“Maipapan iti Doktrina ken Katulagan,” Dagiti Estoria iti Doktrina ken Katulagan (2024)
“Maipapan iti Doktrina ken Katulagan,” Dagiti Estoria iti Doktrina ken Katulagan
Pakauna
Maipapan iti Doktrina ken Katulagan
Agsao manen ti Apo
Ay-ayatennatayo ti Nailangitan nga Amatayo. Kayatna nga agaramidtayo kadagiti katulagan, wenno kari, Kenkuana tapno mabendisionannatayo. Imbaonna ti Anakna a ni Jesucristo, nga agbalin a Mangisalakantayo ken tulongannatayo nga agsubli Kenkuana.
Ibaon pay ti Dios dagiti propeta a mangisuro kadatayo maipapan ken ni Jesucristo ken dagiti bilinna. Agserbi dagiti propeta ken ni Jesucristo ken tumulongda a mangidaulo iti Simbaanna.
Ibaga ni Jesus kadagiti propeta no ania ti isuroda kadatayo. Naisurat dagiti balikas dagiti nagkauna a propeta kadagiti nasantuan a kasuratan a kas iti Biblia ken iti Libro ni Mormon.
Iti adu a tawen kalpasan ti kaadda ni Jesus ditoy daga, awanen dagiti propeta. Saanen nga agar-aramid ken agtungtungpal dagiti tao kadagiti katulagan iti Dios. Awanen idi ti daga ti Simbaan ni Jesucristo.
Ngem kalpasanna inawagan ti Dios ni Joseph Smith nga agbalin a propeta. Maysa nga agtutubo laeng ni Joseph, ngem adda napateg unay a banag nga impaaramid ti Dios kenkuana.
Insuro ni Joseph Smith ti maipapan ken ni Jesus. Timmulong a nangbukel iti Simbaan ni Jesus. Insuro ni Jesus ken ni Joseph Smith ti ebangheliona ken no kasano ti mangidaulo iti Simbaanna.
Adu a banag nga imbaga ni Jesus ken ni Joseph Smith ti naisurat iti Doktrina ken Katulagan. Ti Doktrina ken Katulagan ket maysa a libro ti nasantuan a kasuratan a kas iti Biblia ken Libro ni Mormon.
Dagiti Estoria iti Doktrina ken Katulagan isaritana no kasano nga insubli ni Jesus, ti Simbaanna, babaen ti tulong ni Propeta Joseph Smith ken ti dadduma pay. Maawagan iti Santo dagiti miembro ti Simbaan. Ipakita dagitoy nga estoria nga ay-ayaten ti Dios dagiti Annakna iti intero a lubong. Kayatna a bendisionannatayo no agaramidtayo kadagiti katulagan Kenkuana.