Ua Vaai Molimau i Papatusi o le Tusi a Mamona

Sa faaauau pea ona faaliliu e Iosefa, Ema, ma Oliva papatusi auro i le fale o Samita i Penesilevania. Ae sa mananao tagata o lo latou taulaga e taofi i latou. Sa i ai se uo a Oliva e igoa ia Tavita Uitimera sa nofo i Niu Ioka. Sa fesili atu Oliva ia Tavita pe mafai ona la siitia atu i le aiga o Uitimera e faamaea ai le faaliliuga.

Au Paia, 1:68

Sa malilie i ai Tavita ma lona aiga. Sa latou talileleia Iosefa, Ema, ma Oliva i totonu o lo latou fale. Ua mafai nei ona latou galulue i le faaliliuga i le filemu. Sa toatele tagata sa nonofo i le fale o Uitimera. O lona uiga e tele galuega e tatau ona fai, aemaise lava mo le tinā o Tavita, o Maria.

Au Paia, 1:68–70

I se tasi aso, a o faigaluega Maria, sa asiasi atu ai le agelu o Moronae ia te ia. Fai mai o ia, na ia iloaina o galuega faaopoopo uma lava ua vaivai ai o ia. Sa manao o ia (le agelu) e faamalosia lona faatuatua. Sa ia tatalaina se ato ma avea’e papatusi auro. Sa ia susu’eina itulau ma faaali atu ia Maria le tusitusiga. Sa ia folafola atu ia Maria o le a faamanuiaina o ia.

Au Paia, 1:70–71

O nisi tagata sa le talitonu e moni papatusi. Sa usitai Iosefa i le poloaiga a le Alii e aua nei faaali atu papatusi i se tasi. Na fetalai mai le Alii o le a Ia faatagaina isi molimau e toatolu e vaai i papatusi. Sa fesili Tavita Uitimera, Matini Harisi, ma Oliva Kaotui pe mafai ona avea i latou ma molimau. Na fetalai mai le Alii e mafai.

Mataupu Faavae ma Feagaiga 5:11–12; 17; Au Paia, 1:73

Sa o atu Iosefa, Matini, Oliva, ma Tavita i le togavao. Sa latou tootutuli ma feauauai e ole atu i le Atua pe mafai ona latou vaai i papatusi, ae sa leai se mea na tupu.

Au Paia, 1:73

Na lagona e Matini Harisi o ia le mafuaaga na le taliina ai la latou tatalo. Na alu ese atu Matini, ae o isi sa faaauau pea ona tatalo.

Au Paia, 1:73

Ona faaali mai lea o se agelu i se malamalama susulu. Sa ia faaali atu ia Oliva ma Tavita papatusi auro ma tusitusiga o loo i ai i luga. Sa latou faalogo i le siufofoga o le Atua o fai mai na faaliliuina e Iosefa papatusi e ala i le mana o le Atua ma sa sa’o le faaliliuga. Na fetalai mai foi le Atua e tatau ona latou ta’u atu i tagata uma mea na latou vaaia ma faalogo i ai.

“O Le Mau a Molimau e Toatolu”; Au Paia, 1:73–74

Sa alu Iosefa e su’e Matini. Sa tatalo pea o ia. Sa tatalo faatasi Iosefa ma ia. Ona faaali mai lea o le agelu ma faaali atu papatusi ia Matini, e pei lava ona sa ia faia ia Oliva ma Tavita.

Au Paia, 1:74

Na soso’o ai le alu atu o Iosefa e su’e ona matua, o e na asiasi atu ia Maria Uitimera. Sa ia ta’u atu ia i la’ua lona fiafia ona sa vaai isi tagata i papatusi. O lea la ua mafai e molimau ona ta’u atu i tagata e moni lava mea na ta’u atu e Iosefa. Sa ta’u atu e Matini i tagata uma lona fiafia ona sa faatagaina o ia e le Atua e avea ma se tasi o molimau.

Au Paia, 1:74–75

I ni nai aso mulimuli ane, na fetalai atu ai le Alii ia Iosefa e faaali atu papatusi auro i isi tagata e toavalu—o lona tamā, o ona uso e toalua, o uso e toafa o Tavita, ma le uso faaletulafono o Tavita. Sa latou uuina papatusi ma susu’eina itulau. Sa latou iloaina e moni papatusi.

“O Le Mau a Molimau e Toavalu”; Au Paia, 1:75

Ua mae’a nei le faaliliuga o le Tusi a Mamona. Na toe tuu atu e Iosefa papatusi auro i le agelu o Moronae. O le taimi lenei e lolomi ai kopi o le tusi ina ia mafai ai e tagata uma ona faitau ma aoao atili e uiga ia Iesu Keriso.

Au Paia, 1:75–76

Sa tele se tupe na totogi ai le lolomiina o le Tusi a Mamona. Na faaaogaina e Matini Harisi se vaega o lana faatoaga ina ia totogi ai. Sa ia faia lenei mea ona sa ia iloaina e moni le Tusi a Mamona. O kopi uma o le tusi o loo i ai le molimau a Matini ma isi molimau mo tagata uma e faitauina. E lei faafitia lava e molimau a latou molimau.

Mataupu Faavae ma Feagaiga 19:26–27, 34–35; Au Paia, 1:76–78