Ko Hono Ako mo Akoʻi e Ongoongolelei ʻo Sīsū Kalaisí

Naʻe akonaki ʻa Palesiteni Lāsolo M. Nalesoni ʻo pehē: “Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. Ako lahi ange fekauʻaki mo ʻEne Fakaleleí, ʻEne ʻofá, ʻEne ʻaloʻofá, ʻEne tokāteliné, mo ʻEne ongoongolelei ʻo e faifakamoʻuí mo e fakalakalaká kuo fakafoki maí. Tafoki kiate Ia! Muimui ʻiate Ia!” Kuo tali fēfē hoʻo ngaahi fehuʻí mo e ngaahi palopalemá ʻi hoʻo ako ki he moʻui mo e ngaahi akonaki ʻa e Fakamoʻuí? Kuo tokoniʻi fēfē koe ʻe hoʻo tuí ke ke ako ʻa e ngaahi tali naʻá ke fiemaʻu lolotonga e ngaahi taimi ko iá? Fakakaukau ki he meʻa te ke lava ʻo ako fekauʻaki mo e Fakamoʻuí ʻi he uike ní ʻi he akó mo e tuí ʻe lava ʻo tokoni atu ʻi ha fehuʻi pe hohaʻa ʻokú ke fehangahangai mo ia he ʻahó ni. Te ke lava ʻo hiki ha palani pea fokotuʻu leva ha ngaahi fakamanatu ke muimuiʻi.

Lau pea fakalaulauloto ki he akonaki ʻa e ʻEikí ʻi he Tokāteline mo e Ngaahi Fuakava 88:118. Ko e hā e faikehekehe ʻo e ʻilo ʻi he akó pea mo e ʻilo ʻi he tuí? ʻOku ngāue fakataha fēfē ʻa e ongo tefitoʻi moʻoní? ʻOku kehe nai ʻetau founga ako ʻo e ongoongoleleí mei hono ako ʻi he akó pe ako ha meʻa ʻi he ʻinitanetí? Ko e hā hono ʻuhingá? Pea ko e hā e ʻuhinga ʻa e ʻEikí ki he “ngaahi tohi lelei tahá”? Te mou lava ʻo takitaha ako ha konga mei he “ʻE Fakatauʻatāinaʻi Koe ʻe he Moʻoní” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí pea talanoa leva ki he ngaahi meʻa ʻokú ke ako ʻoku felāveʻi mo e ngaahi tāpuaki ʻo hono maʻu e ʻiló. Fakakaukau ke fokotuʻu ha taumuʻa ʻoku felāveʻi mo ha meʻa ʻokú ke ako.

ʻAlamā 1:26; 31:5; Tokāteline mo e Ngaahi Fuakava 93:53

David A. Bednar, “Ko e Ako ʻi he Founga ʻa e ʻEikí,” Liahona, ʻOkatopa 2018, 50–53

Ulisses Soares, “Ofo ʻia Kalaisi mo ʻEne Ongoongoleleí,” Liahona, Mē 2022, 115–17

“Fakaafeʻi ʻa e Ako Fakamātoató,” Ko e Faiako ʻi he Founga ʻa e Fakamoʻuí (2022), 24–27

ʻOku tokoni e talateu ki he Haʻu, ʻo Muimui ʻIate Aú ke mahino kiate kitautolu ʻa e ʻuhinga ʻoku hoko ai e faiakó ko ha fatongia toputapú. ʻOku pehē ai: “Ko e taumuʻa ʻo e ako mo e akoʻi kotoa pē ʻo e ongoongoleleí ko hono fakaloloto ʻetau uluí mo tokoni ke tau hoko ʻo hangē ange ko Sīsū Kalaisí.” Te ke lava ʻo fili ha konga ke ako ʻi he Ko e Faiako ʻi he Founga ʻa e Fakamoʻuí ke tokoni atu ke ke faiako ʻo hangē ange ko Sīsū Kalaisí. ʻE founga fēfē hoʻo akoʻi lelei ange ʻa e ongoongoleleí koeʻuhí ke ne tataki koe mo e niʻihi kehé ke hoko ʻo hangē ange ko Iá? Ko e hā ha fanga kiʻi meʻa iiki te ke lava ʻo fai ke akoʻi lelei ange ai ʻa e ongoongoleleí ʻi ʻapi, ʻi he lotú, pe ʻi ha ngaahi feituʻu kehé? Te ke lava fēfē ʻo feinga ke ako fakamātoato ange ʻa e ongoongoleleí kae lava ke ke akoʻi lelei ange ia ki he niʻihi kehé?

