Maidaton ti Templo iti Kirtland

Kalpasan ti dandani tallo a tawen a napasnek a panagtrabaho, nalpasen iti kamaudiananna ti Templo iti Kirtland. Inawis ni Propeta Joseph dagiti Santo iti naisangsangayan a miting a mangidaton iti templo. Isaona ti maysa a naisangsangayan a kararag ken itedna ti templo iti Apo. Agbalin koma daytoy a nasantuan a balay ti Apo.

Saints, 1:235

Iti nasapa a bigat ti miting, ginasut a Santo ti naguummong iti templo. Idi napno amin dagiti tugaw, nagtakder dagiti tao iti ruangan ken iti ruar, a kumitkita kadagiti tawa. Naggagar ti amin a makakita a maidaton ti templo.

Saints, 1:235–36

Basaen ni Joseph iti kararag a mangidaton iti templo. Imbagana iti Apo a nagtungpal dagiti Santo Kenkuana. Indawatna iti Apo nga awatenna ti templo kas balayna.

Doktrina ken Katulagan 109:1–5

Inkararag ni Joseph a marikna koma ti tunggal maysa nga immay iti templo ti bileg ti Apo ken ammoda a balayna daytoy.

Doktrina ken Katulagan 109:13

Inkararagan pay ni Joseph a no nagbasol dagiti Santo, mabalinda ti agbabawi a dagus. Kiniddawna iti Apo nga ikkanna ida iti bileg a mangibinglay iti ebangheliona iti amin a lubong. Kalpasan ti kararag, nagkanta ti koro iti maysa a baro a kanta a maawagan iti “Ti Espiritu ti Dios (The Spirit of God).” Napno iti rag-o dagiti tao. Nagtakderda ket nagdaydayawda iti Apo.

Doktrina ken Katulagan 109:21–32; Hymns, no. 2; Saints, 1:237

Adu a tattao ti nakakita kadagiti anghel iti templo iti dayta nga aldaw. Nakitada ti naraniag a lawag a bumabbaba manipud iti langit nga agturong iti templo. Kinuna ti sumagmamano a tattao a naglanga a kasla ulep daytoy; kinuna ti dadduma a naglanga a kasla apuy daytoy. Nariknada amin a maysa a nasantuan a lugar ti templo. Pudno a daytoy itan ti balay ti Apo.

Saints, 1:237