Panagguummong iti Ohio

Iti Ohio, umad-adu dagiti tao a kumapkappeng iti Simbaan. Imbaga ti Apo ken ni Joseph Smith a nasken nga aguummong iti Ohio dagiti Santo nga agnanaed iti dadduma pay a lugar. Napaut daytoy a panagbaniaga. Ngem inkari ti Apo a kalpasan a naguummongda, isuronanto kadagiti Santo ti lintegna ken bendisionanna ida iti pannakabalin a mangaramid iti trabahona.

Doktrina ken Katulagan 37; 38:32; Saints, 1:109–110

Ti ina ni Joseph, ni Lucy, ken ti maysa a grupo ti agarup 80 a miembro ti Simbaan ket pimmanaw kadagiti pagtaenganda idiay New York ket immakarda a napan iti Ohio. Nagluganda iti maysa a bilog a mangiturong kadakuada iti paset ti dalan. Kalpasan ti panagbaniagada iti sumagmamano nga aldaw, nasken nga agsardeng ti bilog. Napuskol a yelo iti danum ti nangserra iti dalanda.

Saints, 1:121–22

Masapul nga urayen dagiti Santo ti panagsina ti yelo. Nabannog, mabisbisin, nabasa, ken nalamminda.

Saints, 1:122

Narigat ti aguray. Sumagmamano kadagiti Santo ti nangrugi a nagsisinnupiat.

Saints, 1:122

Saan a nagustuan ni Lucy a mangngegan ti panagsusupiat dagiti Santo. Ammona a nasken nga adda ibagana a maysa a banag. “Sadino ti ayan ti pammatiyo?” sinaludsodna. Imbaga ni Lucy kadagiti Santo a no agkararagda iti Dios, burakenna ti yelo tapno maituloyda ti panagdaliasatda.

Saints, 1:122–23

Kellaat a, nangngeganda ti maysa nga ariwawa a kasla gurruod bayat ti panagsina ti yelo. Maysa a dalan ti naglukat iti yelo, nga umdas laeng ti kalawana a paglasatan ti bilogda.

Saints, 1:123

Nasdaaw ken nagyaman dagiti Santo. Naguummongda tapno agkararag ken agyaman iti Nailangitan nga Ama. Nagdaliasat ti bilogda a sitatalged nga agturong iti Ohio.

Saints, 1:123

Idi nakadanon dagiti Santo idiay Ohio, siraragsak a pinasangbay ida dagiti miembro ti Simbaan sadiay ken tinulonganda ida a mangbirok kadagiti lugar a pagnaedan. Tinungpal ti Apo ti karina nga isurona kadakuada ti lintegna ken ikkanna ida iti pannakabalin a mangaramid iti trabahona.

Doktrina ken Katulagan 42; Saints, 1:126