Feilaulaú

Naʻe ʻahiʻahiʻi e tui ʻa ʻĒpalahamé ʻi he taimi naʻe fekauʻi ai ia ʻe he ʻOtuá ke ne feilaulauʻi hono foha ko ʻAisaké. Fakakaukau ke lau ʻa e Sēnesi 22; Hepelū 11:17–19; mo e Sēkope 4:5, fekauʻaki mo e feilaulau naʻe fekau ʻe he ʻOtuá ke fakahoko ʻe ʻĒpalahamé. ʻI hoʻo fai iá, fakakaukau ki he feilaulau naʻe fai ʻe he ʻOtuá ʻi hono feilaulauʻi Hono ʻAlo pē Taha naʻe Fakatupú, ʻa Sīsū Kalaisí, pea mo e feilaulau naʻe fai ʻe he Fakamoʻuí ʻi hono foaki ʻEne moʻuí. Ko e hā ʻoku akoʻi atu ʻe he Laumālié fekauʻaki mo e ngaahi feilaulau ʻa e Tamaí mo e Fakamoʻuí ʻi hoʻo lau e ngaahi potufolofola ko ʻení?

ʻI he taimi naʻe fakahoko ai ʻe Sīsū Kalaisi ʻEne Fakaleleí, “naʻe fetongi ʻe he ouau ʻo e sākalamēnití ʻa e ouau ʻo e feilaulaú.” Fakakaukau ke hivaʻi ha ngaahi himi sākalamēniti hangē ko e “Ne Kalusefai ʻa e ʻEikí” pe “Naʻe Lahi Fau ʻa e ʻOfa.” Te ke lava foki ʻo lau ʻa e ngaahi potufolofola ʻoku fekauʻaki mo e himi takitaha pea aleaʻi ʻa e founga te ke lava ai ʻo teuteu ki he sākalamēnití ʻi he uike takitaha. Ko e hā ha founga ʻe hoko ai e fakaukau ki he sākalamēnití ko ha faingamālie ke feilaulauʻi ha meʻa ki he ʻEikí, ke toe mahuʻingamālie ange ai hoʻo moihuú?

Levitiko 1:2–3, 10; ʻAlamā 34:8–14; Ngaahi Tefito ʻo e Tuí 1:3

Jeffrey R. Holland, “Vakai ki he Lami ʻa e ʻOtuá,” Liahona, Mē 2019, 44–46

Tracy Y. Browning, “Vakai Lahi Ange kia Sīsū Kalaisi ʻi Heʻetau Moʻuí,” Liahona, Nōvema 2022, 13–15

ʻOku fakanatula pē ke tau fifili pe ʻoku ʻafioʻi mo tali ʻe he ʻEikí ʻa e ngaahi feilaulau ʻokú ke fai ke muimui ai kiate Iá. Fakalaulauloto ki he folofola ʻa e ʻEikí kia Sīosefa Sāmita ʻi he Tokāteline mo e Ngaahi Fuakava 132:49–50. Ko e hā ha ngaahi tāpuaki naʻe talaʻofa maʻa Siosefa koeʻuhí ko ʻene ngaahi feilaulaú? Kuo tāpuekina fēfē nai koe makatuʻunga ʻi he ngaahi feilaulau kuó ke fai maʻá e ʻOtuá? Te ke lava ʻo hiki ha lisi ʻo e ngaahi tāpuaki kuó ke maʻú pea fakakaukau ki ai ʻi he lolotonga ʻo e uiké.

Ko e founga ʻe taha ʻoku tau fakahaaʻi ai ʻetau ʻofa ki he ʻOtuá ko ʻetau fai ha ngaahi feilaulau ke haʻu kiate Ia. ʻI lea ʻa ʻEletā Tieta F. ʻUkitofa, “Kotoa Hotau Lotó,” naʻá ne fakamatalaʻi ai ko ʻetau feilaulaú ʻe lava pē ko hano tukuange ia ʻetau ngaahi holi fakatāutahá mo e fiemālié kae lava ke tau muimui kakato ange ki he Fakamoʻuí. Fakakaukau ke lau e lea ʻa ʻEletā ʻUkitofá mo fakalaulauloto ki he founga te ke lava ai ʻo foaki kotoa ho lotó kia Sīsū Kalaisí. Ko e hā te ke lava ʻo feilaulauʻi ke ke muimui lelei ange ai ki he Fakamoʻuí ʻo laka ange ʻi he kuohilí?

ʻI he vitiō “A Broken Heart, Contrite Spirit, and Godly Sorrow” (3:58), naʻe fakamatalaʻi ai ʻe ʻEletā Niila L. ʻEnitaseni, ʻoku ʻuhinga hono foaki ko ia ki he ʻEikí ha loto-mafesifesi mo ha laumālie fakatomalá, ki he “hoko ʻo anga tatau mo ha tamasiʻi siʻi.” Te mou lava ʻo mamata ʻi he vitiō ko ʻení pea aleaʻi ʻa e ngaahi ʻulungaanga ʻoku maʻu ʻe he fānaú ʻoku totonu ke tau fekumi ki ai ʻi hono feilaulauʻi hotau lotó ki he ʻOtuá. Te ke lava foki ʻo vahevahe ha ngaahi aʻusia kuó ke maʻu mo e fānaú ʻokú ne fakahaaʻi ai ʻa e meʻa te tau lava ʻo ako mei honau ngaahi ʻulungāngá.

