Dagiti Estoria iti Nasantuan a Kasuratan
Ti Hawn’s Mill

“Ti Hawn’s Mill,” Dagiti Estoria iti Doktrina ken Katulagan (2024)

“Ti Hawn’s Mill,” Dagiti Estoria iti Doktrina ken Katulagan

Oktubre 1838–Pebrero 1839

Ti Hawn’s Mill

Maysa a panangraut ken maysa a milagro

Ni Willard Smith ken ti pamiliana iti Hawn’s Mill.

Agtawen idi ni Willard Smith iti 11. Nagnaed ti pamiliana iti Hawn’s Mill, Missouri, a kaduana dagiti dadduma pay a Santo. Kayatda ti agguummong iti mabiit a kadua dagiti Santo iti Far West.

Doktrina ken Katulagan 115:7–8; Saints, 1:347–48

Dagiti tao nga um-umay a mangraut kadagiti Santo iti Hawn’s Mill.

Maysa nga aldaw, kadua ni Willard ti amana ken dagiti kakabsatna a da Sardius ken Alma. Kellaat a nangngegda dagiti panagputok ti paltog ken ikkis. Immay dagiti tao a mangraut kadagiti Santo.

Saints, 1:348–49

Dagiti Santo nga aglemlemmeng kadagiti mangraut iti Hawn’s Mill.

Nagtaray ti tunggal maysa tapno agsapul iti natalged a lugar. Adu a lallaki ken ubbing ti naglemmeng iti pagaramidan ti panday. Simrek met ti ama ken dagiti kakabsat ni Willard, ngem naisina kadakuada ni Willard. Naglemmeng iti likudan ti maysa a bunton ti kayo. Nangngegna dagiti panagputok ti paltog iti aglawlawna.

Saints, 1:349, 353

Ni Willard nga agtartaray.

Nagtaray ni Willard iti nadumaduma a lugar tapno aglemmeng. Kamaudiananna, nagsardeng dagiti panagputok ti paltog. Pimmanawen dagiti nangraut iti Hawn’s Mill.

Saints, 1:353

Ni Willard iti pagaramidan ti panday.

Napan ni Willard iti pagaramidan ti panday tapno birokenna ti pamiliana. Napapatay ti amana ken ni Sardius. Ngem sibibiag pay laeng ti bassit a kabsat ni Willard a ni Alma.

Saints, 1:353

Ni Willard a mangbagbagkat iti kabsatna a ni Alma.

Napaltogan ni Alma iti padingpadingna. Nakaro ti pannakadangranna. Binagkat ni Willard ni Alma ket inyawidna iti tolda ti pamiliada.

Saints, 1:353–54

Ni Amanda Smith a mangikarkararagan iti anakna a ni Alma.

Saan nga ammo ti nanang ni Willard, a ni Amanda, no kasano a matulonganna ti padingpading ni Alma. Ngem ammona ti inaramid ti Dios. Nagkararag, ket nangngegna ti maysa a timek a nangibaga kenkuana iti eksakto nga aramidenna.

Saints, 1:354

Ni Amanda a mangtartaripato iti sugat ni Alma.

Binugguan ni Amanda ti sugat ni Alma iti dapo. Kalpasanna ginilingna ti sumagmamano a ramut ti kayo ket inkabilna daytoy iti sugatna. Binungonna ti padingpadingna iti lupot. “Agiddaka a kasta, ket dika aggunay,” kinunana, “ket ti Apo mangaramidto kenka iti sabali pay a padingpading.”

Saints, 1:354–55

Ni Amanda nga agkarkararag para iti tulong.

Idi agangay, kinuna ti gobernador ti Missouri a masapul a pumanaw dagiti Santo iti estado wenno mapapatayda. Ngem saan latta a naimbagan ti padingpading ni Alma. Nagkararag ni Amanda ket nagkiddaw iti Apo iti tulong. Maysa a timek ti nangibaga kenkuana a saanto a pulos a panawan ni Jesus ti pamiliana. Narikna ni Amanda a kasla awan ti makadangran kenkuana.

Doktrina ken Katulagan 88:83; Saints, 1:372, 378–79

Ni Alma a magmagna kalpasan a naimbagan ti padingpadingna.

Di nagbayag kalpasan ti panagkararagna, nangngeg ni Amanda dagiti annakna nga agpukpukkaw. Nagtaray tapno birokenna ida, ket idi nasarakanna ida, agtartaray ni Alma iti aglawlaw. “Naimbagakon, Nanang, Naimbagakon!” kinunana. Naagasanen ti padingpadingna! Maysa daytoy a milagro manipud iti Apo. Pimmanaw ni Amanda ken dagiti annakna idiay Missouri tapno agbirokda iti nataltalged a lugar a kaduada dagiti dadduma pay a Santo.

Saints, 1:379