກ​ເສຍ​ໃຈ​ຫລາຍ​ເມື່ອ​ເຂົາ​ເຈົ້າ​ໄດ້​ຮູ້​ວ່າ​ໂຈ​ເຊັບ ແລະ ໄຮ​ຣຳ​ໄດ້​ເສຍ​ຊີ​ວິດ​ແລ້ວ. ແຕ່​ເຂົາ​ເຈົ້າ​ຮູ້​ແລ້ວ​ວ່າ ການ​ສັງ​ຫານ​ສາດ​ສະ​ດາ​ຈະ​ບໍ່​ຢຸດ​ສາດ​ສະ​ໜາ​ຈັກ​ໄດ້. ນີ້​ແມ່ນ​ສາດ​ສະ​ໜາ​ຈັກ​ຂອງ​ພຣະ​ຜູ້​ຊ່ວຍ​ໃຫ້​ລອດ, ແລະ ພຣະ​ອົງ​ຈະ​ສືບ​ຕໍ່​ນຳ​ພາ​ຕໍ່​ໄປ. ສາດ​ສະ​ໜາ​ຈັກ​ຈະ​ເຕີບ​ໂຕ​ຕໍ່​ໄປ​ເລື້ອຍໆ ແລະ ຈະ​ເປັນ​ພອນ​ໃຫ້​ກັບ​ລູກໆ​ຂອງ​ພຣະ​ເຈົ້າ​ຕະ​ຫລອດ​ທົ່ວ​ໂລກ.

Saints, 1:553–59