ʻI he pōpoaki konifelenisi lahi ʻa ʻEletā Sione C. Pingilī ko e Siʻí ko e “Moʻoni Taʻengatá,” naʻá ne akonaki ai ʻo pehē: “Ko ʻetau taumuʻá ke akoʻi ʻa e moʻoní ʻi ha founga te ne fakaafeʻi ʻa e mālohi fakaului ʻo e Laumālie Māʻoniʻoní.” Naʻá ne vahevahe leva ha ngaahi fakaafe faingofua mei he ʻEikí mo ʻEne kau palōfitá ʻe lava ʻo tokoni mai ke tau fakaafeʻi ʻa e Laumālié ʻi heʻetau faiakó. Te mou lava ʻo aleaʻi ʻa e ngaahi tefitoʻi moʻoni ʻe fitu ko ʻení mo e founga te nau lava ai ʻo tokoniʻi kitautolu ke tau akoʻi ʻa e ongoongoleleí ʻaki ʻa e mālohi ʻi he Laumālié. Mahalo te mou lava ʻo maʻu ha founga fakafiefia ke mou fetokoniʻaki ai ke manatuʻi ʻa e ngaahi tefitoʻi moʻoni ʻe fitú ke mou lava ʻo fakaʻaongaʻi kinautolu, hangē ko hono faʻu hano fakanounouʻi (acronym) pe ko ha meʻangāue ako maʻuloto kehe.

ʻI he Ko e Faiako ʻi he Founga ʻa e Fakamoʻuí, naʻe fakaafe mai ai ʻa e Kau Palesitenisī ʻUluakí: “Ako lahi ange fekauʻaki mo Sīsū Kalaisi mo e founga naʻá Ne akoʻi ʻaki ʻa e ongoongoleleí. Ako ʻi he faʻa lotu ʻa ʻEne ngaahi folofolá, ngaahi meʻa naʻá Ne fakahokó, mo Hono ngaahi ʻulungāngá, pea feinga ke muimui ofi ange kiate Ia.” Aleaʻi ha niʻihi ʻo e ngaahi folofola, ngāue, mo e ngaahi ʻulungaanga ʻo e Fakamoʻuí. Te nau tokoniʻi fēfē koe ke ke fakaafeʻi ʻa e Laumālié ʻi he taimi ʻokú ke akoʻi ai ʻa e ongoongoleleí? ʻOku vahevahe foki ʻi he Ko e Faiako ʻi he Founga ʻa e Fakamoʻuí ʻa e ngaahi tefitoʻi moʻoni ʻe fā ko ʻeni ʻo e faiako faka-Kalaisí: ʻofa ʻi he niʻihi ʻokú ke akoʻí, faiako ʻaki e Laumālié, akoʻi ʻa e tokāteliné, pea fakaafeʻi ʻa e ako fakamātoató. Talanoa ki ha ngaahi founga te ke lava ai ʻo fakaʻaongaʻi ʻa e ngaahi tefitoʻi moʻoni ko ʻení ʻi hoʻo akoʻi ʻa e ngaahi moʻoni ʻo e ongoongoleleí ʻi ʻapí, ʻi he lotú, pea mo ha toe feituʻu pē. Te ke lava foki ʻo fakakakato ʻa e vakaiʻi fakataautaha ʻi he peesi 37 ʻo e Ko e Faiako ʻi he Founga ʻa e Fakamoʻuí. Te mou lava ʻo aleaʻi e ngaahi fakakaukau ʻokú ke maʻú pea fakakaukauʻi ʻi he faʻa lotu pe ʻoku ʻi ai ha ngaahi liliu te ke fie fai ʻi he founga hoʻo teuteu mo akoʻi e ongoongolelei ʻo Kalaisí.

