Ited da Joseph ken Hyrum ti Biagda para iti Ebanghelio

Madanagan ni Joseph Smith. Ania ngata ti mapasamak iti Simbaan no matay? Kayatna a siguraduen nga agtultuloy ti aramid ti Apo. Isu nga inummongna dagiti Apostol ket intedna kadakuada dagiti tulbek ti kinasaserdote nga inted ni Jesucristo kenkuana. Kayatna a sawen a mabalin dagiti Apostol ti mangidaulo iti Simbaan ti Apo ken mangaramid iti trabahona. Daytoy ti nakatulong a nangpasayaat iti rikna ni Joseph.

Saints, 1:519–20

Ngem adu a tattao ti nakapungtot ken ni Joseph. Kayat pay ketdi ti dadduma a mangpatay kenkuana. Saanda a nagustuan no ania ti insursurona. Nagsuratda maipapan kenkuana iti maysa a pagiwarnak tapno ad-adu pay a tattao ti agpungtot ken ni Joseph ken iti Simbaan. Kayat ti sumagmamano kadakuada a rauten ti Nauvoo.

Saints, 1:526–28, 530–32, 533–34

Pinadadael ni Joseph ken ti dadduma pay a lider idiay Nauvoo ti pagimalditan tapno mapasardeng ti panagsaknap ti gura. Daytoy ti ad-adda pay a namagpungtot kadagiti tao. Imbaga ti gobernador ken ni Joseph a mapan iti siudad ti Carthage tapno adda maysa nga ukom a makaikeddeng no linabsingna ti linteg. Ammo ni Joseph a no mapan iti Carthage, patayen isuna dagiti tao.

Doktrina ken Katulagan 135:4; Saints, 1:533–37, 539–41

Ngem kayat pay ni Joseph nga agbalin a natalged dagiti Santo. No napan isuna iti Carthage, nalabit a panawan dagiti tao dagiti Santo nga is-isuda idiay Nauvoo. Inkeddeng ni Joseph ti mapan. Binendisionanna ni Emma ken dagiti annakna, inagkanna ida tapno agpakada, ket pimmanaw a napan iti Carthage.

Saints, 1:542–44

Kimmuyog ken ni Joseph ti kabsatna a ni Hyrum. Kasta met da John Taylor, Willard Richards, ken dadduma pay a gagayyem. Bayat ti ipapanawda, pinagsardeng ni Joseph ti kabaliona ket timmaliaw manen iti Nauvoo. “Daytoy ti kapintasan a lugar ken dagiti kasisingpetan a tao iti baba dagiti langit,” kinunana.

Saints, 1:543–45

Idi simmangpetda iti Carthage, naipupokda iti pagbaludan. Bayat ti kaaddada iti pagbaludan, imbasa ni Hyrum kadakuada ti Libro ni Mormon. Imbaga ni Joseph kadagiti agbambantay a pudno ti Libro ni Mormon.

Saints, 1:546

Tapno maliwliwa dagiti gagayyemna, nagkanta ni John Taylor iti maysa a himno maipapan ken ni Jesus. Napintas daytoy, ket kiniddaw ni Hyrum a kantaenna manen daytoy.

Saints, 1:549

Idi agangay iti dayta nga aldaw, nagdardaras a simrek iti pagbaludan dagiti makapungtot a lallaki a nakaiggem iti paltog. Induronda ti ridaw ket rinugianda a pinaltogan ti siled a yan ni Joseph ken dagiti gagayyemna. Nakaro ti pannakadangran ni John Taylor. Napapatay da Hyrum ken Joseph.

Doktrina ken Katulagan 135:1–2; Saints, 1:550–52

Nalidayan unay dagiti Santo idi naammuanda a natayen da Joseph ken Hyrum. Ngem ammoda a ti panangpapatay iti Propeta ket saan a mangpasardeng iti Simbaan. Daytoy ti Simbaan ti Mangisalakan, ket itultuloyna nga idauluan daytoy. Agtultuloy a dumakdakkel ti Simbaan ken bembendisionanna dagiti annak ti Dios iti intero a lubong.

Saints, 1:553–59