O Se “Sa” i Kana

O Alice Johnson o se faifeautalai sa auauna atu i lona atunuu, o Kana. Sa fiafia o ia e faasoa atu lana molimau ia Iesu Keriso ma fesoasoani i le tuputupu a’e o le Ekalesia.

Au Paia, 4:416–17

I se tasi aso, na maua ai e Alice se tala lē manuia. Na fai mai le faigamalo i Kana e le mafai ona toe faia ni sauniga lotu a le Ekalesia. Sa le mafai e faifeautalai ona toe a’oa’o atu.

Au Paia, 4:417

Na faamalosia e leoleo ia faifeautalai e tuua o latou fale mautotogi ma ave a latou uila. O nisi o tagata o le Ekalesia na tuuina i le falepuipui. Sa lokaina e fitafita fale o le Ekalesia ma sa le faatagaina se tasi i totonu. Na ta’ua e tagata lenei mea “o le sa.”

Au Paia, 4:417–18

Sa tatau ona o faifeautalai i le fale. Sa alu Alice e nonofo ma se uo i se isi taulaga. Sa popole o ia o le a le mafai lava ona ia faamae’aina lana misiona.

Au Paia, 4:418

Sa le mautonu, faanoanoa, ma fefefe le Au Paia i Kana. Sa latou mafaufau po o le a se mea sese na latou faia. Mata o le a latou toe o atu ea i le lotu?

Au Paia, 4:418

E ui lava ina sa le mafai ona latou faapotopoto faatasi ma a latou uarota, ae sa alolofa pea le Au Paia i le Alii ma mananao e tapuai atu ia te Ia. Sa latou faia sauniga faamanatuga i o latou fale. Sa faamanuiaina e tagata o le aiga o e sa i ai le perisitua le areto ma le vai ma tufa atu i le aiga atoa.

Mataupu Faavae ma Feagaiga 6:32; Au Paia, 4:419

O lea masina ma lea masina, na faaauau pea le sa. Sa usuina e le Au Paia viiga ma a’oa’o e le tasi le isi i le talalelei i o latou aiga. Sa latou asiasi atu i le tasi ma le isi e fesoasoani e faatumauina le malosi o lo latou faatuatua. Sa latou faataatia ese a latou sefuluai e totogi pe a mafai ona latou toe foi atu i le lotu. Sa latou tatalo ma anapopogi ina ia faamutaina le sa.

Au Paia, 4:436–37

Mulimuli ane, ina ua mavae le 18 masina, sa tonu i le malo e mafai ona toe faia e le Ekalesia ni sauniga. Sa talosaga atu se peresitene fou o le misiona e talanoa ia Alice, o le ua avea nei ma se tamaitiiti aoga i le kolisi. “E te manao e toe foi mai ma auauna atu i se misiona pe a tuua le aoga?” na ia fesili atu ai. “Leai,” sa ia fai mai ai. “Ou te fia auauna atu i le taimi lava nei!”

Au Paia, 4:437–39

Sa matuai fiafia lava Alice ma isi Au Paia ua mafai ona latou toe o i le lotu! I le Aso Sa muamua ina ua mavae le sa, e lua itula le umi o le sauniga faamanatuga ona o le toatele naua o tagata sa mananao e tuuina atu a latou molimau. Sa latou faamatala atu e le tasi i le isi le auala na faamanuiaina ai i latou e le Alii ma fesoasoani ia i latou e faatumauina le malosi o lo latou faatuatua.

Mataupu Faavae ma Feagaiga 20:75; Au Paia, 4:438