Saame 51:16–17; Sione 6:38; 2 Nīfai 2:6–7; 4:32

Neill F. Marriott, “Ko Hono Fakavaivaiʻi Hotau Lotó ki he ʻOtuá,” Liahona, Nōvema 2015, 30–32

Ko e founga ʻe taha ʻe lava ai ke tau feilaulau he ʻaho kotoa peé ko hono foaki hotau taimí ki he ʻEikí. ʻE lava ke kau heni ʻa e ngaahi meʻa hangē ko hono fakahoko hotau ngaahi uiuiʻí pe fetauhiʻakí. Naʻe akonaki mai ʻa Palesiteni Tāleni H. ʻOakesi, “Ko ʻetau moʻui ngāue tokoní [mo e feilaulaú] ko e ngaahi fakaʻilonga feʻunga taha ia ʻo ʻetau tukupā ke tau tauhi ki he ʻEikí mo hotau kāingá.” ʻOku founga fēfē nai hoʻo feilaulauʻi maʻu pē ho taimí ki he ʻEikí? Fakalaulauloto ki he founga kuo tokoniʻi ai koe ʻe hoʻo fai iá ke ke ofi ange ai kia Kalaisi pea hoko ʻo māʻoniʻoni angé.

ʻOku ʻi ai e taimi ʻe niʻihi ʻe lava ke ongoʻi siʻisiʻi mo taʻe mahuʻinga ʻa e ngaahi feilaulau fakaʻaho ʻoku tau fai ko e kau ākonga ʻa Kalaisí. Ka ʻoku mahuʻinga ʻa e ngaahi feilaulau ko ʻení ki he ʻEikí. Lau ʻa e Tokāteline mo e Ngaahi Fuakava 64:33 ke ʻilo ki he anga ʻEne ʻafioʻi ʻetau ngaahi ngāué, ʻo tatau ai pē pe ʻoku siʻisiʻi fēfē. ʻOku ʻoatu fēfē nai ʻe he veesi ko ʻení ha loto-toʻa ke ke kei fakahoko ha fanga kiʻi feilaulau iiki mo fakaʻaho maʻá e ʻEikí?

ʻI he vitiō “A Sacrifice of Time” (2:53), naʻe akonaki mai ai ʻa Palesiteni Lāsolo M. Nalesoni, “Naʻe ʻikai lava ke fakahaohaoaʻi ʻetau ngaahi kuí taʻe kau ai kitautolu, pea he ʻikai lava ke fakahaohaoaʻi kitautolu taʻe kau ai kinautolu.” ʻI heʻetau fakahoko maʻu pē ʻa e ngāue fakatemipalé mo e hisitōlia fakafāmilí, ʻoku tau hoko ai ʻo māʻoniʻoni ange, ʻo hangē ko Sīsū Kalaisí. Mamataʻi fakataha ʻa e foʻi vitiō “A Sacrifice of Time”, pea vahevahe ʻa e founga kuo faitāpuekina ai koe ʻe hoʻo vahevahe hoʻo taimí ke fai e ngāue fakatemipalé mo e hisitōlia fakafāmilí. Ko e hā ʻokú ke ako mei he ngaahi aʻusia ʻa e niʻihi kehé, ʻokú ne ueʻi ai koe ke ke hokohoko atu pe kamata feilaulauʻi ho taimí ʻi he foungá ni?

ʻOku lahi ha ngaahi founga te ke lava ai ʻo feilaulauʻi ha meʻa maʻá e ʻEikí mo e niʻihi kehé taʻe te ke fakatokangaʻi ia. ʻI he taimi ʻokú ke tauhi ai hoʻo ngaahi fuakavá, tokoni ki haʻo kaungāmeʻa pe mēmipa ʻo e fāmilí, totongi hoʻo vahehongofulú, pe vahevahe ho ngaahi talēnití, ʻokú ke feilaulau ai maʻá e ʻOtuá mo ʻEne fānaú. Hiki ha lisi ʻo ha ngaahi founga pau ʻokú ke feilaulau fakaʻaho ai ke hoko ko ha ākonga ʻa Kalaisi. Te ke lava leva ʻo talanoa kau ki he founga ʻoku takiekina ai ʻe hoʻo lau e ngaahi meʻa ko ʻení ko e feilaulaú, ki hoʻo tuʻunga fakaākongá mo tokoni ke ke ofi ange kiate Iá.

1 Fakamatala Meʻa Hokohoko 16:29; Luke 18:22; Loma 12:1; Tokāteline mo e Ngaahi Fuakava 138:12–13

Jeffrey R. Holland, “Called to Serve,” Liahona, Nov. 2002, 36–38