Da Susa Young Gates ken Joseph F. Smith

Ni Susa Young Gates ti anak ni Brigham Young. Nayanak idiay Utah ken dimmakkel sadiay. Pagay-ayatna ti agsurat, ken pagay-ayatna ti agserbi iti Simbaan ti Apo.

Saints, 3:9–10, 64

Idi nataenganen ni Susa, nagsakit iti nakaro. Kiniddawna ti bendision ti kinasaserdote. Iti bendision, imbaga ti Apo ken ni Susa a kayatna nga aramidenna ti trabaho iti templo.

Saints, 3:193–94

Kalpasan ti pammendision, nalaingan ni Susa. Binubosna ti panawenna nga agsursuro maipapan iti pakasaritaan ti pamiliana. Idi nasarakanna dagiti miembro ti pamiliana a natay a saan a nabuniagan, napan iti templo tapno agpabuniag para kadakuada. Pagay-ayatna nga isarita iti tattao ti maipapan iti aramid iti pakasaritaan ti pamilia. Nakalkaldaang, ta adu a tattao ti saan nga interesado.

Saints, 3:194–95, 206

Maysa nga aldaw, sinarungkaran ni Susa ti gayyemna a ni Joseph F. Smith, ti Presidente ti Simbaan. Adu a lawasen a masakit ni Presidente Smith. Ammo ni Susa a nakalidliday pay isuna gapu ta natayen ti anakna a lalaki. Naliday pay gapu iti dadduma pay a banag a mapaspasamak iti lubong, kas kadagiti gubat ken saksakit.

Saints, 3:197–99, 205–6

Ngem idi nagtugaw da Susa ken Presidente Smith, naragsakan a makisarita kenkuana. Imbagana ken ni Susa a nangted ti Dios kenkuana iti maysa a naisangsangayan a parrmata. Maipapan amin daytoy iti lubong dagiti espiritu, a papanan dagiti tao kalpasan ti ipapatayda. Naisurat ti parmatana iti maysa a papel. Inted ni Presidente Smith ken ni Susa daytoy ket kiniddawna kenkuana a basaenna daytoy.

Saints, 3:206–7

Binasa ni Susa ti papel. Kinuna daytoy a sinarungkaran ni Jesucristo ti lubong dagiti espiritu. Imbaonna da Adan, Eva, ken ti dadduma pay a napudno a lallaki ken babbai a mangisuro kadagiti espiritu a saan pay a nakaawat iti ebanghelio bayat ti panagbiagda. Tultulonganda dagitoy nga espiritu nga agsagana tapno mabalin a mabuniagan dagiti tao para kadakuada iti templo.

Doktrina ken Katulagan 138:11–19, 29–48; Saints, 3:206–7

Nasdaaw ni Susa bayat ti panangbasana iti parmata ni Presidente Smith. Immisem kenkuana ni Presidente Smith. “Susa,” kinunana, “nasayaat ti ar-aramidem.” Imbagana kenkuana nga ay-ayatenna isuna gapu iti pammatina iti Apo.

Saints, 3:206

Insurat ni Susa ti maipapan iti paltiing iti diurnalna. “O, maysa daytoy a liwliwa kaniak!” kinunana. Dinan mauray nga ibagana daytoy kadagiti gagayyemna ken iti dadduma pay a miembro ti Simbaan. Ammona a ti parmata ni Presidente Smith ti makatulongto kadagiti Santo nga aggagar nga agaramid iti trabaho iti templo para iti tattao iti lubong dagiti espiritu.

Saints, 3:207