Ti Perlas a Kapatgan

Maysa nga aldaw, immay ti maysa a lalaki iti Kirtland a kaduana dagiti mummy manipud iti Egipto. Kaduana dagiti mummy ti sumagmamano a lukot, wenno dagiti daan unayen a nalukot a papel. Addaan dagiti Egipcio a sinurat kadagiti nalukot a papel. Impakita ti lalaki dagitoy ken ni Propeta Joseph Smith. Interesado unay ni Joseph iti sinurat.

Saints, 1:219–20

Sumagmamano a gagayyem ti timmulong ken ni Joseph a gumatang kadagiti mummy ken dagiti nalukot a papel. Bayat ti panangadal ni Joseph iti sinurat, impalgak kenkuana ti Apo dagiti nagkauna a sinurat manipud ken ni Abraham, maysa a propeta iti Biblia. Babaen ti tulong dagiti gagayyem a kas ken ni Oliver Cowdery, insurat ni Joseph ti insuro kenkuana ti Apo maipapan kadagiti pannursuro ni Abraham.

Saints, 1:220

Nakita ni Abraham ti parmata ti biagtayo a kadua ti Nailangitan nga Ama sakbay a nayanaktayo. Nakitana a napili ni Jesus nga agbalin a Mangisalakantayo. Naammuan pay ni Abraham maipapan iti pannakaparsua ti lubong. Naragsak dagiti Santo a maaddaan kadagitoy a pannursuro manipud ken Abraham. Naragsakda a kayat ti Apo nga isuro ti ad-adu pay.

Abraham 2:6–11; 3–5; Saints, 1:220

Nagbalin dagiti sinurat ni Abraham a paset ti maysa a libro ti nasantuan a kasuratan a maawagan iti Perlas a Kapatgan. Addaan pay iti sinurat daytoy a libro manipud ken Moises, sabali pay a propeta iti Biblia. Isurona dagiti kinapudno nga awan iti Biblia. Kayat ti Apo a maammuan dagiti tao dagitoy a kinapudno, isu nga imbinglayna dagitoy ken ni Joseph Smith.

Moises 1–8; Abraham 1–5

Addaan pay ti Perlas a Kapatgan iti pammaneknek ni Joseph Smith ken ti 13 a Pagannurotan ti Pammati. Insurat ni Joseph Smith dagitoy a banag tapno ibagana iti lubong no ania ti patien dagiti Santo iti Ud-udina nga Aldaw. Ti Perlas a Kapatgan ket maysa a bassit a libro, kas iti perlas a bassit, ngem nakapatpateg daytoy.

Joseph Smith—Pakasaritaan; Pagannurotan ti Pammati 1