Халамжийн нийгэмлэг

Наувугийн эмэгтэйчүүд Их Эзэнд үйлчилсэн нь

Маргарэт Күүк, Сара Кимбалл хоёр Наувуд баригдаж байгаа шинэ ариун сүмийн тухай ярьж байгаа нь.

Маргарэт Күүк Наувуд амьдардаг байжээ. Тэр Сара Кимбаллд юм оёход нь тусалдаг ажил хийдэг байлаа. Тэд ажлаа хийж байхдаа хамтдаа Наувуд баригдаж байгаа шинэ ариун сүмийн талаар ярих дуртай байв. Тэд ариун сүмийн төлөө ихэд догдолж байсан аж.

Гэгээнтнүүд, 1:447

Маргарэт ариун сүмийн ажилчид хуучин хувцастай байхыг харж байгаа нь

Нэгэн өдөр Маргарэт ариун сүмийг барьж буй эрэгтэйчүүдийн олон нь хуучирч муудсан хувцастай байхыг анзаарчээ. Сара тэр хоёр тэдгээр эрэгтэйчүүдэд зориулан шинэ цамц оёж болох юм гэж бодов. Энэ санаа Сарад таалагджээ. Маргарэт тэр хоёр уг ажилчдад туслах бүлэг байгуулах талаар бусад эмэгтэйчүүдтэй ярилцсан байна.

Гэгээнтнүүд, 1:447–448

Иосеф Смит Сүмийн Халамжийн нийгэмлэгийг байгуулахаар Маргарэт, Сара болон бусад хүмүүстэй уулзаж байгаа нь

Их Эзэн тэдний гаргасан санаанд баяртай байгаа ба тэдэнд зориулсан илүү сайхан зүйл Түүнд байгаа гэдгийг бошиглогч Иосеф хэлэв. Иосеф тэдгээр эмэгтэйчүүдийг 1842 оны 3-р сарын 17-ны өдөр өөртэй нь уулзахад урьжээ. Тэр санваарын эрх мэдлээ ашиглан, Сүмийн эмэгтэйчүүдийг зохион байгуулав. Тэд өөрсдийн бүлгээ Наувугийн эмэгтэйчүүдийн Халамжийн нийгэмлэг гэж нэрлэхээр шийджээ.

Гэгээнтнүүд, 1:448, 450–451

Маргарэт хоёр эмэгтэйтэй ярилцаж байгаа нь.

Иосеф Халамжийн нийгэмлэгийг ариун сүмийн адислалууд болон мөнх амьдралд бэлтгэхэд нь хүмүүст туслахыг хүсэв. Тэд Есүсийг дагах үлгэр жишээ байх ёстой.

Гэгээнтнүүд, 1:451

Халамжийн нийгэмлэгийн гишүүд тусламж хэрэгтэй гэр бүлд хоол хүнс авчирч өгч байгаа нь.

Иосеф мөн Халамжийн нийгэмлэгийг ядуу хүмүүсийг олж, тэдэнд туслах хэрэгтэй гэж хэлэв. Ядуу эмэгтэйчүүд хүртэл тусламж хэрэгтэй хүмүүст туслахыг хүсэж байлаа.

Гэгээнтнүүд, 1:449

Халамжийн нийгэмлэг зохион байгуулагдаж байгаа нь.

Халамжийн нийгэмлэг зохион байгуулагдав. Эмма Смит ерөнхийлөгчөөр нь дуудагджээ. Тэр Сара Кливлэнд, Анн Витней хоёрыг зөвлөхөөрөө дуудав. Тэр бас нарийн бичгээр Элиза Р.Снөү эгчийг дуудсан аж.

Гэгээнтнүүд, 1:450

Эмма Халамжийн нийгэмлэгийн эмэгтэйчүүдэд зааж байгаа нь.

Их Эзэн Эммад дуудлагаа биелүүлэхэд нь туслав. Эмма эмэгтэйчүүдэд Их Эзэний үйлчлэлд агуу зүйлсийг хийж чадна хэмээн заасан байна. Тэрээр тэдний хүн нэг бүрээс сайныг үйлдэх аргыг эрж олохыг хүсэв. Хамгийн чухал нь бусдыг Есүсийн адилаар хайрлах хэрэгтэй гэдгийг тэр тэдэнд хэлжээ. Наувуд олон эмэгтэй Халамжийн нийгэмлэгт элссэн юм.

Сургаал ба Гэрээнүүд 25:3, 7; Гэгээнтнүүд, 1:451

Сүмийн эмэгтэйчүүд дэлхий даяарх хүмүүст хэрхэн тусалж байгааг харуулсан эвлүүлэг зураг.

Тэд хүмүүст ариун сүмийн адислалуудад бэлтгэхэд нь тусалсан бөгөөд Науву дахь тусламж хэрэгтэй олон гэр бүлд тусалжээ. Түүнээс хойш дэлхий даяарх эмэгтэйчүүд Халамжийн нийгэмлэгт нэгдсэн юм. Тэд хүмүүст үргэлжлүүлэн үйлчилж, ариун сүмийн адислалуудыг хүлээн авахад нь тусалсаар байна.

Гэгээнтнүүд, 1:451