Da Parley ken Thankful Pratt

Pammati a mangsurot iti Espiritu

Da Parley Pratt ken Thankful Pratt ket mannalon iti Ohio. Maysa nga aldaw, narikna ni Parley ti Espiritu a mangibagbaga kenkuana a pumanaw iti pagtaenganna tapno mangisuro kadagiti tao maipapan iti Biblia.

Saints, 1:92

Da Parley ken Thankful a pumampanaw tapno mangisuro maipapan iti Biblia.

Inlako da Parley ken Thankful Pratt ti talonda. Saanda nga ammo no sadino ti papananda, ngem nagtalekda a bendisionan ida ti Dios gapu iti panagserbida Kenkuana.

Saints, 1:92

Ni Parley a bumabbaba iti bilog iti New York.

Nangitugot da Parley ken Thankful iti sumagmamano a kawes ken kuarta ket nagluganda iti maysa a bilog. Bayat ti panagdaliasatda iti New York, imbaga ti Espiritu ken ni Parley a bumaba iti bilog. Indawat ni Parley ken ni Thankful Pratt nga agtuloy nga awan isuna. Inkarina nga agsubli kenkuana iti mabiit. Nariknana nga adda maysa a banag a kayat ti Dios nga aramidenna iti New York.

Saints, 1:92

Ni Parley nga agsursuro maipapan Iti Libro ni Mormon.

Adayo ti pinagna ni Parley. Kamaudiananna dimteng iti pagtaengan ti maysa a mangaskasaba. Imbaga ti mangaskasaba ken ni Parley maipapan iti karkarna a libro nga inted kenkuana ti maysa a tao. Naggapu daytoy kadagiti pinanid a balitok ken naisurat iti nabayagen a panawen. Naawagan daytoy iti Libro ni Mormon. Maysa nga agtutubo a lalaki iti New York ti nangipatarus iti daytoy nga addaan iti bileg ti Dios.

Saints, 1:92

Ni Parley nga umaw-awat iti pammaneknek maipapan iti Libro ni Mormon.

Nausioso unay ni Parley. Impakita ti mangaskasaba ken ni Parley ti libro. Gapu ta magagaran, linukib ni Parley daytoy ket rinugianna a basaen. Naglabas ti adu nga oras, ngem dina maisardeng ti agbasa, uray pay mangan wenno maturog. Imbaga kenkuana ti Espiritu ti Apo a pudno daytoy.

Saints, 1:92–93

Da Parley ken Hyrum Smith nga agsarsarita maipapan Iti Libro ni Mormon.

Ipatpateg unay ni Parley ti Libro ni Mormon, kayatna a sapulen ti lalaki a nangipatarus iti daytoy. Pinagnana a mapan iti talon ti pamilia Smith, a sadiay a naam-ammona ni Hyrum, kabsat ni Joseph. Nagsaritada a nagpatnag. Imbaga ni Hyrum ken ni Parley a pudno ti Libro ni Mormon. Intedna ken ni Parley ti bukodna a kopia ti libro.

Saints, 1:93

Ni Parley nga agtultuloy nga agbasa iti Libro ni Mormon.

Bayat ti panagtultuloyna iti panagbasa, naammuan ni Parley a nabayagen a sinarungkaran ni Jesucristo dagiti tao iti America. Makita ni Parley a napatpateg ti Libro ni Mormon ngem iti amin a kinabaknang ti lubong. Dinan mauray ti panagsublina ken ni Thankful ken ibinglayna kenkuana dagiti nasursurona.

Saints, 1:93; 3 Nephi 11:1–12

Ni Parley a mangibingbinglay iti Libro ni Mormon ken ni Thankful ken ti pamiliana.

Imbaga ni Parley ken ni Thankful ken iti dadduma pay a miembro ti pamiliana maipapan iti Libro ni Mormon. Imbagana kadakuada no ania ti isuro daytoy maipapan ken ni Jesucristo. Naragsakan ni Thankful ta sinurot ni Parley ti Espiritu ken nasarakanna ti trabaho a kayat ti Dios nga aramidenna. Kas ken ni Parley, naammuan ni Thankful mismo a pudno ti Libro ni Mormon.

Saints, 1:98–99