“Maammuan da Joseph ken Sidney maipapan iti Langit,” Dagiti Estoria iti Doktrina ken Katulagan (2024)
“Maammuan da Joseph ken Sidney maipapan iti Langit,” Dagiti Estoria iti Doktrina ken Katulagan
Pebrero 1832
Maammuan da Joseph ken Sidney maipapan iti Langit
Maysa a parmata maipapan kadagiti bendision ti Dios para kadagiti annakna
Maysa nga aldaw, agbasbasa da Joseph Smith ken Sidney Rigdon iti Biblia. Binasada no ania ti mapasamak kadagiti tao kalpasan ti ipapatayda. Pinampanunot da Joseph ken Sidney no ania ti nabasada, ket kayatda a maammuan ti ad-adu pay.
Doktrina ken Katulagan 76:11–18
Inikkan ti Apo ida iti nakaskasdaaw a parmata. Nakitada ti Nailangitan nga Ama ken ni Jesucristo a napalikmutan kadagiti anghel. Nangngeganda ti maysa a timek a ni Jesus ti Anak ti Dios. Kinuna ti timek a natay ni Jesus para kadatayo ket kalpasanna nagungar—Isu ket nagbiag manen. Gapu ta nagungar Isuna, agungartayonto met.
Doktrina ken Katulagan 76:19–24, 39–43
Naammuan da Joseph ken Sidney a kalpasan ti panagungartayo, agbiagtayto iti maysa kadagiti tallo a lugar idiay langit, a maawagan kadagiti pagarian. Dagiti tao a saan nga umawat iti ebanghelio ni Jesucristo ket mapandanto iti telestial a pagarian. Indilig ti Apo daytoy a pagarian iti lawag dagiti bituen.
Doktrina ken Katulagan 76:81–86
Naammuan da Joseph ken Sidney maipapan iti pagarian a maawagan iti terestrial a pagarian. Daytoy a pagarian ket para kadagiti tao nga agbibiag iti nasayaat ngem saan a naan-anay nga agtulnog iti ebanghelio ni Jesucristo. Saanda a natibker iti pammatida Kenkuana. Indilig ti Apo daytoy a pagarian iti lawag ti bulan.
Doktrina ken Katulagan 76:71–80
Ti kangatuan a pagarian ti celestial a pagarian. Nagaramid dagiti tao iti daytoy a pagarian kadagiti katulagan, wenno kari, iti Dios ken tinungpalda dagiti katulaganda. Nagbabawi ken sinurotda ni Jesucristo. Makipagnaedda iti Nailangitan nga Ama ken ni Jesucristo iti agnanayon ken agbalinda a kas Kadakuada. Indilig ti Apo daytoy a pagarian iti lawag ti init.
Doktrina ken Katulagan 76:50–70
Imbaga ti Apo kada Joseph ken Sidney a saanda nga ibinglay ti amin a banag a nakitada iti parmatada. Ngem saanna a kayat nga isuratda maipapan iti sumagmamano iti daytoy ken ibinglayda daytoy kadagiti dadduma. Adu a miembro ti Simbaan ti nagagaran a mangibaga kadagiti tao maipapan iti parmata.
Doktrina ken Katulagan 76:113–119; Saints, 1:149–50
Saan a nagustuan dagiti dadduma a tao ti parmata. Naiduma daytoy iti no ania ti patpatienda. Ngem kaaduan kadagiti Santo ti nagyaman iti pannakaammoda maipapan iti daytoy a paltiing. Impakitana kadakuada nga ay-ayaten ti Nailangitan nga Ama dagiti annakna ken nangaramid iti maysa a wagas a makasublida Kenkuana.
Saints, 1:149–50