Kau palōfitá

Talu mei he kuonga ʻo ʻĀtamá, mo hono fekauʻi mai ʻe he ʻOtuá ha kau palōfita ki Heʻene fānaú. Lolotonga e ngāue fakafaifekau ʻa e ʻEiki ko Sīsū Kalaisí ʻi he moʻui fakamatelie, naʻá Ne fokotuʻu Hono Siasí ʻi he fakavaʻe ʻo e kau ʻaposetolo mo e kau palōfita (vakai, ʻEfesō 2:19–20). Naʻe muimui ʻa e ʻOtuá ki he sīpinga tatau ko ʻení ʻi he ngaahi ʻaho kimui ní ʻi he taimi naʻá Ne ui ai ʻa e Palōfita ko Siosefa Sāmitá, fakafoki mai Hono Siasí, mo fokotuʻu ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá.

Ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e palōfita ʻa e ʻOtuá ki he kakai kotoa pē ʻo e māmaní. ʻOku tau poupouʻi e Palesiteni ʻo e Siasí ko ha palōfita, tangata kikite mo e tangata maʻu fakahā pea ko ia pē ʻi he māmaní ʻokú ne maʻu e mafai ʻa e ʻOtuá ke ne ngāue ʻaki ʻa e ngaahi kī kotoa ʻo e lakanga fakataulaʻeikí. ʻOku tau poupouʻi foki e ongo tokoni ʻi he Kau Palesitenisī ʻUluakí mo e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ko ha kau palōfita, kau tangata kikite, mo e kau tangata maʻu fakahā.

Fekauʻaki mo hono mahuʻinga ʻo e kau ʻaposetoló mo e kau palōfitá, naʻe fakatokangaʻi ʻe he Palōfita ko Siosefa Sāmitá: “Ko e ngaahi tefito‘i mo‘oni mahu‘inga ‘o ‘etau tui fakalotú ko e fakamo‘oni ko ia ‘a e kau ‘Aposetoló mo e kau Palōfitá ‘o fekau‘aki mo Sīsū Kalaisí, na‘e pekia, pea telio, pea toe tu‘u ‘i he ‘aho hono tolú, ‘o hā‘ele hake ki he langí; pea ko hono toenga ‘o e ngaahi me‘a kehe kotoa pē fekau‘aki mo ‘etau tui fakalotú ko ha ngaahi tānaki atu pē ki ai.”

Kuo fakamamafaʻi ʻe he ʻEiki ko Sīsū Kalaisí ʻa e mahuʻinga ke tali ʻEne kau palōfita mo e kau ʻaposetolo moʻuí. ʻOku tau fai ia ʻi heʻetau fakafanongo mo tokanga ki heʻenau faleʻí. “Ko ia ia ʻokú ne tali ʻeku kau tamaioʻeikí, ʻokú ne tali au; pea ko ia ia ʻokú ne tali aú ʻokú ne tali ʻeku Tamaí; pea ko ia ia ʻokú ne tali ʻeku Tamaí ʻokú ne maʻu ʻa e puleʻanga ʻo ʻeku Tamaí; ko ia ko e meʻa kotoa pē ʻoku maʻu ʻe heʻeku Tamaí, ʻe foaki ia kiate ia” (Tokāteline mo e Ngaahi Fuakava 84:36–38).

ʻOku fekauʻi kitautolu ʻe he ʻOtuá ke tau fakakaukau ki he ngaahi lea ʻa ʻEne kau tamaioʻeikí ʻo hangē pē ko Haʻane folofola tonú. Naʻá Ne folofola, “Neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (Tokāteline mo e Ngaahi Fuakava 1:38). Koeʻuhí ʻoku fekauʻi mai ʻe he ʻOtuá ʻEne kau palōfitá ke akoʻi mo tataki ʻEne fānaú mo teuteuʻi kinautolu ki he moʻui taʻengatá mo e hakeakiʻí, ʻe maluʻi mo tāpuekina kitautolu ʻi heʻetau tokanga kia Sīsū Kalaisi mo ʻEne kau tamaioʻeiki kuo filí (vakai Tokāteline mo e Ngaahi Fuakava 124:45–46).

ʻOku maʻu ʻe he kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi kī ʻo e lakanga fakataulaʻeikí ʻoku fiemaʻu ki hono fokotuʻutuʻu mo tataki e ngaahi ngāue ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (vakai Mātiu 16:16–19; Tokāteline mo e Ngaahi Fuakava 81:1–2). ʻOku talaʻofa ʻe he ʻEikí ʻe maʻu Hono mālohí ʻi he ngaahi fili naʻe fai ʻe he leʻo uouangataha ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. ʻI he Tohi Tuʻutuʻuni Fakakātoá ʻoku pehē ai: “Ko hono kotoa e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko e kau palōfita, kau tangata kikite, mo e kau tangata maʻu fakahā. ʻOku nau kau fakataha ʻo faʻu ʻa e Fakataha Alēlea ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. ʻI he malumalu ʻo e fakahinohino ʻa e ʻEikí pea ʻi he loto-taha, ʻoku maʻu ʻe he fakataha alēleá ni ʻa e mafai ke fakahā mo fakaʻuhingaʻi ʻa e tokāteliné mo fokotuʻu ha tuʻutuʻuni ki he Siasí (vakai, Tokāteline mo e Ngaahi Fuakava 1:38; 107:27–31).”

