Ti Riribuk iti Missouri

Panagtalinaed a natibker ti pammati kadagiti napeggad a panawen

Makapungtot ti sumagmamano a tao iti Independence kadagiti sumangsangpet a Santo.

Immay ti adu a Santo tapno agnaedda iti Independence, Missouri. Kayat ti Apo a bangonenda sadiay ti siudad ti Zion. Ngem saan a nagtunos dagiti Santo ken dagiti tao a sigud nga agnanaed iti Independence. Adu a banag ti saanda a napagtutunosan. Nakapungtot ti sumagmamano a tao iti ili ket kayatda a pumanaw dagiti Santo.

Doktrina ken Katulagan 57:1–3; Saints, 1:171–74

Dagiti lider iti taripnong iti Independence a kaduada ni Edward Partridge.

Ni Edward Partridge ti bishop iti Independence. Simmangpet tapno makitaripnong kadagiti lider iti ili. Kinunada a nasken a pumanaw iti Independence dagiti Santo. Ammo ni Bishop Partridge a kayat ti Dios a bangonen dagiti Santo ti Zion iti Independence. Kinunana a saan a mabalin dagiti Santo ti pumanaw.

Saints, 1:176

Dagiti makapungtot a lallaki a mangrebrebba kadagiti pagtaengan ken pasdek.

Rinugian dagiti makapungtot a lallaki a rebbaen dagiti pagtaengan ken pasdek nga imbangon dagiti Santo.

Saints, 1:177–78, 182

Lallaki a mangkamkamat kada Edward Partridge ken Charles Allen.

Innala dagiti lallaki ni Bishop Partridge ken ti sabali pay a lalaki nga agnagan Charles Allen manipud kadagiti pagtaenganda. Inguyodda dagiti dua a lallaki agingga iti sentro ti ili.

Saints, 1:179

Da Edward ken Charles a nabungon iti alkitran ken dutdot.

Kinuna ni Bishop Partridge, “No masapul nga agsagabaak gapu iti relihionko, saan nga ad-adda pay ngem iti inaramid dagiti dadduma sakbay kaniak.” Induron dagiti lallaki da Bishop Partridge ken Charles iti daga. Inkabilda ti napudot nga alkitran ken dutdot iti intero a bagida.

Saints, 1:179–80

Ni William McLellin nga aglemlemmeng iti kakaywan.

Ni William McLellin, maysa a miembro ti Simbaan iti Independence, nadamagna maipapan iti ar-aramiden dagiti makapungtot a lallaki. Nagbuteng isuna ket nagtaray a napan naglemmeng iti kakaywan.

Saints, 1:182

Ni William a mangpampanunot no anianto ti aramidenna no matiliw isuna.

Pinampanunot ni William no ania ti mapasamak no masarakan isuna dagiti makapungtot a lallaki. Ibagana kadi latta a pudno ti Libro ni Mormon, uray no padasenda a patayen isuna gapu iti daytoy?

Saints, 1:182–83

Da Oliver Cowdery ken David Whitmer a mangsapsapul ken ni William.

Nasarakan isuna dagiti gagayyem ni William a da Oliver Cowdery ken David Whitmer iti kakaywan. Ammo ni William a mamati da Oliver ken David iti Libro ni Mormon. Impakita ti maysa nga anghel kadakuada dagiti pinanid a balitok. “Ibagayo kaniak,” sinaludsod ni William kadakuada, “pudno kadi dayta a Libro ni Mormon?”

Saints, 1:183

Da Oliver ken David a mangibingbinglay iti pammaneknekda ken ni William.

Imbaga da Oliver ken David ken ni William a pudno ti Libro ni Mormon. Kinunada nga uray no padasen dagiti makapungtot a lallaki a patayen ida, dida pulos agsardeng a mangibinglay iti pammaneknekda kadagiti tao. “Mamatiak kadakayo,” kinuna ni William.

Doktrina ken Katulagan 17:3–6; Saints, 1:183