Ua Faapaiaina le Malumalu o Katelani

Ina ua mavae le toeitiiti tolu tausaga o galulue malosi, na iu lava ina mae’a le Malumalu o Katelani. Sa valaaulia e le Perofeta o Iosefa le Au Paia i se sauniga faapitoa e faapaia ai le malumalu. O le a ia faia se tatalo faapitoa ma tuuina atu le malumalu i le Alii. O le a avea ma maota paia o le Alii.

Au Paia, 1:235

I le taeao po o le taeao o le sauniga, e faitau selau le Au Paia na faapotopoto i totonu o le malumalu. Ina ua faatumulia nofoa uma, sa tutu tagata i le faitotoa ma fafo, ma autilo atu i faamalama. Sa fiafia tagata uma e vaai ua faapaiaina le malumalu.

Au Paia, 1:235–36

Sa faitau e Iosefa se tatalo e faapaia ai le malumalu. Sa ia ta’u atu i le Alii sa usiusitai le Au Paia ia te Ia. Sa ia ole atu i le Alii e talia le malumalu e avea ma Ona maota.

Mataupu Faavae ma Feagaiga 109:1–5

Sa tatalo Iosefa ina ia lagona e tagata uma o e na o mai i le malumalu le mana o le Alii ma iloa o Lona maota lea.

Mataupu Faavae ma Feagaiga 109:13

Sa tatalo foi Iosefa ina ia mafai ona vave salamo le Au Paia pe a agasala. Sa ia ole atu i le Alii e tuuina atu ia i latou le mana e faasoa atu ai Lana talalelei i le lalolagi atoa. Ina ua mae’a le tatalo, sa usuina e se aufaipese se pese fou e ta’ua “O Le Agaga o le Atua.” Sa faatumulia ia tagata i le olioli. Sa latou tutu ma vivii atu i le Alii.

Mataupu Faavae ma Feagaiga 109:21–32; Viiga, nu. 2; Au Paia, 1:237

E toatele tagata na vaai i agelu i le malumalu i lena aso. Sa latou vaaia le malamalama susulu o sau i lalo mai le lagi i luga o le malumalu. Fai mai nisi tagata sa foliga mai o se ao; o isi na fai mai sa foliga mai o se afi. Sa latou lagonaina uma lava o le malumalu o se nofoaga paia. Ua avea moni nei o se maota o le Alii.

Au Paia, 1:237