Ua Ole Atu Pale mo se Faamagaloga

Ina ua oo i le taimi mo Thankful ma Pale Palate e fanauina ai le la pepe, sa la toe foi mai i le fale mai la la’ua misiona i Kanata. Sa maua se la pepe tama maloloina e pei lava ona sa folafola mai e le Alii o le a la maua.

Au Paia, 1:270

O le mea e faanoanoa ai, na maliu Thankful i ni nai itula talu ona fanau mai le pepe. Na iloa e Pale o le a le mafai ona ia tausia le pepe e aunoa ma ia. Sa ia talosagaina se tamaitai i Katelani e tausia le pepe a o toe foi atu o ia i Kanata e faamae’a lana misiona.

Au Paia, 1:270

I Katelani, sa amata ai e Iosefa Samita se faletupe e saili ai se tupe mo le galuega a le Atua. Sa ia talosagaina tagata e tuu atu i le faletupe e faaaoga a latou tupe ina ia mafai ai e isi ona nonoina. Ae, mo le tele o mafuaaga, sa le lava tupe a le faletupe ma sa tatau ai ona tapunia. Sa faaletonu foi isi faletupe i le Iunaite Setete.

Au Paia, 1:260–61, 264–68

Na oo ina faigata le olaga mo le Au Paia. O nisi na leai ni a latou galuega ma ua le lava nei tupe e faatau ai meaai po o lavalava. O isi tagata sa feita ia Iosefa, e oo lava i nisi o ana uo mamae. Sa latou manatu o Iosefa e le o se perofeta moni ona o le faaletonu o le faletupe.

Au Paia, 1:264–68, 272–275

A o tupu lenei mea, na toe foi mai Pale i le fale mai lana misiona. O faafitauli i le faletupe na faafaigatā ai foi le olaga mo Pale. O le a le lava ana tupe e totogi ai lona fale, ma o le a leai se mea e nofo ai.

Au Paia, 1:270–71

O lea foi la ua ita Pale ia Iosefa. Sa ia tusi atu se tusi ia Iosefa. Sa ia ta’u atu ia Iosefa o loo talitonu pea o ia i le Tusi a Mamona. Ae sa ia fai atu foi ni upu faalealofa e uiga i le Perofeta. Sa ia fai atu ia Iosefa na sese o ia i lona amataina o le faletupe i le amataga.

Au Paia, 1:271

Mulimuli ane, na o mai ai nisi o uo a Pale mai Kanata i Katelani. Sa aoaoina i latou e Pale i le talalelei, ma sa latou fiafia e toe vaai ia te ia.

Au Paia, 1:279–80

Ae sa faateia foi i latou ona ua leai se faatuatua o Pale ma le toatele o i latou o Iosefa Samita o se perofeta.

Au Paia, 1:279–80

O se tasi o uo a Pale mai Kanata o Ioane Teila. Ina ua vaai Pale ia te ia, sa ia ta’u atu ia Ioane lona ita tele ia Iosefa Samita. Sa ia fai atu ia Ioane e aua le toe mulimuli ia Iosefa.

Au Paia, 1:280

Sa faamanatu atu e Ioane ia Pale i le taimi sa latou i ai i Kanata, sa faasoa atu ai e Pale lana molimau o Iosefa Samita o se perofeta moni. “Ua ia te au nei le molimau lava lea e tasi,” o le tala lea a Ioane. “Afai sa moni le galuega i le ono masina talu ai, e moni lava i le asō. Afai sa avea Iosefa Samita i lena taimi ma perofeta, ua avea nei o ia ma se perofeta.”

Au Paia, 1:280

Na iloa e Pale e sa’o lana uo o Ioane. Sa faanoanoa o ia i lana tusi ita ia Iosefa. Sa ia iloaina sa faia e Iosefa le mea sili na ia mafaia e fai ai le galuega a le Alii. O faafitauli i le faletupe e le faapea ai o Iosefa e le o se perofeta moni a Iesu Keriso.

Au Paia, 1:283

Sa alu Pale i le fale o Iosefa. Sa ia ta’u atu ia Iosefa ua faanoanoa i upu faalealofa sa ia faia. Sa faamagalo e Iosefa ia Pale, tatalo mo ia, ma faamanuia o ia. Sa auauna atu Pale i le tele o isi misiona ma ta’u atu i tagata i le lalolagi atoa o Iosefa Samita o le perofeta a le Alii.

Mataupu Faavae ma Feagaiga 64:7–11; Au Paia, 1:283