Ua Aoao le Au Paia e uiga i Papatisoga mo e ua Maliliu

Sa nofo Jane Neyman i Navu. Sa alu o ia i se falelauasiga lea sa saunoa ai Iosefa Samita. O le falelauasiga na mafua ai ona mafaufau Jane e uiga i lana tama tama o Cyrus. Na maliu o ia ma e le’i papatisoina. Sa popole Jane ia Cyrus. Sa ia iloa e tatau ona papatisoina i tatou ina ia mafai ai ona nonofo faatasi ma le Tama Faalelagi.

Au Paia, 1:421

Sa iloa e Iosefa ona lagona. Sa masani ona ia mafaufau i le mea lava lea e tasi e uiga i lona uso o Alavini, o le na maliu foi e aunoa ma le papatisoina.

Au Paia, 1:421

I le falelauasiga, sa faasoa atu ai e Iosefa se mea na aoao atu e le Atua ia te ia. Fai mai o ia, afai ua maliu se tasi e aunoa ma le papatisoina, e mafai ona papatisoina i tatou mo i latou.

Au Paia, 1:421

Sa matua fiafia lava Jane e faalogo atu i lenei mea! E lei leva ona uma le falelauasiga, ae o atu o ia i le vaitafe ma se toeaina o le Ekalesia. Sa ia papatisoina o ia mo Cyrus.

Au Paia, 1:421

I ni nai vaiaso mulimuli ane, sa aoao atili atu ai e Iosefa le Au Paia e uiga i papatisoga mo e ua maliliu. Fai mai a ia, o le toatele o tagata ua maliliu na mananao e papatiso. Sa mananao i latou e mulimuli ia Iesu Keriso. Sa latou faatalitali ma faamoemoe mo tagata o o latou aiga o e o loo soifua pea ina ia papatisoina mo i latou.

Mataupu Faavae ma Feagaiga 128:15–19; Au Paia, 1:423

Sa taufetuli atu le Au Paia i le vaitafe i le taimi lava lena. Sa papatisoina i latou mo tagata latou te alolofa i ai. Sa papatisoina Ailama Samita mo Alavini. Mulimuli ane, na aoao mai e le Alii e faapea, o papatisoga mo e ua maliliu e tatau ona faia i totonu o le malumalu, e tatau i se tasi ona tausia se faamaumauga o papatisoga taitasi, ma e tatau ona papatisoina alii mo alii ma tamaitai mo tamaitai.

Mataupu Faavae ma Feagaiga 124:29–32; 127:5–12; 128:1–9; Au Paia, 1:424