Ti Kampo ti Israel

Nagkasapulan iti tulong dagiti Santo nga agnanaed idi iti Independence, Missouri. Inkagumaanda a binangon ti Zion kas imbilin ti Dios. Ngem saan a kayat ti dadduma a tattao iti ili nga addada sadiay. Pinapanawda dagiti Santo kadagiti pagtaenganda.

Saints, 1:195

Agnanaed idi ni Joseph Smith idiay Kirtland. Nadamagna ti napasamak kadagiti Santo idiay Missouri, ket naladingitan. Nagkararag tapno maammuanna no ania ti aramidenna. Imbaga ti Apo ken ni Joseph a mangbirok kadagiti tao a kumuyog kenkuana a mapan iti Missouri. Nangnamnamada a makatulong ti gobierno kadagiti Santo a mangisubli kadagiti pagtaenganda.

Doktrina ken Katulagan 103:1–2, 11–20, 30–34; Saints, 1:195–96

Agarup 100 a tattao ti nagboluntario a makikadua kenkuana. Inawagan ti Propeta daytoy a grupo iti Kampo ti Israel. Maragsakanda a tumulong kadagiti Santo iti Missouri.

Saints, 1:197–99

Ni Brigham Young ken ti gayyemna a ni Heber Kimball ket paset ti grupo. Maysa nga agtutubo a lalaki nga agnagan Wilford Woodruff ti immay manipud iti New York tapno tumulong.

Saints, 1:197–98

Adu pay a tattao ti nagkameng iti kampo. Nagmartsada iti unos ti makabulan ket bimmallasiwda iti nalawa a karayan nga agturong iti Missouri. Nabannogda ken nasakit ti bagida. Ti napaut a panagmartsa ti nangpaupay met iti dadduma a tattao. Mabayag pay ti panagdaliasatda tapno makadanonda iti siudad ti Independence.

Saints, 1:200–201

Bayat ti panagtultuloyda a nagmartsa, adda babai a nangawag kadakuada. Kinunana nga adda dagiti lallaki nga umay mangpapatay kadakuada.

Saints, 1:203

Nagsardeng ti Kampo ti Israel iti rabii iti maysa a turod iti ngatuen ti maysa a karayan. Bayat ti panangbangonda iti kampo, lima a lallaki ti immasideg kadakuada a nakasakay kadagiti kabalio. Impannakkelda a 300 pay a lallaki ti adda iti dalanda a mapan mangraut iti kampo. Adu a miembro ti Kampo ti Israel ti madanagan. Imbaga ni Joseph kadakuada a mamatida a tulonganto ida ti Dios.

Saints, 1:203

Di nagbayag napno ti tangatang kadagiti maris dapo nga ulep. Nangrugi ti napigsa a tudo. Immadalem ti karayan. Rineppaak ti angin dagiti kayo. Naggilap ti kimat iti tangatang. Nasarakan ni Joseph ken dagiti dadduma ti maysa a bassit a simbaan a mabalin a pagyananda a sitatalged. Nagkantada kadagiti himno iti unos ti rabii. “Adda ti Dios iti daytoy a bagyo!” Kinuna ni Joseph.

Saints, 1:203–4

Ti bagyo ti nangpasardeng kadagiti tao a mayat a mangraut kadakuada. Natalged ti kampo. Ngem kinuna ti gobierno a saanda a tulongan dagiti Santo. Imbaga ti Apo ken ni Joseph a mabalin nga agawiden ti Kampo ti Israel. Masapul a bangonen dagiti Santo ti Zion babaen ti panangtungpalda kadagiti bilin ti Dios. Inkarina nga Isu ti “makiranget kadagiti dangadang ti Zion.”

Doktrina ken Katulagan 105:1–19; Saints, 1:204–5

Nasakit ti nakem ti dadduma pay a miembro ti kampo idi nangngegda daytoy. Nagladingitda ta saanda nakiranget para iti Zion. Impagarup ti sumagmamano a tattao a napaay ti Kampo ti Israel. Ngem dagiti dadduma, a kas kada Brigham Young, Heber, ken Wilford, ket nagyamanda iti gundaway a makikadua ken ni Propeta Joseph ken agsursuro manipud Kenkuana.

Saints, 1:205–6

Idi agangay, imbaga ti Apo ken ni Joseph Smith nga awaganna ti Sangapulo-ket-dua nga Apostol a tumulong a mangidaulo iti Simbaanna. Dagiti Apostol ti agbalinto a naisangsangayan a saksi iti nagan ni Jesucristo iti intero a lubong. Walo kadagiti Sangapulo-ket-dua nga Apostol ti nagmartsa iti Kampo ti Israel. Ti panagserbida a kaduada ni Joseph ti nakatulong a nangisagana kadakuada para iti daytoy napateg nga awag.

Doktrina ken Katulagan 18:26–27; 107:23; Saints, 1:214–17