Agbaniaga ni Jane Manning iti Nauvoo

Nagnaed da Jane Manning ken ti pamiliana iti lugar a saan a magustuan ida ti dadduma a tattao ken saan a nasayaat ti panangtratoda kadakuada gapu iti maris ti kudilda. Maysa nga aldaw, nangngeg ni Jane ti panangisuro ti maysa a misionario. Ammona a pudno ti mensahena. Iti mismo a sumaganad a Domingo, nabuniagan isuna.

Saints, 1:500–501

Kimmappeng met ti pamilia ni Jane iti Simbaan. Kayat ti Apo nga aguummong dagiti Santo iti Nauvoo. Impateg ni Jane ti Apo. Kayatna ken ti pamiliana ti makikadua kadagiti dadduma pay a Santo. Isu a rinugianda ti nagbaniaga nga agturong iti Nauvoo.

Doktrina ken Katulagan 124:25; Saints, 1:501

Iti paset ti panagbiaheda, nagdaliasatda babaen ti bilog. Kaaduan a tattao iti bilog ti makabael nga agbayad iti panaglugan iti gibus ti panagbiahe. Ngem imbaga ti dadduma a lallaki iti pamilia ni Jane a masapul nga agbayadda iti panangrugi. Awan ti umdas a kuartada. Pinaruar ida dagiti lallaki iti bilog, ket pimmanaw daytoy nga awanda.

Saints, 1:501

Nasken pay nga agdaliasat ti pamilia ni Jane iti 800 a milia, wenno 1,300 a kilometro. Nasken a ballasiwenda ti adalem a karayan nga awanan iti rangtay. Nasken a maturogda iti ruar. Masansan a nakalamlamiis ti tiempo. Ngem determinado ti pamilia ni Jane a makadanon iti Nauvoo. Pinaragsakda ti bagbagida babaen ti panagkantada bayat pannagnada.

Saints, 1:501, 505–6

Nagtultuloy a nagna da Jane ken ti pamiliana agingga a nadadael ti sapatosda ken nadangran dagiti sakada. Ngem idi nagkararagda iti Dios iti tulong, pinaimbagna dagiti sakada.

Saints, 1:505

Tinulonganda dagiti tao a naam-ammoda iti panagdaliasatda. Timmulongda pay a nangpaimbag iti masakit nga ubing gapu iti pammatida.

Saints, 1:505–6

Kamaudiananna, nakadanon da Jane ken ti pamiliana iti Nauvoo! Nabannogda ken kasapulanda ti maysa a lugar a pagyanan. Isu a napanda iti balay da Emma ken Joseph. Idi nangngeg ni Joseph ti amin a napasaranda, imbagana ken ni Jane, “Bendisionannaka ti Dios. Maibilangka kadagiti gagayyem ita.” Inawis da Joseph ken Emma ni Jane a makipagnaed kadakuada.

Saints, 1:506