“Agserbi dagiti Apostol iti Mision idiay Great Britain,” Dagiti Estoria iti Doktrina ken Katulagan (2024)
“Agserbi dagiti Apostol iti Mision idiay Great Britain,” Dagiti Estoria iti Doktrina ken Katulagan
Hulio 1838–Hulio 1841
Agserbi dagiti Apostol iti Mision idiay Great Britain
Panagtalek kadagiti kari ti Apo
Iti maysa a paltiing ken ni Joseph Smith, inawagan ti Apo dagiti Apostol iti maysa a mision iti ballasiw ti taaw idiay Great Britain. Uray no narigat para ken ni Joseph nga adda dagiti Apostol iti adayo unay, nagtalek iti Apo. Narigat met kadagiti Apostol ti mangpanaw kadagiti pamiliada. Ngem inkari ti Apo a bendisionanna ida.
Da Heber C. Kimball ken ti asawana a ni Vilate, ket addaanda iti ubing pay a pamilia. Adda maladagada a makabulanna pay laeng. Adu a miembro ti pamiliada ti masakit unay.
Saints, 1:405
Masakit met ni Brigham Young, ken napanglaw ti pamiliana. Ngem ti asawa ni Brigham, ni Mary Ann, imbagana kenkuana, “Inka ket tungpalem ti misionmo, ket bendisionannakanto ti Apo.”
Saints, 1:404–5
Rinugian ni Brigham ti napan, ngem idi nakadanon iti balay ni Heber, nakapuy unayen isu a saanen a makapagna. Nagtalinaed iti pamilia ni Heber iti sumagmamano nga aldaw.
Saints, 1:405
Immay ni Mary Ann tapno aywananna ni Brigham agingga a nasalun-atda ken ni Heber a pumanaw. Agpadada a nakapuy unay, ngem kayatda nga ikasaba ti ebanghelio.
Saints, 1:405
Nagpakada da Heber ken Brigham kadagiti assawada ket immulida iti likudan ti maysa a karison. Malidayanda a mangpampanaw kadagiti pamiliada a masakit ken napanglaw unay. Bayat ti ipapanaw ti karison, kinuna ni Heber ken ni Brigham, “Narigat daytoy.” Kayatna a tulongan dagiti pamiliada nga agbalin a natured. Kiniddaw ni Heber iti drayber ti karison nga agsardeng.
Saints, 1:405–6
Manipud iti uneg ti balay, nangngeg ni Vilate ti maysa a daranudor. Immasideg iti ruangan, a nagtakderan ni Mary Ann. Nakitada da Heber ken Brigham nga agtaktakder iti likudan ti karison, a mangiwag-wagayway kadagiti kallugongda iti tangatang ken mangipukpukkaw, “Hurrah! Hurrah! Hurrah para iti Israel!” Insungbat dagiti babbai, “Goodbye! Bendisionannakayo ti Dios!”
Saints, 1:406
Kalpasan ti napaut a panagbiaheda iti ballasiw ti taaw, simmangpet da Heber ken Brigham idiay Great Britain. Kaduada ti dadduma pay nga Apostol, insuroda ti adu a tattao maipapan ken ni Jesucristo ken ti ebangheliona. Rinibu a tattao ti nabuniagan ken nagkameng iti Simbaan ti Mangisalakan.
Saints, 1:408–11
Adu kadagiti tao a nabuniagan idiay Great Britain ti immakar a napan iti Nauvoo tapno tumulongda a mangbangon iti siudad ken iti templo. Tinungpal ti Apo ti karina a mangaywan kadagiti pamilia da Heber ken Brigham bayat ti panagserbida Kenkuana kas misionario.
Saints, 1:437–39