“Ua Maua e Iosefa ma Oliva Ki o le Perisitua,” Tala o le Mataupu Faavae ma Feagaiga (2024)
“Ua Maua e Iosefa ma Oliva Ki o le Perisitua,” Tala o le Mataupu Faavae ma Feagaiga
Aperila 1836
Ua Maua e Iosefa ma Oliva Ki o le Perisitua
Ua asiasi atu Iesu Keriso ma agelu i le Malumalu o Katelani
E tasi le vaiaso talu ona faapaiaina le Malumalu o Katelani, ae faapotopoto le afe o le Au Paia i le malumalu e tapuai atu i le Faaola. O le Aso Sa o le Eseta. Na tuuina atu e Iosefa Samita, Oliva Kaotui, ma Aposetolo e Toasefululua le faamanatuga i le Au Paia.
Mataupu Faavae ma Feagaiga 110, ulutala o le vaega; Au Paia, 1:239
Ina ua uma le faamanatuga, sa maua e Iosefa ma Oliva se nofoaga filemu i le malumalu, i tua atu o le pupuni, e tatalo ai.
Mataupu Faavae ma Feagaiga 110, ulutala o le vaega; Au Paia, 1:239
Ina ua uma ona la’ua tatalo, sa la tepa ae i luga. Sa tu Iesu Keriso i o la luma! Sa Ia silafia sa galulue malosi le Au Paia i le fausiaina o le malumalu. “Ua ou taliaina lenei fale” na Ia fetalai mai ai. Sa ta’u atu e Iesu ia Iosefa ma Oliva o faamanuiaga o le malumalu o le a aumaia ai le olioli tele i le toatele o tagata.
Mataupu Faavae ma Feagaiga 110:1–10
Ina ua mavae le alu ese atu o Iesu, sa faaali atu le perofeta o le Feagaiga Tuai o Mose ia Iosefa ma Oliva. Sa Ia tuuina atu ia i la’ua ki o le perisitua o le faapotopotoina o Isaraelu. O lona uiga e mafai ona la taitaia le galuega o le faasoaina atu o le talalelei. E mafai ona la auina atu faifeautalai i le lalolagi atoa e aumai tagata i le Ekalesia a le Faaola.
Mataupu Faavae ma Feagaiga 110:11
Ona sosoo ai lea ma le faaali mai o le perofeta o Elaia. Sa Ia tuuina atu ia Iosefa ma Oliva ki e toefuata’i mai ai le feagaiga faa-Aperaamo. O lona uiga e mafai e le Au Paia ona maua mai le Alii le feagaiga lava lea e tasi na maua e Aperaamo. O le a latou maua le mana e aumai ai le talalelei ma faamanuiaga a le Atua i tagata i soo se mea mo le tele o tausaga a sau.
Mataupu Faavae ma Feagaiga 110:12
Mulimuli ane, na faaali mai ai le perofeta o Elia. Sa ia tuuina atu ia Iosefa ma Oliva ki o le perisitua e faamauina ai, pe tuufaatasia ai aiga mo le faavavau. O le galuega na faia e le Au Paia i malumalu o le a taliaina lea i le lagi. Ua i ai nei i le Ekalesia le mana e fai ai le galuega a le Faaola ma saunia ai mo Ia e toe afio mai i le lalolagi.