ʻI he talanoa ko ia ki he Kau Palesitenisī ʻUluakí, naʻe akonaki ʻa e Palōfita ko Siosefa Sāmitá: “‘Oku tokanga‘i ‘e he Kau Palesitení pe Kau Palesitenisī [‘Uluakí] ‘a e Siasí; pea ko e ngaahi fakahā mo e fakakaukau pea mo e finangalo ‘o e ‘Otuá ki he Siasí, kuo pau ke fakafou mai ia ‘i he Kau Palesitenisií. Ko e founga ʻeni ʻa e langí, mo e mālohi pea mo e faingamālie ʻo e Lakanga Fakataulaʻeikí [Faka-Melekisētekí].”

Neongo ʻoku ʻomi ʻe he ʻOtuá ha fakahā ʻo fakafou mai ʻi he kau palōfitá mo e kau ʻaposetoló ke tataki ʻaki ʻEne fānaú, ka ʻe lava ke maʻu ʻe he niʻihi fakafoʻituituí ha fakahā fakataautaha ke tokoni kiate kinautolu ʻi heʻenau ngaahi fiemaʻu paú, fatongiá, mo e ngaahi fehuʻí pea ke tokoni ke fakamālohia ʻenau fakamoʻoní. ʻE fenāpasi maʻu pē ʻa e ueʻi fakalaumālie fakataautaha mei he ʻEikí mo e fakahā ʻoku ʻomi ʻe he ʻOtuá ʻo fakafou ʻi Heʻene kau palōfitá.

ʻI he Fuakava Motuʻá, naʻe fakatatau ʻe he ʻEikí ʻa e fatongia ʻo ʻEne kau palōfitá ki ha “tangata leʻo” ʻa ia ko hono fatongiá ke fakatokanga ki he kakaí kau ki ha fakatamaki ʻoku tuʻunuku mai (vakai, ʻIsikeli 33:1–7). Lolotonga e ngāue fakafaifekau ʻa Sīsū Kalaisi ʻi he māmaní, naʻá Ne fakamamafaʻi e fiemaʻu ko ia ke fakatomalá (vakai, Mātiu 4:17; 7:13–14; Luke 5:32). ʻOku maʻu ʻe he kau palōfitá ʻa e fatongia ke fakahā ʻa e pōpoaki tatau pē—ʻo fakatokanga ki he kakai ʻa e ʻOtuá fekauʻaki mo e ngaahi nunuʻa ʻo e angahalá mo e faiangahalá pea akoʻi ʻa e fiemaʻu ke fakatomalá (vakai, Ngāue 10:43; Tokāteline mo e Ngaahi Fuakava 1:4–5).

Naʻe akonaki mai ʻe Palesiteni Lāsolo M. Nalesoni: “He ʻikai mahino maʻu pē kiate koe ʻa e fakahā kotoa ʻa ha palōfita moʻui. Ka ʻi he taimi ʻokú ke ʻiloʻi ko e palōfitá ko ha palōfita, te ke lava ʻo hū ki he ʻEikí ʻi he loto-fakatōkilalo mo e tui pea kolea haʻo fakamoʻoni fekauʻaki mo ha meʻa pē kuo fakahā ʻe Heʻene palōfitá.”

ʻI he ʻaho naʻe fokotuʻu ai ʻa e Siasi ʻo Sīsū Kalaisí, naʻe fekauʻi ʻe he ʻEikí ʻa Hono kakaí ke nau tali ʻa e ngaahi lea ʻa ʻEne palōfitá “ʻo hangē ko e lea ia mei [Hono] ngutu [ʻOʻoná], ʻi he kātaki mo e tui kotoa pē” (vakai, Tokāteline mo e Ngaahi Fuakava 21:4–5). ʻOku fokotuʻu mai ʻe he fakahinohino fakalangi ko ʻení, he ʻikai faingofua maʻu pē ke tali e ngaahi lea pe akonaki ʻa ha palōfita. Mahalo he ʻikai ke tau ongoʻi he taimi pē ko iá hano fakapapauʻi fakalaumālie mai honau mahuʻingá. Ko e ʻuhinga ia ʻoku fakamanatu mai ai ʻe he ʻEikí ke tau ngāue ʻaki ʻa e faʻa kātakí mo e tuí lolotonga ʻetau tatali ke maʻu ha mahino ʻoku maʻalaʻala angé. Naʻe talaʻofa mai ʻe he ʻEikí ha ngaahi tāpuaki maʻongoʻonga kiate kinautolu te nau falala ki Heʻene kau palōfitá ʻi he faʻa kātaki mo e tuí (vakai, Tokāteline mo e Ngaahi Fuakava 21:6).