Ipapanaw iti Nauvoo a Mapan iti Laud

Natay ni Joseph Smith. Ita indauluan ni Brigham Young ken dagiti dadduma nga Apostol ti Simbaan. Ammo ni Brigham a saanen a natalged dagiti Santo iti Nauvoo. Masapul a pumanawdan. Ngem umuna, kayat ti Apo nga ileppasda ti panangbangon ti templo. Kayatna nga agaramidda kadagiti katulagan Kenkuana ken mailantipda kas pamilia.

Saints, 1:571, 579–80

Kalpasan ti sumagmamano a bulan, nakasaganan ti templo para kadagiti tao nga aramid kadagiti katulaganda sadiay. Rinibu a Santo ti immay iti templo. Nagtalinaed ni Brigham iti templo agingga iti rabii tapno matulonganna ida nga agaramid kadagiti katulaganda iti Apo. Kamaudiananna, imbaga ni Brigham iti tunggal maysa a kasapulandan ti pumanaw iti Nauvoo.

Saints, 1:582

Idi nakariing ni Brigham iti kabigatanna, ad-adu pay a Santo ti agur-uray iti templo. Imbaga ni Brigham kadakuada a saanen a natalged ti agtalinaed iti Nauvoo. Masapul a mangbirokda iti baro a pagtaengan iti Laud. Inkarina a mabalinda ti mangbangon iti maysa a baro a templo inton makadanonda sadiay.

Saints, 1:582–83; 2:13–14

Ngem saan a pimmanaw dagiti Santo. Kayatda ti agaramid kadagiti katulagan iti Apo sakbay a mangrugida iti panagdaliasatda nga agturong iti baro a pagtaengan.

Saints, 1:583

Nakita ni Brigham dagiti rupada ket nagbaliw ti panunotna. Binubosna ti nabati pay nga oras ti aldaw ken ti sumaganad nga aldaw a nangtultulong kadagiti Santo nga agaramid kadagiti katulagan iti templo.

Saints, 1:583

Itan ta nagaramiden dagiti Santo iti katulagan iti Apo, panawenen a panawanda ti Nauvoo. Ammo ni Brigham nga adda maysa a lugar nga insagana ti Apo para kadakuada. Nakitanan daytoy iti maysa a parmata. Rinugianda ti panagdaliasatda. Nalamiis ti tiempo, ken napitak ti daga. Nagsakit dagiti tao. Naibusandan iti taraon.

Saints, 2:16–18, 20–21

Adayo pay ti pagnaen dagiti Santo. Pinampanunot ni Brigham no kasano a makaaramidda iti kasta a napaut ken narigat a panagdaliasat. Nagkararag iti tulong ti Dios.

Saints, 2:46

Nangted ti Apo iti maysa a paltiing ken ni Brigham. Insurona ken ni Brigham no kasano ti mangidaulo kadagiti Santo. Kinunana a nasken nga agtitinnulongda a mangaywan kadagiti napanglaw.

Doktrina ken Katulagan 136:1–8

Kinuna ti Apo a nasken a laglagipen dagiti Santo dagiti katulagan nga inaramidda Kenkuana. No aramidenda dayta, bendisionannanto ida ken tulonganna ida iti panagdaliasatda.

Doktrina ken Katulagan 136:4, 11, 42; Saints, 2:47

Nakarigrigat latta ti panagdaliasat. Natay ti sumagmamano a tattao. Ngem gapu kadagiti katulaganda iti templo, ammo dagiti Santo a makitadanto manen dagiti miembro ti pamiliada.

Sumagmamano a bulan kalpasanna, simmangpet dagiti immuna a Santo iti Salt Lake Valley idi 1847. Idi nakita ni Brigham Young ti tanap, kinunana, “Daytoy ti umiso a lugar.” Daytoy isu met laeng a lugar ti nakitana iti maysa a parmata. Ditoy nga agbalin a natalged dagiti Santo. Ditoy a mabalinda ti agdaydayaw iti Apo ken agaramid iti trabahona a sitatalna.

Saints, 2:17, 64–67

Iti panaglabas dagiti tawen, umad-adu pay dagiti Santo a simmangpet. Nangbangonda iti ad-adu pay a templo, a sadiay mabalin nga agaramid dagiti tao iti katulagan iti Apo. Nangibaonda kadagiti misionario iti intero a lubong a mangisuro iti ebanghelio ni Jesucristo. Nagtultuloy a dimmur-as ti Simbaan ti Mangisalakan, a mangbembendision kadagiti annak ti Nailangitan nga Ama iti amin a lugar.