O Le Aiga o Matini

Sa tietie atu Helvécio Matini i le fale mai le galuega i Rio de Janeiro, Pasila. Sa tumu le auala i taavale ma o lea sa leai ai se tasi o i latou na mafai ona minoi. Sa mafaufau Helvécio e uiga i lona olaga. Sa lelei lana galuega. Sa alofa o ia i lona faletua, o Rudá, ma lana fanau e toalua, o Marcus ma Marisa. Ae sa ia lagona lava le pei o loo i ai se mea o misi.

Au Paia, 4:229–30

Na oso ese Helvécio mai le taavale ma amata ona tatalo. “Lo’u Atua e,” sa ia fai mai ai, “Ou te iloa o loo e i ai iina i se nofoaga, ae ou te le iloa po o fea.” Sa ia ta’u atu i le Tama Faalelagi o loo sailia e lona aiga se mea, ma sa latou manaomia Lana fesoasoani. Ona toe oso lea o Helvécio i lana taavale ma agai atu i le fale.

Au Paia, 4:230

Mulimuli ane, na auina mai e le Alii ni faifeautalai mai le Iunaite Setete. Sa latou asiasi atu i le aiga o Matini. Na mātauina e Helvécio na latou aumaia se agaga filemu i lona aiga. Na ia iloa, i lena taimi, o tagata e uliuli le pa’u e masani ona le faia lelei i le Iunaite Setete. Sa ia fesili atu, “E faapefea ona taulimaina e le tou tapuaiga tagata uli?”

Au Paia, 4:230–31

Sa faamalamalama atu e faifeautalai e mafai ona papatisoina fanau uma a le Atua. Ae i lena taimi, o tagata uli e i ai tuaa mai Aferika sa le mafai ona umia le perisitua pe maua le tele o faamanuiaga o le malumalu. Sa tele isi mau fesili a Helvécio ma Rudá. Sa faia e faifeautalai le mea sili e la te tali atu ai.

Au Paia, 4:231

Mo le tele o tausaga, sa tatalo ai perofeta ia iloa po o afea e mafai ai ona tuuina atu faamanuiaga o le perisitua ma le malumalu i tagata uma.

Au Paia, 4:71

Sa filifili Helvécio ma Rudá e taumafai e o i le lotu. O le Au Paia iina sa matua agaalofa ma agalelei. Sa fiafia le aiga o Matini i mea sa latou aoaoina i le lotu.

Au Paia, 4:231–32

I se tasi aso, a o agai atu i le fale mai le lotu, sa ta’u atu ai e Marcus i lona aiga sa ia matauina e foliga mai ua sili atu lo latou fiafia. “Ou te iloa le mea e mafua ai,” o le tala lea a Marcus. “O le talalelei a Iesu Keriso.” Na iloa e le aiga atoa sa sa’o Marcus. Sa latou filifili e papatisoina ma faamauina.

Au Paia, 4:232

I tausaga mulimuli ane, sa pisi le Au Paia i Pasila i le fausiaina o se malumalu. Sa fiafia le aiga o Matini, ae sa latou faanoanoa foi. O le a le mafai ona latou ulu atu i le malumalu pe a uma ona faapaiaina. “Aua e te popole,” o le tala lea a Helvécio ia Rudá. “E silafia e le Alii mea uma.”

Au Paia, 4:293–94

E lei faigofie le tumau faamaoni. Sa ulagia e tagata le aiga o Matini. E oo lava i a latou uo sa le malamalama pe aisea na latou tumau ai i le Ekalesia. Ae sa iloa e Helvécio ma lona aiga o le Ekalesia a Iesu Keriso.

Au Paia, 4:251–52

I se tasi aso, ina ua sau Helvécio i le fale mai le galuega, sa fai atu Rudá, “E i ai sa’u tala fou, tala ofoofogia!” Ina ua mavae le tele o anapogi ma tatalo, sa maua e le perofeta, o Peresitene Spencer W. Kimball, se faaaliga. Sa ta’u atu e le Atua ia te ia soo se tasi, e tusa lava po o le a le lanu o lona pa’u, e mafai ona maua faamanuiaga uma o le perisitua ma le malumalu.

Tautinoga Aloaia 2; Au Paia, 4:318–19

O le aiga o Matini ma le toatele o isi sa faatalitali mo se taimi umi. O lenei la ua uma le faatalitali! Na maua e Helvécio ma Marcus le perisitua. Sa faamauina Helvécio, Rudá, ma le la fanau o se aiga i le malumalu. Ua mafai nei ona latou maua faamanuiaga uma o le talalelei.

Au Paia, 4:319–21