Ti Pamilia a Yanagida

Nagnaed idiay Japan da Toshiko ken Tokichi Yanagida. Namatida ken ni Jesucristo ket nagkamengda iti Simbaanna. Ngem narigat ti biag idiay Japan iti dayta a panawen. Maysa a gubat ti nangdadael iti adu a pagtaengan ken pasdek. Kayat da Toshiko ken Tokichi ti mangbangon iti maysa a balay para iti pamiliada, ngem nakurapayda unay.

Saints, 3:543

Ammo dagiti Yanagida a kayat ti Apo nga agbayadda iti apagkapullo, ngem saanda a sigurado no kabaelanda. Dinamag ni Toshiko iti maysa a misionario no ania ti rumbeng nga aramidenda. “Narigat kadakami ti mangted iti apagkapullo,” kinunana. Inkari ti misionario a no agbayadda ti apagkapulloda, tulonganto ida ti Apo a mangragpat iti panggepda a tun-oyen a maaddaan iti maysa a bukod a pagtaengan.

Doktrina ken Katulagan 119; Saints, 3:543–44

Saan a sigurado idi da Toshiko ken Tokichi. Dandani idi awananda iti umdas a kuarta a panggatang iti pangngaldaw ti anakda iti eskuela. Ngem inkeddengda ti agtalek iti Apo ken agbayad iti apagkapullo.

Saints, 3:543–44

Binendisionan ti Apo ti pamilia a Yanagida. Di nagbayag nakagatangda iti daga ken nangrugida iti panangbangon iti maysa a pagtaengan.

Saints, 3:544

Maysa nga aldaw adda immay a maysa nga inspektor. Kinunana nga adda problema ti dagada, ket saanda a mabalin ti mangbangon iti maysa a balay sadiay. Imbagana kadagiti trabahador nga agsardengda.

Saints, 3:544

Kasta unay ti ladingit dagiti Yanagida. Imbagada kadagiti misionario no ania ti napasamak. Kinuna dagiti misionario a makipagayuno ken makipagkararagda kadagiti Yanagida.

Saints, 3:545

Idi agangay, dimteng ti sabali pay nga inspektor. Kinunana a mabalin a marisut ti problema iti dagada. Mabalin a bangonen dagiti Yanagida ti pagtaenganda. “Adda la ketdi nasayaat nga inaramidyo a dua,” kinuna ti inspektor kada Toshiko ken Tokichi. Ammoda a binendisionan ida ti Apo. Naragsakanda ta nagtalekda Kenkuana ken nagbayadda iti apagkapullo.

Saints, 3:545