Ti Pamilia a Jackson

Kalpasan a napan ti umuna a grupo dagiti Santo iti Salt Lake Valley, rinibu pay a dadduma a Santo ti napan met. Nagdaliasatda iti adayo, ket tinulongan ida ti Apo. Maysa a pamilia a nagdaliasat ti pamilia a Jackson. Pinanawanda ti pagtaenganda iti England ket naragsakanda a mapan tumulong kadagiti Santo a mangbangon iti Zion.

Doktrina ken Katulagan 136:1–11; Saints, 2:222–23

Nagballasiw dagiti Jackson iti taaw iti maysa a barko. Kalpasanna, nagluganda iti maysa a tren iti paset ti dalan nga agturong iti Salt Lake Valley. Masapul a magnada iti nabati pay a paset ti dalan.

Saints, 2:222–23

Nangaramidda iti maysa a bassit a karison a pagkargaanda iti taraonda, kawes, ken dadduma pay a banag a kayatda nga itugot. Adu a Santo ti nakagteng a sitatalged iti tanap iti kastoy a wagas.

Saints, 2:223–26

Ginuyod da Elizabeth ken Aaron Jackson ti nadagsen a karisonda. Nagna dagiti annakda a da Martha, Mary, ken Aaron Jr. Narigat nga aramid daytoy. Nangnamnamada a makadanonda iti tanap sakbay ti panawen ti lamiis. Ngem idi dimteng ti tiempo ti panagtitinnag, adayo pay laeng ti pagnaenda. Mangrugrugin nga aglamiis, ket maibusandan iti taraonda.

Saints, 2:223–26, 229, 231–32

Iti Salt Lake City, naammuan ni Brigham Young ti maipapan kadagiti Santo nga um-umayen iti tanap. Madanagan maipapan kadakuada. Kabigatanna iti simbaan, imbagana iti tunggal maysa a narigat ti kasasaad dagitoy a Santo. Kiniddawna kadakuada a punnuenda dagiti karison kadagiti banag a kasapulan dagiti Santo. “Inkayo ket yegyo dagidiay a tattao,” kinunana.

Saints, 2:229–30

Inikkat dagiti babbai iti miting dagiti nabara a mediasda ket inkabilda dagitoy kadagiti karison. Dagiti dadduma pay ti nangted iti taraon, kubrekama, sapatos, ken kawesda. Dua nga aldaw kalpasanna, nasurok a 50 a lallaki ken 20 a karison ti pimmanaw iti tanap tapno mapanda tumulong.

Saints, 2:230

Bayat ti pannagna ti pamilia a Jackson, nangrugin a nagtinnag ti niebe. Nagsakit unay ni Aaron. Marigatanen a magna daytoy. Masapul a ballasiwen dagiti Santo ti nagyelon a karayan, ket daytoy ti ad-adda pay a nangpakapsut ken ni Aaron. Iti dayta a rabii, natay ni Aaron. Nakalkaldaang, ta masapul nga agtultuloy iti pannagna ti pamiliana nga awan isuna.

Saints, 2:232–34

Kabigatanna, ad-adu pay ti niebe iti daga. Induron ken ginuyod dagiti Jackson ken ti dadduma pay a Santo dagiti karisonda iti niebe. Inaldaw nga inkararagda a tulongan koma ida ti Dios.

Doktrina ken Katulagan 136:29; Saints, 2:234–35

Maysa a rabii, madanagan ni Elizabeth para kadagiti annakna. Mabisbisin ken malamminda. Makasangpetdanto ngata iti Salt Lake Valley? Nakaturog ket nagtagtagainep a nakitana ni Aaron. Kinunana, “Agragsakka, Elizabeth.” Imbagana kenkuana nga um-umayen ti tulong.

Saints, 2:235–36

Husto ti kinuna ni Aaron. Di nagbayag, simmangpet dagiti lallaki manipud iti Salt Lake nga adda dagiti karisonda. Inikkanda dagiti Santo iti taraon ken kawes. Nagragsak ken nagkatawa dagiti Santo ken inarakupda dagiti lallaki. Nagkantada iti maysa a himno ken nagyamanda iti Nailangitan nga Ama gapu iti panangsungbatna kadagiti kararagda.

Doktrina ken Katulagan 136:28; Saints, 2:236

Idi nakadanonda iti tanap iti kamaudiananna, Domingo idin. Imbaga ni Brigham Young kadagiti miembro ti Simbaan idiay Salt Lake City nga imbes a mapanda iti simbaan, nasken a mapanda pasangbayen dagiti Santo a simmangpet. Kinablaawanda dagiti nalamlammin ken nabannog a Santo ket inawisda ida nga agdagus kadagiti pagtaenganda.

Saints, 2:239–40