“Maam-ammo da Newel ken Ann Whitney ni Propeta Joseph,” Dagiti Estoria iti Doktrina ken Katulagan (2024)
“Maam-ammo da Newel ken Ann Whitney ni Propeta Joseph,” Dagiti Estoria iti Doktrina ken Katulagan
Oktubre 1830–Pebrero 1831
Maam-ammo da Newel ken Ann Whitney ni Propeta Joseph
Sinungbatan ti Apo dagiti kararag ti pammati
Nagtagikua da Ann ken Newel Whitney iti maysa a tiendaan iti Kirtland, Ohio. Saan a dimmakkel ni Ann a mapmapan iti simbaan wenno agsursuro maipapan iti Apo, ngem nagtarigagay a mangam-ammo Kenkuana. Kalpasan a nagkallaysada ken ni Newel, nagkakaragda iti namin-adu a gundaway ket indawatda iti Apo nga iturongna ida.
Saints, 1:111–12
Maysa a rabii bayat ti panagkararagda, nakakita da Ann ken Newel iti maysa a parmata. Iti parmata, adda ulep a nagdisso iti balayda. Pinunno ida ti Espiritu ti Dios. Linikmutan ida ti ulep. Nangngegda ti maysa a timek manipud iti langit. Imbagana kadakuada, “Agsaganakayo nga umawat iti balikas ti Apo, ta umay.”
Saints, 1:111
Kalpasan ti apagbiit, immay ni Parley Pratt idiay Kirtland. Isu ken dagiti kakaduana ti nangisuro iti ebanghelio ni Jesucristo. Apaman a nangngeg ni Ann no ania ti insuroda, ammona a pudno daytoy. Nagawid isuna tapno ibinglay ti damag ken ni Newel. Di nagbayag ket nabuniaganda.
Saints, 1:112
Kalpasan ti dua a bulan, maysa a lalaki ken babai ti immay iti tiendaan ni Newel. Saan ida nga am-ammo ni Newel, ngem nakilamano ti lalaki ken ni Newel ket inawaganna ni Newel iti naganna. Kinuna ti lalaki, “Siak ni Joseph a propeta.” Inlawlawagna a sungsungbatan ti Apo dagiti kararag ni Newel. Imbaonna da Emma ken Joseph tapno makiam-ammo kada Ann ken Newel.
Saints, 1:113
Ammo da Newel ken Ann a pumudno ti parmatada. Kiniddawda kada Joseph ken Emma a makipagnaed kadakuada iti pagtaenganda. Inayat da Ann ken Newel ni Jesus ken ti ebangheliona. Intedda amin nga adda kadakuada kadagiti Santo ken iti Simbaan ti Mangisalakan.
Doktrina ken Katulagan 38:23–27, 34–42; Saints, 1:114