Agtataripnong dagiti Knights ken Dadduma Pay iti Zion

Nagnaed da Polly ken Joseph Knight a kaduada ti pamiliada iti New York. Am-ammoda unay ni Propeta Joseph. Kalpasan ti pannakasursuroda iti ebanghelio, pinilida ti makikappeng iti Simbaan. Idi indawat ti Apo kadagiti Santo nga umakar iti Ohio, nagtungpal dagiti Knights.

Doktrina ken Katulagan 37; Saints, 1:33, 94, 109–110

Naragsak dagiti Knights idi makasangpetda iti Ohio. Kinuna ni Leman Copley, maysa a miembro ti Simbaan, a mabalin nga agnaed ti sumagmamano kadagiti Santo iti dagana. Adda umdas a lugar sadiay a pagmulaan kadagiti mula ken pangbangonan kadagiti pagtaengan. Nagtrabaho a sipapasnek ni Joseph Knight ken dagiti annakna a lallaki tapno maisagana dagiti talon a pagmulaan.

Saints, 1:126–27

Ngem iti maysa nga aldaw, nagbaliw ti panunot ni Leman Copley maipapan iti dagana. Saannan a kayat nga agnaed pay idiay dagiti Santo. Imbagana kadagiti Knights ken ti tunggal maysa a pumanaw.

Saints, 1:127

Nagdanag dagiti Santo. Ita awan ti lugar a pagnaedanda. Nagsaludsodda ken ni Propeta Joseph no ania ti nasken nga aramidenda.

Doktrina ken Katulagan 54; Saints, 1:127

Kinuna ti Apo a nasken a mapan dagiti Santo iti Missouri tapno mangbangon iti Zion. Agbalinto ti Zion a maysa a siudad a mabalin a pagguumongan dagiti tao ti Apo. Iti Zion, mangbangondanto iti maysa a templo a pagaramidanda kadagiti katulagan, wenno kari iti Dios. Bendisionanna ida no tungpalenda dagitoy a katulagan. Naggagar dagiti Knights a napan.

Doktrina ken Katulagan 29:1–8; 42:30–36; 45:59–66; 54:6–9; 57:1–2; Saints, 1:128

Iti panagbaniaga dagiti Knights nga agturong iti Missouri, nagsakit iti nakaro ni Polly. Nagdanag ti asawana, ni Joseph, ken dagiti annakna amangan ta saanen nga agbiag pay iti mabayag. Ngem imbaga ni Polly iti pamiliana a kayatna ti agtalinaed iti Zion sakbay a matay. Kayatna daytoy nga ad-adda pay ngem iti ania man a banag!

Saints, 1:128

Kalpasan ti napaut a panagdaliasat, simmangpet dagiti Knights iti Missouri. Agyaman unay ni Polly iti Apo ta nagbiag isuna tapno makitana daytoy. Napanunot dagiti Knights a napintas ti daga. Adda pammatida a matungpalda ti bilin ti Apo a mangbangon iti Zion sadiay.

Saints, 1:132

Nangisawang dagiti Santo iti naisangsangayan a kararag ket inawaganda ti daga iti Zion, nga umayanto dagiti tao ti Apo. Nangikabil ni Propeta Joseph iti maysa a bato a mangmarka no sadinonto ti suli ti baro a templo. Kalpasan ti sumagmamano nga aldaw, natay ni Polly. Inkari ti Apo nga aginana iti langit dagiti Santo nga immay iti Zion ken natay.

Doktrina ken Katulagan 59:1–2; Saints, 1:132–33