Maysa a “Panagsardeng” iti Ghana

Maysa a misionario ni Alice Johnson nga agserserbi iti pagilianna a Ghana. Pagay-ayatna nga ibinglay ti pammaneknekna maipapan ken ni Jesucristo ken tumultulong iti panagdakkel ti Simbaan.

Saints, 4:416–17

Maysa nga aldaw, adda sumagmamano a makapaupay a damag a naawat ni Alice. Kinuna ti gobierno iti Ghana a saanen a mabalin nga adda dagiti miting iti Simbaan. Saanen a makaisuro dagiti misionario.

Saints, 4:417

Pinaruar dagiti pulis dagiti misionario iti apartmentda ken innalada dagiti bisikletada. Sumagmamano a miembro ti Simbaan ti naibalud. Inkandado dagiti soldado dagiti pasdek ti Simbaan ket awan ti asino man a pinalubosanda a sumrek. Aw-awagan dagiti tao daytoy a “ti panagsardeng.”

Saints, 4:417–18

Nasken nga agawid dagiti misionario. Napan nakipagnaed ni Alice iti maysa a gayyemna iti sabali nga ili. Madanagan a dinanto kaano man malpas ti misionna.

Saints, 4:418

Natikaw, nalidayan, ken nagbuteng dagiti Santo iti Ghana. Pinampanunotda no ania ti biddut nga inaramidda. Makapandanto kadi manen iti simbaan?

Saints, 4:418

Uray no saanda a makapaguummong kadagiti wardda, ay-ayaten latta dagiti Santo ti Apo ken kayatda ti agdaydayaw Kenkuana. Inangayda dagiti miting ti sakramento kadagiti pagtaenganda. Dagiti miembro ti pamilia nga addaan iti kinasaserdote ti nangbendision iti tinapay ken danum ken impasada daytoy iti dadduma pay a miembro ti pamilia.

Doktrina ken Katulagan 6:32; Saints, 4:419

Binulan a nagtultuloy ti panagsardeng. Nagkanta dagiti Santo kadagiti himno ken insuroda ti ebanghelio iti pagtaenganda. Sinarungkaranda ti tunggal maysa tapno agtalinaed a natibker ti pammatida. Inlasinda ti apagkapulloda a pagbayadda inton mabalindan ti agsubli iti simbaan. Nagkararag ken nagayunoda nga aggibus koman ti panagsardeng.

Saints, 4:436–37

Kamaudiananna, kalpasan ti 18 a bulan, inkeddeng ti gobierno a mabalin manen ti Simbaan ti mangangay kadagiti miting. Maysa a baro a presidente ti mision ti nagkiddaw a makisarita ken ni Alice, a maysa itan nga estudiante iti kolehio. “Kayatmo kadi ti agsubli ken agserbi iti mision kalpasan ti panageskuela?” dinamagna. “Saan,” kinunana. “Kayatko ti agserbi itan!”

Saints, 4:437–39

Naragsakan unay ni Alice ken dagiti dadduma pay a Santo ta mabalinda manen ti mapan iti simbaan! Iti umuna a Domingo kalpasan ti panagsardeng, nagpaut ti miting ti sakramento iti dua nga oras gapu ta adu a tattao ti mayat a mangiburay kadagiti pammaneknekda. Imbagada iti tunggal maysa no kasano a binendisionan ida ti Apo ken tinulonganna ida a mangpatalinaed a napigsa ti pammatida.

Doktrina ken Katulagan 20:75; Saints, 4:438