“Maysa a Paltiing para ken ni Emma,” Dagiti Estoria iti Doktrina ken Katulagan (2024)
“Maysa a Paltiing para ken ni Emma,” Dagiti Estoria iti Doktrina ken Katulagan
Hulio 1830
Maysa a Paltiing para ken ni Emma
Pinili ti Apo a mangaramid ti trabahona
Alisto unay ti panagbalbaliw ti biag para kada Emma ken Joseph. Imbaga ti Apo ken ni Joseph a nasken nga isardengnan ti panangpokus iti panagtalon. Ketdi, nasken a bubosen ni Joseph ti panawenna a mangisuro kadagiti tao maipapan ken ni Jesucristo ken mangtulong iti panagdur-as ti Simbaan ti Apo.
Doktrina ken Katulagan 24:7–9; Saints, 1:96
Adu ti saludsod ni Emma maipapan iti daytoy a panagbalbaliw. Saanna nga ammo no ania ti nasken nga aramidenna bayat ti panagserbi ni Joseph iti Apo. Nasken kadi met a tulonganna ti Apo ken ti Simbaanna?
Saints, 1:96
Nakisarita ti Apo ken ni Emma babaen ti maysa a paltiing a naited ken ni Joseph. Inawaganna isuna iti “Emma Smith, anakko a babai.” Imbagana ken ni Emma a pinilina ken inawaganna isuna nga agaramid iti trabahona. Isu ti naisangsangayan a babai, ken addaan Isuna kadagiti naindaklan a banag nga aramidenna.
Kiniddaw ti Apo ken ni Emma a makipagbiahe ken ni Joseph. Kinuna ti Apo nga ilawlawag ni Emma dagiti nasantuan a kasuratan ken isurona dagiti miembro ti Simbaan. Imbagana ken ni Emma nga ipangpangrunana Isuna iti biagna ken agtungpal kadagiti katulaganna. Inkarina ken ni Emma nga addanto kenkuana ti Espirituna. Tinarigagayanna kenkuana nga agsursuro, dumur-as, ken umawat kadagiti bendisionna.
Doktrina ken Katulagan 25:6–10, 15
Imbaga pay ti Apo ken ni Emma a pagay-ayatna a denggen ti panagkanta dagiti annakna. Kinunana a dagiti kanta dagiti Santona ket kasla maysa a kararag Kenkuana. Kiniddawna ken ni Emma nga agaramid iti libro dagiti himno a mabalin a kantaen dagiti Santo a sangkamaysa. Nasarakan ni Emma ti adu a napipintas a kanta maipapan iti Apo ken ti ebangheliona ket pinagtitiponna dagitoy iti maysa a libro dagiti himno.
Doktrina ken Katulagan 25:11–12; Saints, 1:221–22
Nagtultuloy ti panagbaliw ti biag da Emma ken Joseph, ngem ammo ni Emma nga ay-ayaten ti Apo isuna ken adda panggepna para kenkuana. Nagserbi isuna iti Apo ken kadagiti tao iti aglawlawna. Tinulonganna ti Simbaan ti Apo a dumur-as.
Doktrina ken Katulagan 25:13–15; Saints, 1:221–23