“Agnanayon a Kallaysa ken dagiti Pamilia,” Dagiti Estoria iti Doktrina ken Katulagan (2024)
“Agnanayon a Kallaysa ken dagiti Pamilia,” Dagiti Estoria iti Doktrina ken Katulagan
1843–1846
Agnanayon a Kallaysa ken dagiti Pamilia
Nailantip babaen ti pannakabalin ni Jesucristo
Idi nagkallaysa da Emma ken Joseph, namatida nga agpatingga ti panagasawada inton matayda. Kastoy ti kasasaad ti amin a panagasawa idi. Ngem kalpasanna imbaga ti Apo ken ni Joseph a mabalin nga agpaut iti agnanayon dagiti kallaysa ken pamilia.
Saints, 1:413
Insuro ti Apo ken ni Joseph ti maipapan iti agnanayon a kallaysa. Babaen ti bileg ti kinasaserdote, agaramid ti maysa a lalaki ken maysa a babai iti katulagan iti Apo. No tungpalenda ti katulaganda, ikari ti Apo nga agpautto iti agnanayon ti panagasawada. Maawagan daytoy iti pannakailantip. Di nagbayag, nailantip da Joseph ken Emma para iti kinaagnanayon.
Doktrina ken Katulagan 132:7, 19–24; Saints, 1:413, 432–33, 481–82, 492, 502–3
Naammuan pay ni Joseph a no mailantip ti maysa a lalaki ken maysa a babai, mailantipto kadakuada dagiti annakda. Gapu iti pannakabalin ni Jesucristo, makapagpaut iti agnanayon ti pamiliada. Idi imbaga ni Joseph kadagiti Santo maipapan iti daytoy a bendision, naragsakanda unay! Saanda a makauray a mailantipda a sangsangkamaysa.
Doktrina ken Katulagan 131:2; 132:6–7; Saints, 1:492–93, 580
Idi agangay insuro ti Apo a masapul a maaramid ti pannakailantip iti templo. Nagtrabaho a sipapasnek dagiti Santo a mangileppas iti templo idiay Nauvoo tapno mailantipda a sangsangkamaysa. Idi nakasaganan ti templo, adu a pamilia ti nailantip. Nailantipda pay kadagiti miembro ti pamilia a natayen. Agyamyamanda iti daytoy a bendision!
Saints, 1:579–80