“Ua Feiloai Newel ma Ann Whitney i le Perofeta o Iosefa,” Tala o le Mataupu Faavae ma Feagaiga (2024)
“Ua Feiloai Newel ma Ann Whitney i le Perofeta o Iosefa,” Tala o le Mataupu Faavae ma Feagaiga
Oketopa 1830–Fepuari 1831
Ua Feiloai Newel ma Ann Whitney i le Perofeta o Iosefa
O tatalo o le faatuatua na tali mai e le Alii
Sa umia e Ann ma Newel Whitney se faleoloa i Katelani, Ohaio. E lei ola ae Ann o alu i se lotu pe aoao e uiga i le Alii, ae sa manao e iloa o Ia. Ina ua uma ona faaipoipo i la’ua ma Newel, sa la tatalo soo ma ole atu i le Alii e taitai i la’ua.
Au Paia, 1:111–12
I se tasi po a o la tatalo, na vaai ai Ann ma Newel i se faaaliga vaaia. I le faaaliga, sa i ai se ao i luga a’e o le la fale. Sa faatumulia i la’ua i le Agaga o le Atua. Na siomia i la’ua e le ao. Ona la faalogoina lea o se leo mai le lagi. Sa fai atu ia i la’ua, “Sauni e talia le afioga a le Alii, aua ua oo mai.”
Au Paia, 1:111
Ina ua mavae sina taimi, sa sau Pale Palate i Katelani. Sa aoao atu e ia ma ana soa le talalelei a Iesu Keriso. O le taimi lava na faalogo ai Ann i mea na latou aoao atu, sa ia iloa ai e moni. Sa alu o ia i le fale e faasoa atu le tala ia Newel. E le’i umi ae papatisoina i la’ua.
Au Paia, 1:112
E lua masina mulimuli ane, na ō mai ai se tamāloa ma se fafine i le faleoloa o Newel. Sa le iloa e Newel i la’ua, ae sa faatalofa atu le tamaloa ia Newel ma ta’u lona igoa. Na fai mai le tamaloa, “O a’u o Iosefa le perofeta.” Sa ia faamalamalama mai sa tali mai le Alii i tatalo a Newel. Sa Ia auina atu Ema ma Iosefa e feiloai ia Ann ma Newel.
Au Paia, 1:113
Na iloa e Newel ma Ann ua taunuu le la faaaliga vaaia. Sa la fai atu ia Iosefa ma Ema la te nonofo faatasi ma i latou i lo latou fale. Sa alolofa Ann ma Newel ia Iesu ma Lana talalelei. Sa la tuuina atu mea uma sa la maua i le Au Paia ma i le Ekalesia a le Faaola.