Panangbangon iti Nauvoo

Imbaga ti Apo kadagiti Santo nga aguummongda iti maysa a baro a lugar. Asideg dayta iti dakkel a karayan a maawagan iti Mississippi. Nabasa ken napitak ti daga. Para iti dadduma a tattao, kasla saan a nasayaat a lugar daytoy a pangibangonan iti maysa a siudad. Ngem ammo ni Propeta Joseph Smith a babaen ti tulong ti Apo, mapagbalinda daytoy a napintas.

Doktrina ken Katulagan 124:25; Saints, 1:417

Rinugian dagiti Santo ti panagtrabaho a sipapasnek tapno pagbalinen daytoy a maysa a nasayaat a lugar a pagnaedan. Inawagan ni Propeta Joseph ti ili a Nauvoo, a kaipapananna ti “maysa a napintas a lugar.”

Saints, 1:417

Imbaga ti Apo kadagiti Santo a mangbangon iti maysa a balay idiay Nauvoo a mabalin a pagsangbayan ken paginanaan dagiti agdaldaliasat. Kayatnati Nauvoo nga agbalin a maysa a lugar a pakariknaan ti tunggal maysa iti naragsak nga isasangbay.

Doktrina ken Katulagan 124:22–24, 60; Saints; 1:426

Imbaga ti Apo ken ni Propeta Joseph nga adda dagiti naindaklan a panggepna para iti Nauvoo. Kayatna nga aguummong dagiti Santona ditoy tapno makapagbangonda iti maysa a templo. Kiniddawna kadakuada nga agtrabahoda a sipapasnek agingga a kabaelanda a mangbangon iti balayna. Sidadaras a nangrugi iti panagtrabaho dagiti Santo.

Doktrina ken Katulagan 124:25–28, 44, 55; Saints, 1:420–21, 425–27

Kayat ti Apo a mangbangon dagiti Santo iti maysa a templo gapu ta adda Kenkuana dagiti naindaklan a bendision nga itedna kadakuada. Iti templo, agaramidda kadagiti katulagan, wenno naisangsangayan a kari, iti Apo. Masursuroda pay maipapan iti plano ti Nailangitan nga Ama iti ragsak para kadagiti amin nga annakna.

Doktrina ken Katulagan 124:29–41; Saints, 1:453–55

Nagtrabaho a sipapasnek dagiti Santo a mangbangon iti templo, kas met laeng iti imbilin ti Apo. Naibubos ditoy ti nabayag a panawen, ngem naragsakanda maipapan iti aldaw a maammuan ti tunggal maysa kadakuada ti maipapan kadagiti naisangsangayan a kari ti Apo para kadakuada iti templona.

Saints, 1:453–55