Ti Pamilia a Martins

Agmanmaneho ni Helvécio Martins nga agawid manipud iti trabahona idiay Rio de Janeiro, Brazil. Napunno unay ti kalsada kadagiti lugan isu nga awanen kadagitoy ti makaandar. Napanunot ni Helvécio maipapan iti biagna. Adda nasayaat a pagtrabahuanna. Ay-ayatenna ti asawana a ni Rudá ken ti dua nga annakna a da Marcus ken Marisa. Ngem nariknana a kasla adda maysa a banag a kurang.

Saints, 4:229–30

Rimmuar ni Helvécio iti lugan ket rinugianna ti nagkararag. “Diosko,” kinunana, “Ammok nga addaka dita sabali a lugar, ngem diak ammo no sadino.” Imbagana iti Nailangitan nga Ama nga adda maysa a banag a birbiroken ti pamiliana, ket kasapulanda ti tulongna. Kalpasanna nagsubli ni Helvécio iti luganna ket nagmaneho a nagawid.

Saints, 4:230

Idi agangay, nangibaon ti Apo kadagiti misionario manipud iti Estados Unidos. Sinarungkaranda ti pamilia a Martins. Nadlaw ni Helvécio nga inyegda ti natalna nga espiritu iti pagtaenganna. Ammona nga, iti dayta a panawen, masansan a saan a nasayaat ti pannakatrato dagiti tao nga addaan iti nangisit a kudil idiay Estados Unidos. Dinamagna, “Kasano ti panangtrato ti relihionyo kadagiti Nangisit?”

Saints, 4:230–31

Inlawlawag dagiti misionario a mabalin a mabuniagan ti amin nga annak ti Dios. Ngem iti dayta a panawen, dagiti Nangisit a tao nga addaan kadagiti kapuonan manipud iti Africa ket saan a makapagikut iti kinasaserdote wenno saan a makaawat iti kaaduan a bendision ti templo. Adu pay dagiti saludsod da Helvécio ken Rudá. Inaramid dagiti misionario ti amin a kabaelanda a nangsungbat kadagitoy.

Saints, 4:231

Iti uneg ti adu a tawen, nagkararag dagiti propeta tapno maammuan no kaano a mabalin a maited dagiti bendision ti kinasaserdote ken ti templo iti amin a tattao.

Saints, 4:71

Inkeddeng da Helvécio ken Rudá a padasenda ti mapan iti simbaan. Managayat ken naasi unay dagiti Santo sadiay. Nagustuan ti pamilia a Martins no ania dagiti nasursuroda iti simbaan.

Saints, 4:231–32

Maysa nga aldaw, iti panagawidda manipud iti simbaan, imbaga ni Marcus iti pamiliana a nadlawna a kasla naragragsakda. “Ammok no ania ti pakaigapuan daytoy,” kinuna ni Marcus. “Ti ebanghelio ni Jesucristo.” Ammo ti dadduma pay a miembro ti pamilia a husto ni Marcus. Inkeddengda ti mabuniagan ken makumpirmaran.

Saints, 4:232

Sumagmamano a tawen kalpasanna, makumikom dagiti Santo iti Brazil a mangbangbangon iti maysa a templo. Naragsakan ti pamilia a Martins, ngem nalidayda met. Saanda a makastrek iti templo kalpasan ti pannakaidaton daytoy. “Dika madanagan,” kinuna ni Helvécio ken ni Rudá. “Ammo ti Apo ti amin a banag.”

Saints, 4:293–94

Saan a nalaka ti agtalinaed a napudno. Pinagang-angawan dagiti tao ti pamilia a Martins. Saan a maawatan uray dagiti gagayyemda no apay a nagtalinaedda iti Simbaan. Ngem ammo ni Helvécio ken ti pamiliana a daytoy ti Simbaan ni Jesucristo.

Saints, 4:251–52

Maysa nga aldaw, idi nagawid ni Helvécio manipud iti pagtrabahuanna, kinuna ni Rudá, “Adda ipadamagko, napintas a damag!” Kalpasan ti adu a panagayuno ken panagkararag, nakaawat ti propeta, ni Presidente Spencer W. Kimball, iti maysa a paltiing. Imbaga ti Dios kenkuana a ti asinoman, aniaman ti maris ti kudilda, ket mabalin a maaddaan iti tunggal bendision ti kinasaserdote ken ti templo.

Opisial a Palawag 2; Saints, 4:318–19

Nabayag unayen nga agur-uray ti pamilia a Martins ken ti adu a dadduma pay. Ita, nalpasen ti panaguray! Inawat da Helvécio ken Marcus ti kinasaserdote. Nailantip da Helvécio, Rudá, ken dagiti annakda kas maysa a pamilia iti templo. Mabalinda nga awaten itan ti amin a bendision ti ebanghelio.

Saints, 4:319–21