Mabukel Ti Simbaan ni Jesucristo

Naimaldit itan ti Libro ni Mormon, ket adda manen ditoy daga ti bileg ti kinasaserdote ti Dios. Imbaga ti Apo ken ni Joseph Smith a panawenen tapno mabukel ti Simbaan ni Jesucristo.

Saints, 1:84

Idi Abril 6, 1830, agarup 40 a babbai ken lallaki ti immay iti pagtaengan ti pamilia Whitmer tapno mangbukel iti Simbaan. Inawagan ti Apo da Joseph ken Oliver a mangidaulo iti Simbaanna. Kiniddaw da Joseph ken Oliver kadagiti tao nga itag-ayda dagiti imada tapno ipakitada a kinanunonganda ida kas liderda.

Doktrina ken Katulagan 20:1–3; Saints, 1:84

Kalpasanna, binendisionan da Joseph ken Oliver ti sakramento. Intedda daytoy kadagiti tao a mangtulong kadakuada a manglagip ken ni Jesucristo. Impatay da Joseph ken Oliver dagiti imada iti ulo dagiti tao a nabuniagan. Kinumpirmaanda ida a miembro ti Simbaan ken intedda kadakuada ti sagut ti Espiritu Santo.

Doktrina ken Katulagan 20:75–79; Saints, 1:85

Nangted ti Apo ken ni Joseph iti maysa a mensahe para iti baro a Simbaan. Imbagana kadakuada nga isuratda no ania ti napasamak iti Simbaan. Kinunana a ni Joseph Smith ti propetana. Inkarina kadagiti miembro ti Simbaan a no surotenda dagiti bilin nga intedna ken ni Joseph, bendisionanna ida. Awanto ti bileg ti sairo a mangparmek kadakuada.

Doktrina ken Katulagan 21:1–6; Saints, 1:85

Naragsak unay dagiti tao a maaddaan iti Simbaan ni Jesucristo! Kalpasan ti miting, ad-adu pay a tattao ti nabuniagan, agraman ti ina ken ama ni Joseph. Idi umaon ni tatangna iti danum, inarakup ni Joseph isuna. “Nagbiagak a makakita ken ni tatangko a mabuniagan iti pudno a simbaan ni Jesucristo!” kinunana.

Saints, 1:86

Idi agangay iti dayta a rabii, napan ni Joseph iti kakaywan tapno makapagmaymaysa. Napnuan iti rag-o ti pusona. 10 a tawenen manipud idi umuna a nakitana ti Nailangitan nga Ama ken ni Jesucristo. Adun ti napasamak manipud idin. Nagyaman unay ni Joseph a nakatulong a mangisubli, wenno mangyeg manen, iti Simbaan ni Jesucristo!

Saints, 1:86