“Agserbi ni Telii iti Apo,” Dagiti Estoria iti Doktrina ken Katulagan (2024)
“Agserbi ni Telii iti Apo,” Dagiti Estoria iti Doktrina ken Katulagan
Abril 1844–Marso 1852
Agserbi ni Telii iti Apo
Panangbangon iti Simbaan iti Tubuai
Maysa a babai nga agnagan iti Telii ti agnanaed iti maysa a bassit nga isla a maawagan iti Tubuai. No dadduma sumarungkar dagiti misionario manipud iti nadumaduma a simbaan iti Tubuai, ngem gagangay a saanda unay nga agtalinaed iti nabayag. Maysa nga aldaw idi 1844, naragsakan ni Telii a nakadamag a simmangpet iti Tubuai dagiti misionario manipud iti Ti Simbaan ni Jesucristo dagiti Santo iti Ud-udina nga Aldaw.
Doktrina ken Katulagan 1:1; 133:8
Agturong dagiti misionario iti sumagmamano a daddadakkel nga isla. Ngem kayat dagiti tao iti Tubuai nga agtalinaedda ken isuroda ti ebanghelio. Kinuna ni Telii ken ti asawana a ni Nabota a mabalin nga agdagus dagiti misionario iti pagtaenganda. Maysa kadagiti misionario, ni Addison Pratt, ti immanamong.
Saints, 1:573–74
Imbinglay da Telii ken Nabota ti amin a banag nga adda kadakuada ken ni Addison. Insuroda kenkuana nga agsao iti pagsasaoda. Insuro kadakuada ni Addison ti maipapan ken ni Jesucristo.
Imbaga ti Espiritu Santo kada Telii ken Nabota a pudno ti ebanghelio ti Mangisalakan. Isuda ti immuna a tattao a nabuniagan iti Tubuai.
Saints, 1:573–74
Nagbalin a nasinged nga aggagayyem da Telii, Nabota, ken Addison. Naggigiddanda a nagbaniaga ket insuroda ti ebanghelio iti Tubuai ken iti dadduma pay nga isla. Idi pinadas dagiti tao nga ibaga kadagiti Santo iti Tubuai a nasken a saanda a nagkameng iti Simbaan, nangisuro ni Telii kadakuada manipud kadagiti nasantuan a kasuratan a pudno ti Simbaan.
Saints, 2:27, 45
Kayat ni Telii a tulongan ti ad-adu pay a tattao iti Tubuai nga agsursuro iti ebanghelio ni Jesucristo. Nagisurat kadagiti teksto iti musika manipud iti nasantuan a kasuratan ken inawisna dagiti dadakkel a grupo a makipagkanta kenkuana iti rinabii. Ti panangkanta kadagiti kanta ni Telii ti nangtulong iti adu a tattao a makasursuro manipud kadagiti nasantuan a kasuratan ken manglagip no ania dagiti nasursuroda.
Kalpasan ti adu a tawen, ad-adu pay a misionario ti immay idiay Tubuai, agraman ti pamilia ni Addison. Pinasangbay ida ni Telii iti pagtaenganna. Nakipagtrabaho isuna iti asawa ni Addison, ni Louisa, nga agserbi kadagiti babbai ti Tubuai.
Saints, 2:133–34
Kalpasan ti sumagmamano a gundaway, napilitan dagiti misionario a pumanaw iti Tubuai ken iti dadduma pay nga isla. Ngem intultuloy ni Telii ti panangisuro ken panangidaulo kadagiti Santo. Gapu iti pagwadan ken panagserbi ni Telii, nagtalinaed a natibker ti Simbaan iti Tubuai.
Saints, 2:150–51