Наувуг орхиж, өрнөд рүү явсан нь

Иосеф Смитэд нас барав. Одоо Бригам Янг болон бусад төлөөлөгч Сүмийг удирдах боллоо. Гэгээнтнүүд Наувуд амар тайван байх боломжгүй болж, Наувуг орхин явах хэрэгтэй болно гэдгийг Бригам мэдэж байв. Гэвч Их Эзэн тэднийг эхлээд ариун сүмийг барьж дуусгахыг хүссэн юм. Тэрээр тэднийг Түүнтэй гэрээ байгуулж, гэр бүлээрээ лацдан холбуулаасай хэмээн хүссэн юм.

Saints, 1:571, 579–580

Хэдэн сарын дараа хүмүүс ариун сүмд гэрээ байгуулахад бэлэн болсон байв. Мянга мянган гэгээнтэн ариун сүмд иржээ. Бригам шөнө орой болтол ариун сүмд байж, Их Эзэнтэй гэрээ байгуулахад нь тэдэнд туслав. Эцэст нь тэд Наувуг орхиж явах хэрэгтэйг Бригам хүн бүрд хэлжээ.

Saints, 1:582

Маргааш өглөө нь Бригамыг сэрэхэд улам олон гэгээнтэн ариун сүмд орохоор хүлээж байв. Бригам тэдэнд Наувуд үлдэх нь аюултай бөгөөд өрнөдөд шинэ орон гэрээ олох хэрэгтэй гэж хэлжээ. Тэнд очоод тэд шинэ ариун сүм барьж болно хэмээн тэр амлав.

Saints, 1:582–583, 264–214

Гэвч гэгээнтнүүд явсангүй. Тэд шинэ гэр оронтой болох аян замдаа гарахаасаа өмнө Их Эзэнтэй гэрээ байгуулахыг хүсжээ.

Saints, 1:583

Бригам тэдний нүүр царайг хараад бодлоо өөрчилжээ. Тэрээр дараагийн хоёр өдрийг ариун сүмд гэрээнүүд байгуулахад нь гэгээнтнүүдэд тусалж өнгөрүүлэв.

Saints, 1:583

Гэгээнтнүүд Их Эзэнтэй гэрээнүүдээ байгуулсан учраас Наувуг орхин явах цаг нь болжээ. Их Эзэн тэдэнд зориулан газар бэлтгэснийг Бригам мэдэж байв. Тэр уг газрыг үзэгдлээр үзсэн ажээ. Тэд аян замаа эхлүүлэв. Цаг агаар хүйтэн, газар шавар шавхайтай байлаа. Хүмүүс өвдөж, хоол хүнс нь ч дуусаж байв.

Saints, 2:16–18, 20–21

Гэгээнтнүүдийн урдах зам урт байлаа. Тэд яаж ийм урт удаан, хүнд бэрх аян замыг туулах вэ гэж Бригам бодож байв. Тэр Бурханаас тусламж хүсэн гуйжээ.

Saints, 2:46

Их Эзэн Бригамд нэгэн илчлэлт өгөв. Тэр Бригамд гэгээнтнүүдийг хэрхэн удирдахыг заажээ. Тэд ядуусыг харж халамжлахад бие биедээ туслах хэрэгтэй гэж Тэр хэлэв.

Сургаал ба Гэрээнүүд 136:1–8

Их Эзэн Өөртэй нь байгуулсан гэрээнүүдээ санах хэрэгтэйг гэгээнтнүүдэд хэлжээ. Хэрэв тэд тэгж чадвал Тэрээр тэднийг адисалж, аян замд нь туслах байв.

Сургаал ба Гэрээнүүд 136:4, 11, 42; Saints, 2:47

Аян зам маш хүнд хэвээр байлаа. Олон хүн нас барсан ч ариун сүмийн гэрээнүүдийнхээ ачаар гэгээнтнүүд гэр бүлийн гишүүдтэйгээ дахин уулзана гэдгээ мэдэж байв.

Хэдэн сарын дараа, 1847 онд анхны гэгээнтнүүд Солт Лэйкийн хөндийд иржээ. Бригам Янг Солт Лэйкийн хөндийг анх хараад: “Энэ бол зөв газар байна” гэж хэлсэн аж. Энэ нь түүний үзэгдлээр харсан тэр газар нь буюу гэгээнтнүүдийн аюулаас хол байх газар байлаа. Энд тэд Их Эзэнийг шүтэн биширч, Түүний ажлыг амар тайван хийх боломжтой байв.

Saints, 2:17, 64–67

Он жилүүд өнгөрөхийн хэрээр гэгээнтнүүд илүү олноороо ирсэн. Тэд хүмүүст Их Эзэнтэй гэрээнүүд байгуулж болох олон олон ариун сүмийг барьсан. Тэд Есүс Христийн сайн мэдээг заах номлогчдыг дэлхий даяар илгээсэн юм. Аврагчийн Сүм өсөн хөгжиж, газар газрын Тэнгэрлэг Эцэгийн хүүхдүүдийг адисалсаар байлаа.