“Awaten da Joseph ken Oliver dagiti Tulbek ti Kinasaserdote,” Dagiti Estoria iti Doktrina ken Katulagan (2024)
“Awaten da Joseph ken Oliver dagiti Tulbek ti Kinasaserdote,” Dagiti Estoria iti Doktrina ken Katulagan
Abril 1836
Awaten da Joseph ken Oliver dagiti Tulbek ti Kinasaserdote
Sarungkaran ni Jesucristo ken dagiti anghel ti Templo iti Kirtland
Maysa a lawas kalpasan a naidaton ti Templo iti Kirtland, sangaribu a Santo pay ti nagtataripnong iti templo tapno agdaydayaw iti Mangisalakan. Domingo idi ti Paskua ti Panagungar. Da Joseph Smith, Oliver Cowdery, ken ti Sangapulo-ket-dua nga Apostol ti nangted iti sakramento kadagiti Santo.
Doktrina ken Katulagan 110, paulo a benneg; Saints, 1:239
Kalpasan ti sakramento, nakasarak da Joseph ken Oliver iti maysa a naulimek a lugar iti templo, iti likudan ti kurtina, tapno agkararag.
Doktrina ken Katulagan 110, paulo a benneg; Saints, 1:239
Idi nalpasdan ti panagkararag, timmangadda. Nakatakder ni Jesucristo iti sanguananda! Ammona a nagtrabaho a naimbag dagiti Santo a nangbangon iti templo. “Inawatkon daytoy a balay,” kinunana. Imbaga ni Jesus kada Joseph ken Oliver a dagiti bendision ti templo ti mangyeg iti naindaklan a rag-o iti adu a tattao.
Doktrina ken Katulagan 110:1–10
Kalpasan ti ipapanaw ni Jesus, nagparang ti propeta iti Daan a Tulag a ni Moises kada Joseph ken Oliver. Intedna kadakuada ti tulbek ti kinasaserdote ti pannakaummong ti Israel. Kayatna a sawen a mabalinda ti mangidaulo iti trabaho a mangibinglay iti ebanghelio. Mabalinda ti mangibaon kadagiti misionario iti intero a lubong tapno mangyeg iti tattao iti Simbaan ti Mangisalakan.
Simmaruno, nagparang ni propeta Elias. Intedna kada Joseph ken Oliver dagiti tulbek tapno maisubli ti katulagan ni Abraham. Kayatna a sawen a mabalin dagiti Santo nga umawat iti Apo ti isu met laeng a katulagan nga inawat ni Abraham. Addaanda iti bileg a mangyeg iti ebanghelio ken kadagiti bendision ti Dios kadagiti tao iti amin a lugar iti adu a tawen nga umay.
Kamaudiananna, nagparang ni propeta Elias. Intedna kada Joseph ken Oliver dagiti tulbek ti kinasaserdote iti panangilantip, wenno mamagkaykaysa, kadagiti pamilia para iti kinaagnanayon. Ti trabaho nga inaramid dagiti Santo kadagiti templo ket maawatto idiay langit. Ita adda bileg ti Simbaan a mangaramid iti trabaho ti Mangisalakan ken mangisagana iti yaayna manen ditoy daga.