Dagiti Estoria iti Nasantuan a Kasuratan
Panangbangon iti Templo iti Kirtland

“Panangbangon iti Templo iti Kirtland,” Dagiti Estoria iti Doktrina ken Katulagan (2024)

“Panangbangon iti Templo iti Kirtland,” Dagiti Estoria iti Doktrina ken Katulagan

Disiembre 1832–Marso 1836

Panangbangon iti Templo iti Kirtland

Maysa a naisangsangayan a balay para ti Apo

Da Joseph ken Emma Smith ken Phebe ken Sidney Rigdon a kumitkita iti lugar a pangbangonano iti Templo iti Kirtland.

Imbaga ti Apo ken ni Joseph Smith a panawenen a bangonen dagiti Santo ti naisangsangayan a balay iti Kirtland. Agbalinto daytoy a balay a maysa a templo, lugar a pangsarungkaranto ti Apo kadagiti taona ken pagaramidanna kadagiti kari kadakuada. Ikkannanto ida iti naisangsangayan a sagut iti templona. Inawaganna ti sagut kas maysa nga endowment of power.

Doktrina ken Katulagan 88:119; 95:8; Saints, 1:205

Ni Hyrum Smith iti papanna a tumulong nga agtrabaho iti templo.

Saan a rinugian dagiti Santo ti panangbangon a dagus iti templo. Sumagmamano a bulan kalpasanna, impalagip ti Apo kadakuada a napateg unay ti templo. Nagtaray ni Hyrum Smith a napan iti balay dagiti dadakkelna tapno agurnong kadagiti ramit. Idi dinamag ni nanangna no sadino ti papananna, kinunana a kayatna nga isu ti umuna nga agtrabaho iti balay ti Apo.

Doktrina ken Katulagan 95:1–8

Ni Sidney Rigdon a mangbuybuya iti templo a mabangbangon.

Nangrugi dagiti Santo iti Kirtland a mangbangon iti templo. Adu a kuarta ti magastos ket adu ti aramiden. Adu a kuarta ti inted dagiti miembro ti Simbaan a kas ken ni Sidney Rigdon a pangbangon iti templo. Naragsakda a mangsurot kadagiti bilin ti Apo ken umawat kadagiti bendisionna iti balayna.

Saints, 1:209–211

Ni Sidney nga agkarkararag para iti tulong iti templo.

Bayat ti panagtrabaho dagiti Santo iti templo, nangrugi a maibus ti kuartada. Nadanagan ni Sidney ken ti dadduma pay a lider ti Simbaan. Nagkararag ni Sidney iti Dios para iti tulong.

Saints, 1:210–11

Ni Caroline Tippets a sumangsangpet tapno tumulong.

Adu a kuarta ti naurnong ti maysa a miembro ti Simbaan nga agnagan Caroline Tippets ken ti pamiliana. Pinalugodan ni Caroline ti Simbaan nga umutang iti kuartada tapno makatulong a mangbangon iti templo.

Saints, 1:211–13

Dagiti ubbing a tumultulong a mangurnong kadagiti naburak a sarming.

Adu a Santo idiay Kirtland ti nagtrabaho a sipapasnek a mangbangon iti templo. Sumagmamano ti nagmaneho kadagiti karison a napno iti bato nga agturong iti templo. Nagaramid ti dadduma kadagiti kawes ken taraon para kadagiti trabahador. Nagummong dagiti ubbing kadagiti pedaso ti naburak a sarming tapno ipagiling ken ikabilda kadagiti diding ti templo tapno agrimat ken agsilnag dagitoy iti lawag ti init.

Saints, 1:210, 219, 221

Nalpas ti Templo iti Kirtland.

Iti nabiit nalpas ti Templo iti Kirtland! Naragsak dagiti Santo a sumrek iti balay ti Apo tapno umawatda kadagiti bendision nga inkarina kadakuada.

Saints, 1:221