Misiona a Pale i Kanata

E lei leva ona faapaiaina le Malumalu o Katelani, ae o atu le toatele o taitai o le Ekalesia i misiona e talai atu le talalelei.

Mataupu Faavae ma Feagaiga 88:81; 109:22–23; 112:28–29; Au Paia, 1:249

Sa fiafia Pale Palate e faasoa atu le talalelei. Ae sa manatu o ia e tatau ona nofo i le fale ona sa ma’i lona toalua, e igoa ia Thankful. Sa le tele foi ni a latou tupe.

Au Paia, 1:249

Na asiasi atu Heber Kimball, o le uo a Pale ma o se tasi o Aposetolo. Sa ia tuuina atu ia Pale se faamanuiaga ma fai atu i ai e tatau ona ia talai atu le talalelei i Kanata. I le faamanuiaga, na folafola atu ai e Heber o le a manuia Thankful. Sa ia folafola atu o le a maua sona atalii ma o le a fesoasoani le Alii ia Pale e maua le tupe na ia manaomia.

Au Paia, 1:249–50

Ua 10 tausaga talu ona faaipoipo Thankful ma Pale. Sa le’i i ai se la fanau. Ae sa la faatuatua i folafolaga a le Alii. E ui lava o le a faigata ona mamao ese mai ia Thankful i Kanata, ae na alu atu Pale e faasoa atu le talalelei.

Au Paia, 1:250

I Kanata, sa su’e solo ai e Pale ni nofoaga e mafai ona ia aoao atu ai i tagata. Sa ia fesili pe mafai ona ia aoao atu i lotu ma isi fale. Sa fai atu tagata uma e leai.

Au Paia, 1:252–53

Ona feiloai lea o Pale ia Ioane ma Leonora Teila. Sa fiafia i laua ia Iesu Keriso ma le Tusi Paia. Na fesili Ioane ia Pale pe na ese mea sa ia aoao atu mai le Tusi Paia.

Au Paia, 1:252–53

Sa fai atu Pale sa ia aoao atu e uiga ia Iesu, perofeta, papatisoga, ma le Agaga Paia. O na mea uma sa i ai i le Tusi Paia. Sa fesili atu Ioane, “Ae faapefea Iosefa Samita ma le Tusi a Mamona?” Sa ta’u atu e Pale ia Ioane sa ia iloaina e moni le Tusi a Mamona, e pei lava o le Tusi Paia, ma o Iosefa Samita o se perofeta a le Atua.

Au Paia, 1:253

Sa talitonu Ioane i le mea na fai atu ai Pale. Sa la faitauina le Tusi a Mamona ma iloa ai e moni. Sa valaaulia e Ioane ma Leonora a la’ua uo o Iosefa, Mercy, ma Maria Filitia ma isi e o mai e faalogologo i le aoao atu a Pale. E toatele tagata na papatisoina ma auai i le Ekalesia.

Au Paia, 1:254–55

Sa fiafia Pale, ae sa manao o ia e alu i le fale ia Thankful i Katelani. Sa faatofa atu o ia i ana uo fou i Kanata. A o lulu lima i latou, sa latou tuuina atu ia te ia ni tupe e fesoasoani e tausi ai lona aiga.

Au Paia, 1:255–56

Ina ua taunuu Pale i le fale, sa ia iloa ai ua sili atu ona malosi ia Thankful. Sa maua e Pale nisi kopi o le Tusi a Mamona ma toe foi atu i Kanata e faaauau pea ona faasoa atu le talalelei. O le taimi lea, na la o faatasi ai ma Thankful.

Au Paia, 1:256

E lei umi ae iloa e Thankful ma Pale o le a maua se la pepe. Sa la’ua manatua le faamanuiaga na tuuina atu e Heber ia Pale. Sa la’ua lagonaina e pei o mea uma na folafola mai e le Alii i lena faamanuiaga na taunuu.

Au Paia, 1:256