Makita dagiti Saksi dagiti Pinanid ti Libro ni Mormon

Intultuloy da Joseph, Emma, ken Oliver ti panagipatarus kadagiti pinanid a balitok iti pagtaengan dagiti Smith iti Pennsylvania. Ngem kayat dagiti tao iti ilida a pagsardengen ida. Adda gayyem ni Oliver nga agnagan David Whitmer nga agnanaed idiay New York. Dinamag ni Oliver ken ni David no mabalinda ti umakar iti pamilia Whitmer tapno mangileppas iti panagipatarus.

Saints, 1:68

Immanamong ni David ken ti pamiliana. Pinasangbayda da Joseph, Emma, ken Oliver iti pagtaenganda. Ita makapagtrabahoda iti panagipatarus a sitatalna. Adu a tattao ti agnanaed iti pagtaengan dagiti Whitmer. Kaipapanan dayta nga adu ti trabaho nga aramiden, nangnangruna iti nanang ni David, ni Mary.

Saints, 1:68–70

Maysa nga aldaw, kabayatan ti panagtrabaho ni Mary, simmarungkar kenkuana ni anghel Moroni. Kinunana nga ammona a mangpabannog kenkuana ti amin a nayon a trabaho. Kayatna a papigsaen ti pammatina. Linuktanna ti maysa a bag ket inruarna dagiti pinanid a balitok. Linukibna dagiti panid ket impakitana ken ni Mary ti sinurat. Inkarina ken ni Maria a mabendisionanto isuna.

Saints, 1:70–71

Sumagmamano a tao ti saan a namati a pudno dagiti pinanid. Nagtulnog ni Joseph iti bilin ti Apo a saanna nga ipakita dagiti pinanid iti asinoman. Kinuna ti Apo a palubosanna ti tallo pay a saksi a mangkita kadagiti pinanid. Kiniddaw da David Whitmer, Martin Harris, ken Oliver Cowdery no mabalinda ti agsaksi. Kinuna ti Apo a mabalinda.

Doktrina ken Katulagan 5:11–12; 17; Saints, 1:73

Napan da Joseph, Martin, Oliver, ken David iti kakaywan. Nagparintumengda ket nagsisinnublatda a nagkiddaw iti Dios no mabalinda a kitaen dagiti pinanid, ngem awan ti napasamak.

Saints, 1:73

Narikna ni Martin Harris nga isu ti gapu a saan a nasungbatan ti kararagda. Pimmanaw ni Martin, ket nagtultuloy a nagkararag dagiti dadduma.

Saints, 1:73

Kalpasanna nagparang ti maysa nga anghel iti naraniag a lawag. Impakitana kada Oliver ken David dagiti pinanid a balitok ken ti naisurat kadagitoy. Nangngegda ti timek ti Dios nga agkuna nga impatarus ni Joseph dagiti pinanid babaen ti bileg ti Dios ken husto ti patarus. Kinuna pay ti Dios a nasken nga ibagada iti tunggal maysa no ania ti nakita ken nangngegda.

“Ti Pammaneknek dagiti Walo a Saksi”; Saints, 1:73–74

Sinapul ni Joseph ni Martin. Agkarkararag pay laeng. Nakipagkararag ni Joseph kenkuana. Kalpasanna, nagparang ti anghel ket impakitana dagiti pinanid ken ni Martin, kas met laeng iti inaramidna kada Oliver ken David.

Saints, 1:74

Kalpasanna, napan sinapul ni Joseph dagiti dadakkelna, a sumarsarungkar ken ni Mary Whitmer. Imbagana kadakuada no kasano ti ragsakna ta nakita dagiti dadduma a tao dagiti pinanid. Ita maibaga dagiti saksi kadagiti tao a pudno ti ibagbaga ni Joseph. Imbaga ni Martin iti amin no kasano ti ragsakna ta pinalubosan ti Dios isuna nga agbalin a maysa kadagiti saksi.

Saints, 1:74–75

Kalpasan ti sumagmamano nga aldaw, imbaga ti Apo ken ni Joseph nga ipakitana dagiti pinanid a balitok iti walo pay a tattao—ti amana, dua kadagiti kakabsatna a lallaki, uppat kadagiti kakabsat a lallaki ni David, ken ti kayong ni David. Naiggamanda dagiti pinanid ken linukibda dagiti panid. Ammoda a pudno dagiti pinanid.

“Ti Pammaneknek dagiti Walo a Saksi”; Saints, 1:75

Nalpas itan ti patarus ti Libro ni Mormon. Insubli ni Joseph dagiti pinanid a balitok ken ni anghel Moroni. Ita, panawenen tapno maimaldit dagiti kopia ti libro tapno mabasa daytoy ti tunggal maysa ken masursuroda ti ad-adu pay maipapan ken Jesucristo.

Saints, 1:75–76

Adu a kuarta ti magastos iti pannakaimaldit ti Libro ni Mormon. Insuko ni Martin Harris ti paset ti talonna a pangbayadna iti daytoy. Inaramidna daytoy gapu ta ammona a pudno ti Libro ni Mormon. Tunggal kopia ti libro ket addaan iti pammaneknek ni Martin ken dagiti dadduma pay a saksi tapno mabasa ti amin. Saan a pulos nga inlibak dagiti saksi ti pammaneknekda.

Doktrina 19:26–27, 34–35; Saints, 1:76–78