Elijah Able

Inawagan ti Apo ti maysa a lalaki nga agnagan iti Elijah Able nga agbalin a misionario. Insuro ni Elijah da Eunice ken Charles Franklin maipapan iti ebanghelio ni Jesucristo. Imbagana kadakuada maipapan iti Libro ni Mormon ken ni Propeta Joseph Smith. Namati da Eunice ken Charles no ania ti insurona ket kayatda ti makikappeng iti Simbaan. Binuniagan ida ni Elijah.

Saints, 1:316

Pimmanaw ni Elijah a mangibinglay iti ebanghelio iti sabali nga ili. Maysa a rabii, sumagmamano a bulan kalpasanna, natagtagainepna ti gayyemna a ni Eunice. Iti tagtagainep, saanen a sigurado ni Eunice a pudno ti Libro ni Mormon wenno ni Joseph Smith ti maysa a propeta. Idi makariing ni Elijah nagsubli a dagus tapno kitaenna ni Eunice.

Doktrina ken Katulagan 75:27; Saints, 1:315–16

Nasdaaw ni Eunice idi nakitana ni Elijah iti ruanganna! Husto ti tagtagainep ni Elijah: Saanen a mamati ni Eunice iti Libro ni Mormon wenno ni Joseph Smith.

Saints, 1:317

Kiniddaw ni Elijah ni Eunice nga umay dumngeg kenkuana a mangasaba iti maysa nga eskuelaan. Bayat ti pannakangngegna kadagiti balikas ni Elijah, nariknana manen ti Espiritu Santo. Ammona a pudno ti ebanghelio!

Saints, 1:317

Inkari ni Elijah ken ni Eunice nga agsublinto kalpasan ti dua a lawas tapno mangasaba manen. Ngem sumagmamano a tattao iti ili ti saan a mangayat nga agsubli. Kalpasan a pimmanaw ni Elijah, rinugianda nga imbaga iti tunggal maysa a pinatay ni Elijah dagiti tao. Nangidiayada iti maysa a gunggona iti asino man a makasarak kenkuana.

Saints, 1:318

Ammo ni Eunice nga agul-ulbod dagiti tao maipapan ken ni Elijah. Saanna a pinatay ti asino man. Isu ket nasayaat a tao ken maysa a katulongan ti Dios. Ammona a ti kinaulbodda ket saan a nanglapped ken ni Elijah nga umay iti ilida tapno mangasaba. Imbaga ni Eunice iti tattao nga agsublinto ni Elijah. “Saluadannanto ti Dios,” kinunana.

Saints, 1:318

Nagsubli ni Elijah. Immay iti isu met laeng nga eskuelaan a nagkasabaanna idi. Napno daytoy kadagiti tao nga agtarigagay a mangpatiliw kenkuana. Nagtakder ni Elijah iti sanguanan dagiti tao. Kinunana a no tarigagayanda a tiliwen isuna, nasken nga aramidenda itan, sakbay a mangrugi iti panangisurona. No saan, nasken a bay-anda a mangisuro isuna.

Saints, 1:318

Awan ti nagtignay. Naguray ni Elijah, ngem siuulimek a nagtugaw ti ummong. Nagkanta ni Elijah iti himno, nagkararag, ken insurona ti ebanghelio ni Jesucristo. Adda ti bileg ti Dios kenkuana. Kalpasan a nalpasna ti panangisuro, kinasaritana dagiti gagayyemna a da Eunice ken Charles ket intuloyna ti misionna a sitatalna.

Saints, 1:319