Sione 14:16–17, 26; ʻAlamā 37:33–37; Tokāteline mo e Ngaahi Fuakava 11:21–22; 42:12–17; 88:122

Jeffrey R. Holland, “A Teacher Come from God,” Ensign, May 1998, 25–27

Dieter F. Uchtdorf, “Ko Ha Lisi Vakaiʻi ʻa e Faiakó” (lea ne fakahoko lolotonga e fakamafola Ko e Faiako ʻi he Founga ʻa e Fakamoʻuí, 12 Sune 2022), Gospel Library

Neil L. Andersen, “Ko e Mālohi ʻo Sīsū Kalaisí mo e Tokāteline Haohaoá” (fakamafola ki hono akoʻi ʻo e toʻu tupú mo e kakai lalahi kei talavoú, 11 Sune 2023), Gospel Library

“Invite Diligent Learning” (vitiō), Gospel Library

Fakakaukau ki he mana ʻo e liliu ha kiʻi tengaʻi ʻakau ki ha fuʻu ʻakau lahi ʻi hoʻo lau mo fakalaulauloto ki he ʻAlamā 32:28–31. Hili iá pea lau ʻa e faleʻi ko ʻeni meia Brother Seni E. Niumaní: “ʻE maʻu ʻe he fānaú ha ngaahi meʻa lahi mei heʻenau mātuʻá, ka ʻoku ʻikai kau ai ʻa e fakamoʻoní. He ʻikai ke tau lava ʻo ʻoange ki heʻetau fānaú ha fakamoʻoni ʻo hangē pē ko e ʻikai ke tau lava ʻo fakamālohiʻi ha tengaʻi ʻakau ke tupú. Ka te tau lava ʻo fokotuʻu ha ʻātakai ʻoku ʻi ai ha kelekele lelei pea hao mei he ngaahi fakafeʻātungia te ne ʻfakakāsiaʻi ʻa e folofolá.ʼ Te tau lava ʻo fāifeinga ke fokotuʻu e ngaahi tūkunga leleí kae lava ʻetau fānaú—mo e niʻihi kehe ʻoku tau ʻofa aí—ʻo maʻu ha feituʻu maʻá e tengaʻi ʻakaú, ‘fanongo ki he folofolá, pea [mahino] ia’ [vaka, Mātiu 13:18–23] pea ʻiloʻi ʻiate kinautolu pē ‘ʻoku lelei ʻa e tengá’ [ʻAlamā 32:30].” Ko e hā ha meʻa te ne tokoniʻi ho ʻapí ke hoko ko ha ʻātakai ʻoku ʻi ai ha kelekele lelei maʻau pe ko hoʻo fāmilí ke ako e ngaahi moʻoni taʻengatá? Te mou lava fēfē ʻo fetokoniʻaki ke ako fekauʻaki mo e lelei ʻo e ongoongoleleí? Ko e hā ha meʻa te ke lava ʻo fai ke tanumaki mo fefakamālohiaʻaki ai hoʻomou ngaahi fakamoʻoni kia Kalaisí?

