“Sini ma Fipe Rikitone,” Tala o Mataupu Faavae ma Feagaiga (2024)
“Sini ma Fipe Rikitone,” Tala o Mataupu Faavae ma Feagaiga
Oketopa–Novema 1830
Sini ma Fipe Rikitone
Suia o o laua olaga e talia ai le talalelei
O le a faasoa atu e Pale Palate ma isi le talalelei i Tagatanuu o Amerika. A o latou agai atu, sa manao Pale e faatali ma asiasi i lana uo o Sini Rikitone. O Sini o se faife’au na a’oa’oina Pale e uiga ia Iesu Keriso i le Tusi Paia. O lea la ua manao Pale e aoao Sini e uiga ia Iesu i le Tusi a Mamona.
Mataupu Faavae ma Feagaiga 32; Au Paia, 1:99
Sa faamatala e Pale ia Sini e uiga i le Tusi a Mamona ma valaaulia o ia e faitau i ai. Sa le’i mautinoa e Sini, ae ona o Pale o se uo, sa ia folafola mai ai o le a ia faia.
Au Paia, 1:100
Ina ua faitau e Sini le Tusi a Mamona, sa ia iloaina ai e mai le Atua. Sa ia faasoa atu ona lagona i lona faletua o Fipe.
Au Paia, 1:101
Ae sa le mautinoa e Sini po o le a le isi mea e fai. Pe afai e papatisoina o ia, o le a lē toe i ai sana galuega o se faife’au i lana lotu. E faapefea ona ia tausia Fipe ma le la fanau e toaono? O a ni lagona o tagata o lana ekalesia? Sa ia tatalo i le Tama Faalelagi mo se fesoasoani, ma sa ia maua se lagona filemu.
Au Paia, 1:101; Mataupu Faavae ma Feagaiga 19:23
Sa fesili Sini ia Fipe pe naunau o ia e lafoai lo la olaga toafimalie ae auai faatasi ma ia i lenei ekalesia fou. “O lo’u manao ia fai le finagalo o le Atua,” o lana tala lea, “pe oo mai ai le ola pe oo mai le oti.” Sa la filifili ina ia papatisoina.
Au Paia, 1:101
Mulimuli ane, sa feiloai ai Sini ma le Perofeta o Iosefa Samita. Na tuuina atu e le Alii ia Sini se savali e ala mai ia Iosefa. Na Ia fetalai mai sa Ia vaai i mea lelei na faia e Sini ma faafofoga i ana tatalo. Na ta’u atu e le Alii ia Sini e i ai Sana galuega tele mo ia e faia. O le a faia e Sini ni mea tetele.