Dumawat iti Pammakawan ni Parley

Idi panawen a maaddaan da Thankful ken Parley Pratt iti maladagada, nagawidda manipud iti misionda iti Canada. Naaddaanda iti maysa a nasalun-at a maladaga a lalaki kas met laeng iti inkari ti Apo a maaddaanda.

Saints, 1:270

Naladingit, natay ni Thankful sumagmamano nga oras kalpasan ti pannakayanak ti maladaga. Ammo ni Parley a dina kabaelan nga aywanan ti maladaga no awan isuna. Kiniddawna iti maysa a babai iti Kirtland nga aywananna ti maladaga bayat ti panagsublina iti Canada a mangleppas iti misionna.

Saints, 1:270

Iti Kirtland, nangirugi ni Joseph Smith iti maysa a banko a mangurnong iti kuarta para iti aramid ti Dios. Kiniddawna kadagiti tao a bay-anda nga usaren ti banko ti kuartada tapno makautang dagiti dadduma. Ngem, gapu iti adu a rason, awan ti umdas a kuarta ti banko ket nasken nga agserra. Agkurkurang met ti dadduma a banko iti Estados Unidos.

Saints, 1:260–61, 264–68

Nagbalin a narigat ti biag para kadagiti Santo. Adda dagiti napukawan iti trabaho ket ita awanen ti umdas a kuartada a panggatang iti taraon wenno kawes. Nakapungtot ti dadduma a tattao ken Joseph, uray ti dadduma kadagiti nasinged a gagayyemna. Impagarupda a saan a pudno a propeta ni Joseph gapu ta saan a nagballigi ti banko.

Saints, 1:264–68, 272–275

Idinto a mapaspasamak daytoy, nagawid ni Parley manipud iti misionna. Dagiti problema iti banko ti nangparigat pay iti biag ni Parley. Awananton ti umdas a kuarta a pangbayadna iti balayna, ken awanton ti balay a pagnaedanna.

Saints, 1:270–71

Ita nagpungtot met ni Parley ken ni Joseph. Sinuratanna ni Joseph. Imbagana ken ni Joseph a mamati pay laeng isuna iti Libro ni Mormon. Ngem nagsao pay kadagiti saan a nasayaat a balikas maipapan iti Propeta. Imbagana ken ni Joseph a nagbiddut a mangirugi iti banko iti umuna a gundaway.

Saints, 1:271

Idi agangay, immay iti Kirtland ti dadduma kadagiti gagayyem ni Parley manipud iti Canada. Insuro ni Parley kadakuada ti ebanghelio, ket naragsakanda a nakakita manen kenkuana.

Saints, 1:279–80

Ngem nasdaawda met ta napukaw ni Parley ken ti adu a dadduma pay ti pammatida a maysa a propeta ni Joseph Smith.

Saints, 1:279–80

Maysa kadagiti gagayyem ni Parley manipud iti Canada ni John Taylor. Idi nakita ni Parley isuna, imbagana ken ni John no kasano ti gurana ken ni Joseph Smith. Imbagana ken ni John a saannan a suroten pay ni Joseph.

Saints, 1:280

Impalagip ni John ken ni Parley nga idi addada iti Canada, inbinglay ni Parley ti pammaneknekna a maysa a pudno a propeta ni Joseph Smith. “Addaanak itan iti kasta met laeng a pammaneknek,” kinuna ni John. “No pudno ti trabaho innem a bulan ti napalabas, pudno daytoy ita. No ni Joseph Smith ti maysa a propeta idi, maysa itan a propeta.”

Saints, 1:280

Ammo ni Parley a husto ti gayyemna a ni John. Nakarikna iti ladingit maipapan iti makagura a suratna ken ni Joseph. Ammona nga ar-aramiden ni Joseph ti amin a kabaelanna nga agaramid iti trabaho ti Apo. Dagiti problema iti banko saanna a kayat a sawen a saan a pudno a propeta ni Jesucristo ni Joseph.

Saints, 1:283

Napan ni Parley iti pagtaengan ni Joseph. Imbagana ken ni Joseph a ladingitenna dagiti saan a nasayaat a banag nga imbagana. Pinakawan ni Joseph ni Parley, inkararaganna, ken binendisionanna isuna. Nagserbi ni Parley iti adu pay a mision ken imbagana kadagiti tao iti intero a lubong a ni Joseph Smith ti propeta ti Apo.

Doktrina ken Katulagan 64:7–11; Saints, 1:283