Naʻe akonaki ʻa ʻEletā Tēvita A. Petinā ʻo pehē: “Kapau ko e meʻa pē ʻokú ta ʻilo kau kia Sīsū Kalaisi pea mo ʻEne ongoongolelei kuo fakafoki maí, ʻa e meʻa kuo akoʻi mo talamai ʻe he kakaí, pea tā ko e fakavaʻe ʻo ʻeta fakamoʻoni kiate Ia mo ʻEne ngāue nāunauʻia ʻi he ngaahi ʻaho kimui ní ʻoku langa ia ʻi he ʻoneʻoné [vakai, Mātiu 7:24–27]. ʻOku ʻikai totonu ke tau fakafalala ʻataʻatā pē pe kole e maama ʻo e ongoongoleleí mei ha kakai kehe—pea naʻa mo kinautolu ʻoku tau ʻofa mo falala ki aí.” Fakakaukau ki he ngaahi lea ʻa ʻEletā Petinaá ʻi hoʻomou lau fakataha ʻa e Hilamani 5:12. Te ke lava ʻo fakalaulauloto mo talanoa fekauʻaki mo e kupuʻi lea mo e veesi ko ʻení ʻi hoʻo sio ki ha tā ʻo ha matātahi pe matāfanga (pe ʻi hoʻo lue ʻi he matāfanga ʻo ha anovai, vaitafe, pe ano). Fakakaukau ki he ʻuhinga ʻoku ʻikai langa ai ʻe he kakaí honau ngaahi ʻapí ʻi he ʻoneʻoné. Ko e hā e faʻahinga fakavaʻe ʻoku nau langa aí? Ko e hā te ke lava ʻo fai ke langa ai hoʻo fakamoʻoní ʻi ha fakavaʻe mālohi? Ko e hā ha ngaahi tōʻonga moʻui ki hono ako ʻo e ongoongoleleí te ke lava ʻo kamata pe toe tukupā ke muimui ki ai he ʻaho ní? Te mou lava ʻo hivaʻi fakataha ha foʻi hiva hangē ko e “Ko e Tangata Potó mo e Tangata Valé” pe “ʻE Kāinga Kuo Langa Ha Tuʻunga” ʻi hoʻo fakakaukau ki hono langa hoʻo moʻuí ʻi he fakavaʻe mālohi ʻo e ongoongolelei ʻo Sīsū Kalaisí.

Talanoa nounou fekauʻaki mo e ʻuhinga ʻoku fili ai ʻa e kakaí ke toe fakaleleiʻi honau ngaahi ʻapí. Te mou lava foki ʻo sio ki ha ʻū tā ʻo ha ngaahi ʻapi ʻoku fakaleleiʻi lahi. Ko e hā ha ola ʻo hano fakaleleiʻi lelei ʻo ha ʻapi? Kuo akoʻi ʻe Palesiteni Nalesoni ko hono ako ko ia ʻo e ongoongoleleí “ʻe malava … ʻo tukuange mai [ai] e mālohi ʻo e ngaahi fāmilí, ʻi he muimui faivelenga ki ai ʻa e fāmili takitaha mo liliu honau ʻapí ke hoko ko ha ungaʻanga ʻo e tuí. ʻOku ou palōmesi atu ʻi hoʻomou ngāue mālohi ke fakafoʻou homou ʻapí ke hoko ko ha senitā ki hono ako ʻo e ongoongoleleí … ʻe fiefia hoʻo fānaú ke ako pea moʻui ʻaki e ngaahi akonaki ʻa e Fakamoʻuí. … ʻE hoko ha ngaahi liliu lahi mo tuʻuloa ʻi homou fāmilí.” Talanoa mo ho fāmilí pe niʻihi kehe ʻoku mou nofó fekauʻaki mo e ngaahi liliu te mou fie mamata ki aí. Te mou lava fēfē ʻo “fakafoʻou” homou ʻapí ke hoko ko ha senitā lelei ange ki hono ako ʻo e ongoongoleleí? ʻE fakamālohia fēfē kimoutolu kotoa ʻi he fakaleleiʻi ʻa e ako ʻo e ongoongoleleí ʻoku fakatefito ʻi ʻapí? Ko e hā ha meʻa te ke lava ʻo fai ke fakahoko ai e ngaahi liliu ʻokú ke fiemaʻú, pea te ke fua fēfē hoʻo fakalakalaká?

Tokāteline mo e Ngaahi Fuakava 93:38–49; Mōsese 6:57–62

Devin G. Durrant, “Ko e Faiako ʻi ʻApí—ko ha Fatongia Fakafiefia mo Toputapu,” Liahona, Mē 2018, 42–45

Home-Centered Gospel Learning (fakatahatahaʻi ʻo e ngaahi maʻuʻanga tokoni ki hono ako ʻo e ongoongoleleí), ChurchofJesusChrist.org